Mar 1 | LlaSC | STEP | Unwa ndǝ ntiiri mara kwalarira a ɗuura Yeso Almaseho Au Kaa ya.

Mark 1

Yohanna an tom Baptisma ya yǝ werkǝ ɗǝɗa

1 Unwa ndǝ ntiiri mara kwalarira a ɗuura Yeso Almaseho Au Kaa ya. ^{▼▼Ɓaata ɓan nyora a ntiiri ɓa ɓǝ nyor meAu Kaa ya ra.}

2 Nga ɓaa nyorsǝ a likarkar an nawanto Ishaya wa me,
“Kǝnǝ timi an timira yaane a wii nwaango,
yaa kiya sǝk ɗǝɗa men wo nwaango ya.’ 3 “Kwaro yaa yarma a sanglo, yǝn nkee me,
‘Sǝ sǝk ɗǝɗa men Ankundi,
Sǝ nǝɗkǝ ɗǝta kǝɗ meen sase.’”

4 Pa Yohanna yǝ wo, yǝn tom baptisma a sanglo yǝn nkee mara kwalari ra, u kon nfaata wa me ɓǝ lee a tenatenato ɓoso. 5 Nsaad ɓaa ɓǝsa a put Yahudiya ɓa, ma ɓaa Urshalima ɓa, ɓǝ toma wo a sanii, ɓǝn nkee tentenato ɓoso, yǝɓǝ tom Baptisma a sen Urdun wa. 6 Luktu Yohanna wa werkǝ ma ntaa telǝm wa, ɗǝm yǝ kaa nɗera ira ma ntaa. Mbuseya ɓisa ndǝ mormoraa ma mbraa nsinya ma. 7 Yǝn nkee mara Kaa ra me, “Ndiira nwano yaake kiyǝ wo u yǝ faɗ nǝsǝ kwangto wa, u hana kurti taa isa ya nǝ nkaa nǝ sub nǝ kee ra. 8 Nǝn tomsǝ baptisma ma mbraa, pa usu kiyǝ sǝ tom ma Wis Kaa wa.”

Ɓaa tom Yeso Baptisma

9 A fersiso, Yeso yǝ fiɗ Nazarat a put Galili wa, pa Yohanna ya tom baptisma a sen Urdun wa. 10 Pa Yeso yǝn fiɗsǝn fiɗ a mbraa wa, pa yǝ wǝr liura npeekǝsǝ, ɗǝm Wis Kaa wa ǝn hamham a sanii nga tǝlko. 11 Pa kwarko a fiɗ a liura, yǝ nkee me, “Ngǝ auwane, yaa nǝn yausǝsǝ ya, nǝn hur kuɗa ma sase dem.”

Nsaa yǝ pǝta Yeso

12 Nok kǝnso Wis Kaa wa yǝ tung Yeso a sanglo, 13 Pa yǝ kǝnso a sanglo tǝro pakurun, Shaitan yǝn pǝtasǝn pǝta. Yeso ke ma emnama a sanglo ma, ɗǝm ɓantimira Kaa ɓa ɓaa tom tinima.

Yeso yǝ ntii tinima Galili

14 Ndiira ɓaa tungsǝ Yohanna a pursuna wa, Yeso yǝ ko a put Galili wa, yǝn nkee mara kwalari ra u Kaa wa. 15 Yǝn nkee me, “Fer usu kanan, Kuɓsutu Kaa wa yǝ won ngwang. Sǝ nfaa, sǝ yau ma mara u kwalari wa!”

Yeso yǝ yar ɓan maseya ɓa kurun

16 Yeso yǝn talǝsǝntalǝ a kal aulaara Galili ra wa, yǝ wǝr Siman ma ate isi Andarawus, ɓǝn yaɓ langtanga a aulaara, me ɓǝ ɓan ma nseeya ɓa. 17 Yeso yǝɓǝ nkee me, “Sawo sǝnǝ ɓǝɗǝ, kǝnǝsǝ ti kosǝ yar ɓeta ɓǝ wo a nani.” 18 Nok kǝnso ɓǝ lee langtanga ɓosa ɓaa ɓǝɗǝ. 19 Yǝ kosǝ a wiiyo ngeek wa, yǝ wǝr Yakubu Au Zabadi ya ma ate isi Yohanna ɓǝ ɗaan a kurnyaamo, ɓǝn werkǝ langtanga ɓosa. 20 Nok kǝnso yǝ ɓǝ yara, ɓǝ lee pap ɓose Zabadi ɗaan a kurnyaamo ma ɓan tinima ɓisa ɓaa ɓǝɗǝ.

Eɗ ma wis tentena ya

21 Pa Yeso ma ɓan ɓǝɗ ɓisa, ɓǝ ko Kafarnahum, kaa nwiiya Yahudawa ɓa wosǝ wa, pa Yeso yǝ kana hit kwau Yahudawa ɓa yǝ ntii fǝɗkǝra. 22 Ɓeta ǝɓǝ tom mbu weɗara ɓa a fǝɗkǝra ira, me yǝ fǝɗkǝ ɓǝ ngaa yaa yǝ sǝ ma kwangto ya, sem ngaa u malǝmaa fǝɗkǝra Masaka Musa wa ra.

