Luke 8

Mǝɗkǝra a kabira

114 Ndiira maaso wa Yeso ya ntii ɓǝɗɗo a wiina urasa ma em ura ngeek ngeek sa yǝn nkee mara kwalari kuɓsutu Kaa wa, emfǝɗkaa ɓǝsa puu a haa raɓ sǝɓa ɓǝ ke ma sase. 2Ma toonaka ɓa ɓaa roɓ ɓǝsǝ ma wisa samesewa ɓa, ma siyamse ɓose wa a ɗaaso ɓoso Maryamu u ǝn yarsǝsǝ me Magadaliya wa ɓa hik sǝsǝ wisa samese mbutu siya. 3Ma Yuwana toone ate ke an yarsǝsǝ me Kuzaya, yǝn yaa kwangya a ɓaa ɓǝn tom tinima a tanda Hiridus ra ke ma Suzana ma tooneka kwaak. Toona sǝsǝ ɓǝn kwasǝ Yeso ma emfǝɗkaa ɓǝsa ma mbu ɓǝsǝ ɓa.

4Pa ɓeta dem ntiisǝ kwauwo ɓolɓol a ura ɓǝ finsǝsǝ wa, pa Yeso yǝɓǝ nkee mǝɗkǝra ra me, 5“An waa nyaanyo ke yǝ ko a rǝko. Yǝsaa rǝkoo wa, nkaama peera ma a roo a ɗǝɗa, ɓaa noo, rǝmɓa ɗǝm ɓǝ tiki ndiira. 6Pera a roo a ham ɗungate ɓa, ɓǝ nhaasǝ wa, ɓǝ nii ɓǝ ee, me ham sǝsa sem dǝldǝl ra. 7Nkaama peera ma a roo a tǝute, pa ɓǝ mbar ke, tǝute kaya yǝ ɓǝ sartǝ. 8Maaso ɗǝm, peera nkaama a roo a ham putu yaɓ ɓa. Pa ɓǝ nhaa, ɓǝ mbraa ɓǝ nsee, pusa puu pusa puu a faɗ u yǝ rǝksǝ wa.” Pa yǝ nkeesǝ maaso wa, Yeso yǝ nik kwaaro yǝ nkee me, “Yaa yǝsǝ ma ngwee kura kura ya, a lee yǝ kura.”

9Emfǝɗkaa ɓisa ɓaa taa ɗaanto mǝɗkǝta sǝra wa. 10Yǝ nkee me, “Ɓaa weesǝ yauwon me sǝ maa mbu a nhuukǝta u kuɓsutu Kaa wa ran, pa pepera ɓeta ra, nǝn kan ma mǝɗkǝta me,
“‘hana ka ɓǝ sengge, ɓǝ nkaa ɓǝ wǝr ra,
hana ka ɓǝ pira ngwee ɓǝ kura, ɗǝm ɓǝ nkaa ɓǝ maa ra.’

11“Uwa ndǝ ɗaanto mǝɗkǝra an rǝko ya wa. Nkaama sǝma ndǝ mara Kaa ra. 12Nkaama ɓǝ rosǝ a ɗǝɗa sǝɓa, ǝn ɓaa ɓǝ kurasǝ ɓa, pa kuɓ nsaamse wa, yǝ wo yǝ kon mara sǝra a kuti ɓose, me ɓǝ na ɓongtǝra ɓǝ taa nkonkweera wa ra. 13Nkaama rosǝ a ham ɗungate ɓa, ǝn ɓaa ɓǝ konsǝ mara Kaa ra ma hurhurto kuɗa wa me ɓǝ kuran, pa ɓǝ sem ma hinti ra. Ɓǝ naa ɓongtǝra ngeek, pa a fer pǝtara wa, ɓǝn nwii ndiira. 14Nkaama rosǝ a tǝute ma, ǝn mǝɗkǝ ɓaa ɓǝ kurasǝ wa, pa a tǝr a nii, rǝkata kaɗo put ntaandi wa ra, ma kǝnaa, ma yau kura nebto wa, ǝɓǝ tii ɓǝ nkaa ɓǝ kini ra. 15Pa nkaama rosǝ a put yabɓa wa, suwa ǝn ɓet ɓǝ kurasǝ mara ira ɓǝ kon ma kuɗa fin ɓǝ yau ma siso ɓǝ kweetǝ ɓǝ nsee emba.

