Mark 12

Mǝɗkǝra ma ɓan waa nyayo ɓa

1Pa Yeso yǝ faɗ wiiyo ma kanmǝra yǝn nkee ɓǝ mǝdkǝta yǝ nkee me, “Ate ke yǝ turkǝ emngwate inabi ma a nyaanyo usu, yǝ luu ma tǝute ya leurǝ nyaanyo siso, pa yǝ nsaa npoo ra nhem emngwate inabi ɓa, yǝ mar hitwaroo ɓoti ɓoti a ɗaaso nyaanyo wa. Pa yǝ na haya nyaayo kawa ɓaataka me ɓǝ waa, yǝ faɗ mbusa a urko. 2Fer ɗot emngwate inabi ma kansǝ wa, pa yǝ timi hoora ira a ɓan haya kaɓa ni me ɓaa paa usu emngwate inabi ma. 3Pa ɓan haya kaɓa, ɓaa maa, ɓaa hoɓɓo ɗǝm ɓaa tung yǝ faɗ nema sal. 4Pa yǝ ɓaarǝ yǝ timi hoora pera ra ɓol. Ɓǝ hoɓ eɗ sisi a ɗuura, ɗǝm ɓaa na kongsa. 5Ndiira maaso wa, yǝ timi ate ɓol ɗǝm, sase ma ɓaa toɗɗo. Yǝ timi ɓaata ɓol dem, pa ɓǝ hoɓ ɓaata, ɓaata ɗǝm ɓǝɓǝ toɗɗo,

6Waso pesǝ ete fin kiyaa timi wa, ǝn auwesi, yaa yǝn yausǝ ma sase ya, a feɗe feɗe yaa timi a ɓoni, yǝn nkee me, ‘Nǝ maan me ɓǝkǝ na mbarta auwane.’

7“Pa ɓan haya sǝɓa ɓǝ nkee ɓaatǝ me, ‘U nwa ndǝ sase an se kǝnaa ya. Sawo ndaa toɗɗo, kǝnaa usu a tom yau.’ 8Pa ɓaa maa ɓaa toɗɗo, ɓǝ muɗkǝ woɗɗa ira ma nkaara nyanyo ra.

9“Yeso yǝ taa me, “Pa waso an nyanyo siya kiyǝ tom mbiu? Kiyǝ wo yǝ toɗ ɓan haya nyaanyo sǝɓa, yǝ na haya nyaanyo siso ɓaata ka ɓol.” 10Sǝ pǝta kau mbu ɓa a likarkar Kaa wa rau? U yǝ nkeesǝ me,
“‘Ɗungara u ɓan mara ɓa ɓǝ mbisǝsǝ wa,
ǝn siso yǝ kangsǝ yaɓ a timra hito ra wa.’ 11U nwa ndǝ tomo Ankundi wa,
ɗǝm ǝn mbu nhiinyanhiinya ɓa a nuunwa sǝnda.’

12Pa ɓǝ kǝr ɗǝɗa ɓǝ kǝsa maa ra, me ɓǝ maan me yǝ nkee mǝɗkǝta sǝsa a ɗuura ɓora. Pa ɓǝn kura kokto ɓet ɓǝ kwausǝ dem sǝɓa. Me maaso ɓaa lee ɓǝ faɗ ɓoɓǝsa.

Pu samra wa

13Ndiira maaso wa, pa ɓaa timi ɓaa Farisiyawa ɓa ma ɓet Hiridus ɓa a Yeso ni, me ɓaa tǝraa a maatamse kiyaa nkee ɓa. 14Ɓǝ wo a sani ɓǝ nkee me,“Malǝm, tǝ maan me ngǝ yaa ma ɓongtǝra ya. Ngǝ sem ma yau ɗuura wa ra, me ngǝn too ɓeta nsaad keke. Ɗǝm ngǝn fǝɗkǝ ɗǝɗa Kaa ra ma ɓongtǝra. Ngǝn wǝr nga pamman me tǝ kwan samra Kaisar rǝu, ko tǝ kwan dau?”