23 Sem ma maa ra; a hit kwau Yahudawa siso, yaake kǝn yǝ ma wis nsaamse wa, pa yǝ nik kwaro ma kwakwato yaa nkee me, 24 “Oi! Mbu nteengǝ mbiu ma taaseu, Yeso eɗ Nazarat ya? Ngǝ wo me ngǝtǝ tumuu? Nǝ maa ngǝn, ngǝ yaa ɗekɗek Kaa timisǝ ya.”

25 Pa Yeso yǝ nkwaakǝ nsaa yaa nkee me, “A roo suwet, a fiɗ a maabir eɗ sisi ya.” 26 Pa wis nsaa kawa yǝ ti eɗ kaya yǝ madki, yǝ yauli pa yǝ fiɗ a maabiri isi.

27 Pa ɓeta nsaad ɓǝ ma ee ɓǝn wǝr mbu weɗara ɓa, ɓǝn kana ɗaaso ɓoso ɓǝn nkee me, “Unwa ndǝ nkamara fǝɗkǝra mbiu ma kwangto wau? Eɗ ɗa yǝn nkaa ya nkwaakǝ wis nsaa wa a maabiri ete ya yǝ fiɗi!” 28 Nok mbu Yeso sǝksǝ ɓa; ɓaa kura a put Galili wa nsaad.

Yeso yǝ roɓ rǝf Bitrus ya

29 Ɓǝ fiɗsǝ nok a hit kwau Yahudawa wa, pa ɓǝ kan a ɗuur Siman ma Andarawus wa ke ma Yakubu ma Yohanna. 30 Rǝf Siman toone nya, yǝ ɗuk a hantǝra ma songra, pa ɓǝ nkee Yeso mara siyo kara. 31 Pa yǝ ko a sani yaa ma neme yaa niki, songra kara a roɓo; yǝ nii yǝɓǝ tom tinima.

Yeso yǝ roɓ ɓeta dem

32 Ɗikira tomsǝ wa, ɓeta ɓaa sa wo ma ɓaa sem kwakwa ra ɓa dem, ma ɓeta dem ɓaa ma siyaa nsaamse sa. 33 Pa ɓet a ur siso ɓa nsaad ɓǝ kwau a inntii Bitrus ya, 34 pa Yeso yǝ roɓ ɓa sem kwakwa ra ɓa dem a siyaa ɓolɓol, yǝ hik nsaamse a maabiri ɓeta ya dem. Yǝ yau nsaamse kaya ɓǝ wil ee ra me ɓǝ maasǝn.

Yeso yǝ ko a kǝnara a han ɓeta semra ɓa

35 Naakǝn a ɗenda handa ntii, Yeso yǝ nii yǝ piɗ ya ko a han ɓeta semra ɓa; me yǝ tom kǝnara a Kaa ni kǝnso. 36 Pa Siman ma ɓa ɓǝsǝ ke ɓa; ɓǝ ko me ko ɓaa kǝrǝ, 37 ɓǝ wǝrsǝsǝ wa, ɓa nkee me, “Ai ɓeta nsaad ɓǝn kǝr ngǝn kǝrǝ.” 38 Yeso yǝ kak ya nkee me, “Sǝn ndoo a ura a wiiyo sa me konǝ ɓǝ nkee mara kwalarira kǝn, meen ǝn siso mbu wonǝsǝ ɓa.” 39 Yǝ ɓaɗ a put Galili wa nsaad, yǝn nkee mara kwalari ra a hitsa kwau Yahudawa sa, ɗǝm yǝn hik nsaamse a maabiri ɓeta ya.

Yeso yǝ roɓ yaa ma tǝmo ya

40 Eɗ ke ma tǝmo ^{▼▼Ɓaa Heleniyawa ɓa, ɓǝn yar yaa ma hunɗe a maabiri ya nsaad me eɗ ke ma tǝmo.} yǝ wo a Yeso ni yǝ kwirsǝ a nkwiiti yaa kǝna, yaa nkee me, “Me ngǝ yawan, kǝ ngǝ nǝ ti nǝ tom ɗekɗek.” 41 Pa Yeso nyora a taa yǝ mal nem isi yaa ntee eɗ kaya yǝ nkee me, “Nǝ yawan a tom ɗekɗek!” 42 Nok kǝnso tǝmo usu a faɗa yǝ roɓ ɗekɗek.

43 Yeso yaa ti pamra nok, yaa win ngwee. 44 “Yaa nkee me, “A sengge, ngǝ kong nkee mbu ɓa yaa ke ra. Pa ngo, ko ngǝ weɗa ee nwaago a kuɓ nek mbusa wa ni, ngǝ ɗǝm na mbu Musa nkeesǝ me a na ɓa, me ǝɓǝ weɗa me ngǝ roɓon.” 45 Ma nkee Yeso yǝ nkesǝsǝ wa nsaad eɗ kaya yǝ piɗ yǝn nkee ɓeta mbu tomsǝsǝ ɓa. Mbusa kwa Yeso yǝ kana urko a talte ra, yǝn kaɗ a han ɓeta semra ɓa. Hana maaso ɓeta dem ɓǝn wo a sani ura ɓol ɓol.