Mǝɗkǝra a ɗuura arkumta ra

16“Yaa kǝ sem kǝn kǝ ya nek arkumta pa ya nhuukǝ ɗaan a talo, hana ya ti a kunda hantǝra wa ra. Pa yǝ kǝ ti ɓoti a ɓǝ tiya, me ɓaa ka wo ɓa, ɓǝ kǝ nkaa ɓǝ wǝr han ɗekɗek ɓa. 17Me mbukake sem kǝn likisǝ ɓa, u a hik ntaandi wa ra, ma mbu a nhuukǝra ɓa, u ɓaa maasǝ hana a wil ntaandi wa ra. 18Se toma pǝro ma kanmǝra kura sǝn kurasǝ ra, Yaa yǝsǝ ma mbuka ya, ɓaa ka sookǝ me a kwii, ɗǝm yaa semma mbuka ra ya, hana u yǝ sǝ ngeek wa, ka kon a sanii.

Maa Yeso ma kobɓisa

19Pa maa Yeso ya ma ɓaata ɓisa ɓǝ ko a sani me ɓaa wǝrǝ pa ɓǝ nkaa ɓǝ kana a sani ra me ɓeta kwausǝ dem. 20Atike yaa nkee me, “Maange ma ɓaata ɓǝnga ɓǝ kǝɗ ntaandi, ɓǝn yau me ɓǝ kan ma ngase.” ɓǝ ngǝ wǝrǝ.”

21Yeso yǝɓǝ kak me, “Maane ma ɓaata ɓǝnaa, ndǝ ɓosa ɓaa ɓǝn kurasǝ mara Kaa ra ɓa, ɗǝm ɓaa tom tinima ma siso ɓa.”

Yeso nkwaakǝ tiwo

22Kaaka ke Yeso ma emfǝɗkaa ɓisa ɓǝ nii ɓǝ kan a kurnyaamo, pa yǝɓǝ nkee me, “Ndǝ tal a kira aulaara ra ma kal war.” Pa ɓǝ kana kurnyaamo ɓǝ ntii talo. 23Pa ɓǝn talsǝn talwa, pa sase Yeso munda a ma. Pa wiine yoro ke a nii a aulaara kara, mbraa ǝn takli a kana kurnyaamo ɗaan.

24Emfǝɗkaa ɓisa ɓǝ ko a sanii, ɓaa niki ɓaa nkee me, “Antaanda ya, Antaanda ya, kǝndǝ tumu!

Pa yǝ nii kǝɗ, yǝ nkwaakǝ yoro ma kokrokto aulaara wa, pa yoro a nǝɗǝ, handa a tom nseu. 25Pa yǝ taa emfǝɗkaa ɓisa, “Na ɓongto waaso nau?”

Pa kokto ɓǝ ma, ɓǝ taa ɓaatǝ me, “Sika nwa, ǝn nyamni nwau? Yǝn ti hana yora ma mbraa, ɓaa na mbartau!”

Yeso yǝ roɓ yen ma wis samesewa ya

26Ɓǝ tal ma lau put Garasinawa, u yǝsǝ a tale ualaara u fiɗsǝ Galili wa. 27Pa Yeso hamsǝ kurnyaamo nwa, pa yǝ pamma yaa ma siyo nsaamse ya. Tǝrǝn singgǝ eɗ kaya yǝn siki luktu sem a maabiri isi ra, hana yǝ tǝr ɗuur ra, pa yǝn tǝr a ham tinamamse ɓa. 28Pa yǝ wǝrsǝ Yeso wa, yǝ nik kwaro ɗǝm yǝ nwii a wii kwolkete isi wa, yǝ yauli ma kokrokto, “Ngǝn taa mbi ma naseu, Yeso, Au Kaa Kwang Ɓoti ya? Nǝn kǝna ngǝ, ngǝ nǝ na kongsa ra. 29Me ka Yeso wee nkee wis nsaamse kaya, a fiɗaa a eɗ ɗa ni. dem a putu ɓan kaasǝ ma sakla a nema ma kwelkete ɓan warsǝn wara pa kaa fin yǝn nkaa skala nsaa yǝn ti ya faɗ a sanglo.

30Yeso yaa taa me, “Ən yargǝ me miniu?”

Yaa kak me, “Dem dem,” me wisa samese sa kwaak a sani. 31Wis samese kawa ɓǝ toma ngǝnǝ Yeso wa me yǝɓǝ tuung a npoo ɓan likisǝ samese wara.

32Kur alautiya wa ɓǝn war wanda a hiɗa yolo ra. Pa nsaamse kaya ɓǝ kǝna Yeso me yǝ ɓǝ lee ɓǝ kanaa ɓoni, Pa yǝɓǝ yawa. 33Pa wis nsaamse kaya, ɓǝ fiɗ ɓǝ kan a alautiya kasa. Kur alautiya kawa kanan pusa pupu raɓ, ɓǝ nii ma mone ɓǝ ham a aulaara, ɓǝ tum nsaad a mbraa.