15Ngǝn wǝr nga pamman me tǝ kwan samra Kaisar rǝu, ko tǝ kwan dau?” Pa Yeso yǝ maan me ɓǝn ɓaa ma ɗǝlmara raɓ ɓa, yǝɓǝ taa me, “Mbu kwaa mbi sǝn taasǝ me sǝnǝ tǝrau?” Sau nǝsǝ ma koɓaa sǝsa nǝ wǝrǝ.” ▼

▼Ən koɓa ɓaa Roma ɓǝn tomsǝ tinima ma siso wa.

16A nii ɓaa sa wo ma koɓaa kasa, pa yǝɓǝ taa me, “Ən sakankura yauni ra ma ɗǝm ɗǝnda yauni ra a sǝu?”

Ɓaa kak me, “Ən u Kaisar wa.”

17Pa Yeso yǝ ɓǝ nkee me, “Sǝ na Kaisar mbu Kaisar ɓa, ɗǝm sǝ na Kaa mbu kaɗsǝ me ǝn u Kaa ɓa wa.”

Pa ɓǝ tom mbu weɗara ɓa ma sase.

Taa mbuka a ɗuura niinyo a tina ra

18Pa ɓaa Sadukiyawa ɓa, ɓaa ɓǝ nkeesǝ me niiyo a tina wa samra ɓa, ɓǝ wo a Yeso ni, ɓaa taa me, 19“Malǝm, Musa yǝ nyortǝ me, me ete tii isi woɗ yǝ lee toone isi semma emɓa ra, tomon ɗaɗ koɓɓisi yǝ kon kiu kaya, me yǝ haa emba tii isi. 20Waso ɓaataka kǝn mbutu, ɓǝn tiiyaa ma koɓɓa. Yaa ntiiri ya, yǝ kon toone yǝ woɗɗo, yǝ lee em ka ra. 21Yaa raɓte ya, yǝ kon kiu kaya, ɗǝm sase ma yǝ woɗ kǝn, yǝ lee auwe ra. Tom maaso kǝn ma yaa taatǝnte ya. 22Nsaad ɓaa mbutu sǝɓa, yaake haa auwe ma sase ra. A feɗefeɗe toone kaya yǝ woɗ kǝn. 23Ya a kaa niinyo put taandi wa ɓa, toone sisi kǝyǝ kaɗ toone yamni ya a ɗaaso ɓaa mbutu sǝɓau? Me nsaad ɓaa mbutu sǝɓa, ɓǝ konsǝn.”

24Pa Yeso yǝɓǝ kak me, “Ai, sǝ nfaan, me sǝ maa mbu ɓaa nyorsǝ a likarkaraa Kaa wa ra, ɗǝm sǝ maa kwangto Kaa wa ra. 25Fer woɗte kaa nii wa, parata ɓǝ kon toona ra, toona ɗǝm ɓaa ɓǝ tung a kera ra, pa ɓǝkǝ kang nga ɓantimira Kaa a liura ɓa. 26Ya a ɗuura niinyo a tina wa ra, sǝ pǝta kauwo ɗaan a likarkar Musa wa, a ɗuura ara masǝ ɓot piti ɓa wa rau? Kaa yǝ nkeesǝ me, ‘Niina nǝ Kaa Ibrahim ya, Kaa Ishaku ya, ɗǝm Kaa Yakubu ya.’ 27Yǝn Kaa wote ɓa ra, yǝn Kaa ɓan ma huurtu ɓa. Sǝ tom kuɓ kwang teblǝra yan!”

Masaka faɗsǝ kwangto wa

28Pa eɗ fǝɗkǝra Musa ke wo yǝ kura ɓǝn na renǝta ɓaatǝ. Yǝ wǝrsǝ Yeso yǝ kak ɓǝn yaɓ wa, yaa taa, yǝ nkee me, “Ən masaka na wa faɗsǝ kwangto nsaad ɗǝu?”