34Pa ɓan war wanda kelngǝta sǝta wǝrsǝ ɓǝ tomsǝ ɓa wa, ɓǝ mon ɓǝ nkee a uru, ma ura kalta sa. 35Pa ɓeta ɓǝ piɗ, me ɓǝ wǝr mbu tomsǝ ɓa. Pa ɓǝ wosǝ a Yeso ni nwa, ɓǝ taa eɗ nsaamse piɗsǝ a sanii nya nwa, yǝ kaɗsǝ ngwang a kwelkete Yeso wa, yǝ tungsǝ lukta, ɗǝm yǝ kansǝ a senda ira, pa ɓǝ kura kokto. 36Ɓaa ɓǝsǝ kǝnso ɓǝ wǝrsǝ ɓa ɓǝ nkee ɓeta mbu ɓa tomsǝ a roɓ eɗ ma nsaamse siya. 37Pa ɓeta nsaad a put Garasinawa, ɓǝ nree Yeso me yǝ ɓǝ lee put ɓoso, me kokto ma ɓǝn kwang. Pa sase yǝ kana kurnyaamo yǝ faɗa.

38Pa ya ɓaa hiksǝ samese a saniya ya wo ya ngǝnǝ Yeso yǝn nkee me a lee ndǝ ko kee ma ngase pa Yeso ya tung ya nkee me, 39“A kang ɗuuru ko ngǝ nkee mbu Kaa tomgǝsǝɓa.” Paya nii yǝ kang ɗuuru yǝn nkee mbu Yeso yǝ tomsǝsǝ ɓa.

Au Yayirus ya ma autoone sam kwakwa ra

40Pa Yeso yǝ kangsǝ wa ɓeta ɓaa nkee marapa ma wo me ka ɓǝn war sǝn wara. 41Pa atike ǝn yarsǝ me Yayirus, yǝn an wii hit kwau Yahudawa ɓa, yǝ wo yǝ nwii a natsa Yeso sa, yǝ kǝnasǝ me, yǝ ko ɗuur a sanii, 42me au isi toone fin yǝsǝ ma siso ya, yǝ kansǝ meeta puu nhaa raɓ wa, yǝn woɗwoɗɗo.

Pa Yeso yǝn maasǝ ɗǝɗa wa, ɓet kwausǝ dem ɓa, ɓǝn nheemsǝ. 43Kǝnso toone ke u yǝsǝ ma siyo tuk monma wa meeta pu nhaa raɓ, yaa ke sam kǝn kiya sa roɓ wa ra. 44Yǝ wo ma lau ndiira usu, yǝ ntee kal luktu usu, nok kǝnso tuk moonma usu a nǝɗǝ.

45Yeso ya nkee me, “Ya teenǝniu?”

Ɓǝ renǝsǝwa Bitrus ya nkee me, “Ya kwangya maa ɓeta ɗǝm ɓǝn tǝngǝsǝ.”

46Pa Yeso ya nkee me, “Yake teenǝn me nǝ maan kwangto fiɗ a mabiri yaanen.”

47Pa toone siya yǝ wirsǝ me yǝ maanwa ya pidǝ yǝn madkin madki ya ko ya kwirsǝ a wiiyo a Yeso ni. Pa a wiiyo a ɓeta nsaad ya nkee mbu kwasǝsǝ yǝ tee sǝsǝ ɓa ma roɓo yǝ roɓ sǝ nok wa. 48Yeso yaa nkee me, “Autoone, na ɓongto nwaango roɓ ngǝn, ngo kwakwa.”

49Yeso yǝ sa kanmǝra nding wa atike yǝ piɗ a ɗuur Yayirus ǝndǝ wii Hit Kaa wa. “Autoone kaya yǝ wodon, ngǝ rǝka malǝm ɗǝm ra.”

50Yeso yǝ kurasǝ maaso wa ya nkee Yayirus me, “Ngǝ kura kokto ra, a ɓongtǝrato maɗ, yǝ kǝ nii.”

51Pa yǝ kansǝ ɗuur Yayirus wa, yǝ lee yaake yǝ kan da, meen Bitrus ma Yohanna ma Yakubu ma paab autoone sisi ya ma maasi ra. 52A fersiso ɓeta nsaad ɓaa oro, Yeso yǝɓǝ nkee me, “Sǝ teera! Autoone sisi yǝ woɗ ɗa, yaa munda.”

53Ɓaa nhuu, me ɓǝ maan me yǝ woɗɗon. 54Yǝ ma autoone kaya a neme, yaa nkee me, “Auwane, a nii kǝɗ.” 55Huurtu usu a kang a sanii, yǝ nii kǝɗ nok, pa Yeso yǝ nkee me, saa na mbuseya. 56Wiina ɓǝsa ɓǝ maa ee, pa Yeso yǝɓǝ win ngwee, me ɓǝn nkee atike mbu tomsǝ ɓa ra.