29Yeso yǝ kak me, “U faɗsǝ kwang wa ǝn, ‘Sǝ kura saa ɓet Isra’ila ɓa, Ankundi Kaa ɓǝnda, Ankundi fin. 30A yau Ankundi Kaa ɓǝnga ma kuɗa nga nsaad, ma huurtu nwaango nsaad, ma senda nga nsaad, ma ɗǝm kokrokto nwaango nsaad.’ 31U ɓǝɗsǝ wa ma siso wa ǝn, ‘A yau anndǝnsaatǝre nyaange nga nkweerange.’ Masaka ko sem kǝn u faɗsǝ usu kwangto wara.”

32Pa malǝm masaka suwa yǝ nkee Yeso me, “Ngǝ nkeen keke malǝm, Ankundi fin, yaake ɗǝm semra ǝn sase fin. 33Aa yau ma kuɗa nga nsaad, ma senda nga nsaad, ma kokrokto nwaango nsaad ɗǝm ngǝ yau anndǝnsaatǝre nyaange nga nkweerange, u nwa faɗ hadaya nek mbusa wa ma hadaya haa nkweera wan.”

34Pa Yeso yǝ wǝrsǝ me yǝ kansǝ mara ma pǝro wa, yaa nkee me, “Ngǝ sem mǝbmǝb ma taa kuɓsutu Kaa wa ra.” Tǝng fer siso wa, yaake ɓaarǝ yaa taa mbuka ɗǝm ra.

Taa mbuka a ɗuura Almaseho ra

35A fer Yeso yǝsa fǝɗkǝra a taanda Hit ɓǝɗ Kaa Urshalima wa, pa yǝ taa me, “Tomtomni mallǝma Masaka Musa sa ɓǝn nkee me, Almaseho ǝn Au Dauda yau? 36Dauda ma nkweera ira, ma lau kwangto Wis Ɗekɗek wa, yǝ nkee me,
“‘Ankundi nkee Ankundi yaane me,
“A kaɗ a nem seya yaane
ndub me nǝ ti ɓaataker ɓǝnga
a faɗa natsa sǝngan.”’

37Dauda ma nkweera ira, yǝ yarsǝ me ‘Ankundi.’ Yaa kiyǝ tomtomni yǝ kaɗ au isiu?”

Ɓeta dem ɓǝn kura nepto mara Yeso ra.

38A fer yǝsa fǝɗkǝra wa, Yeso yǝ nkee me, “Sǝ nhii nwaa ma malǝmma Masaka Musa sa. Ɓǝn taa me ɓǝ siki ma lukta kwang kwangsa, me ɓeta ɓǝ too a lumaa, 39ɗǝm ɓǝn taa me ɓaa ɓǝ na hansǝ kaɗa u ma mbarta wa a hitsa kwau Yahudawa sa, ma hansǝ kaɗa wiina ɓa a han mbukamsa ɓa. 40Ən ɓosa ɓǝn kǝusǝ mbusa u toona ker ɓosa wodsǝ wa. Pa ɓǝn tom kǝnara palalang me ɓaa ɓǝ wǝrǝ. Ai ɓosa ɓaa kǝɓǝ kan kiita u ma kongsa wa.”

Koɓa kiu toone ya, yǝ nasǝ a hit Kaa Urshalima wa

41Pa Yeso yǝsǝ nɗa ngwang han nhii koɓa ɓa wa, yǝn sengge ɓaa ɓǝn nhiisǝ koɓa a mbu nhii koɓa ɓa. Ɓaataka ɓan kǝna ɓa ɓǝn nhii koɓa dem. 42Pa toone hanhanda ke u kerisi wodsǝwa, yǝ wo yǝ nhii koɓa ngeek isi sa nsaad.

43Pa Yeso yǝ yar emfǝɗkaa ɓǝsa, yǝɓǝ nkee me, “Ɓongtǝra, nǝn nkeesǝ, koɓa hanhanda toone kerisi wodsǝya, yǝ nhiisǝ a mbu nhii koɓa ɓa wa, faɗ u pepera ɓaata wan nsaad. 44Nsaad ɓǝ na a kǝna ɓǝsǝ ma siso wa, Pa usu yǝ na a hanhanto usu nsaad mbu yǝsǝ ma siso ɓa.”