Mar 13 | LlaSC | STEP | Nga Yeso yǝn fiɗ fiɗ hit ɓǝɗ Kaa Urshalima wa, pa fin a ɗaaso emfǝɗkaa ɓǝsa wa yaa nkee me, “Malǝm, A sengge!, Ɓaa marsǝ hito yaɓa ma ɗungate kwang kwang ya!”

Mark 13

Ooko Hit ɓǝɗ Kaa Urshalima wa

1 Nga Yeso yǝn fiɗ fiɗ hit ɓǝɗ Kaa Urshalima wa, pa fin a ɗaaso emfǝɗkaa ɓǝsa wa yaa nkee me, “Malǝm, A sengge!, Ɓaa marsǝ hito yaɓa ma ɗungate kwang kwang ya!”

2 Pa Yeso yaa nkee me, “Ngǝ wǝr nsaad hitsa kwang kwang ɓaa marsǝsa nǝu? Ɗungara kǝra fin a pee a hamɓa a ɗuura ate ra ra, ɓaa kǝ ookǝ a putu nsaad.”

3 Pa Yeso yǝsǝ nɗa a Yol Zaitun ra wa, u ǝn sengesǝ hit ɓǝɗ Kaa Urshalima wa, Pa Bitrus ma Yakubu ma Yohanna ma Andarawus ɓaa taa a nhuukǝra, ɓaa nkee me, 4 “Ətǝ nkee, mbu ɓa kǝ tom kamniu? Ən mbu nhiinyanhiinya mbi ka weɗa me mbusǝsa nsaad ɓǝ tomon ngwang ma kunggou?”

5 Pa Yeso yǝɓǝ nkee me, “Sǝ nhii nwaa tom atike yǝsǝ nlaa ra. 6 Me ɓeta dem kǝ wo a ɗǝnda na, ɓǝn nkee me, ‘Nǝn saase,’ ɗǝm ɓǝkǝ nlaa ɓeta dem. 7 Me sǝ kura kisa ma maatamse a ɗuura kisa ra ɓol ɓol, sǝ kong nik senta saa wa ra. Tomon ɗaɗ mbusǝsa a tomo, pa feɗefeɗe wo sundu ra. 8 Putu kǝ nik kito ma ate putu ya, ɗǝm kuɓsutu kǝ nik kito ma ate kuɓsutu ya. Ɓaa kǝ tom ɗoora ma nyaa putu wa a hantamse ɓol ɓol. Nsaad susu ǝn ntiiri kongsa wa kweɗ.

9 “Pa sǝ sengge yaɓ, me ɓǝ kǝsǝn ko a han kankiita ɓa, ɗǝm ɓǝsǝ hoɓ a hitsa kwau Yahudawa sa.Ɓǝ kǝ sǝ ti sǝ nǝɗ a wii a gwamnamse ni, ma kuɓsa a ɗuura na, me sǝ nkee mara kwalari ra a ɗuura a wii ɓoso. 10 Pa me mara kwalari ra Yeso tomon ɗat a nkee a put ntaandi wa. 11 Nsaad fer ɓǝ masǝsǝ ɓǝsǝn ko a hit kiita wa, sǝ kong taarǝ mbu kǝsa nkee ɓa ra me sǝ kon. Sǝ nkee nsaad mbu wosǝsǝ a ee ɓa, me sem sase sǝn kansǝ wa ra, ǝn Wis Kaa wa.

12 “Tii kiya na koɓe ɓaa toɗɗo, ɗǝm paapa kiya na au isi, emba ɓǝkǝ nik senta paapamse ɓose, ɗǝm ɓǝ na ɓaa ɓǝ toɗɗo. 13 Ɓeta nsaad ɓǝ kǝsǝ ɓisi me a ɗǝnda na, pa yaa yǝ nǝɗsǝ kwakwa a ko a feɗefeɗe ya, kiyǝ taa kon nkweera wa.”

14 “Me sǝ wǝr tinima rumta ma, u yǝn wosǝ ma tǝblǝ ra wa, yǝ kǝɗ a ham pam ra ɓa (yaa yǝn kausǝn kau ya, a lee yǝ maa) ɓaa ɓǝsa put ɓaa Yahudiya ɓa ɓǝ mon ɓǝ taa yolo, 15 a fer siso, a lee ɓaa ɓǝsǝ a put Yahudiya ɓa, ɓǝ mon ɓǝ taa a yola. 16 Yaa yǝsǝ nyaa nya, yǝ kang ɗuur hana yǝ kana me koyǝ too laulawara ira ra. 17 Mbu manyamanyato ɓa, a toona ɓaa ma kuti ɓa, ma ɓan na toota ɓa a fer usu. 18 Sǝ tom kǝnara me fer siso ǝn wo a fer raraa wa ra. 19 A fer siso ɓaa kǝ tom kongsa dem, u ɓaa pǝta tomo kamǝra ira ra tǝng Kaa marsǝ put ntaandi wa ɓa, a wo nga naa wa, ɗǝm ɓaa ɓaarǝ a tom kamǝra sǝra ra. 20 Me ka sem me ɓaa nɗǝm tǝro mbul ra, kama atike yǝ nɗanyǝ ra, pa me ɓaa tausǝ ɓa, u yǝ tausǝ wa, ǝn siso yǝ nɗǝm tǝro ka wa wa. 21 A fer siso me yaake nkee ngǝ me, ‘Sǝ sengge, Almaseho yǝ nwa,’ hana ‘yǝ sengge,’ sǝ na ɓongto ra. 22 Me Almaseho para sa, ma ɓannawanto para ɓa, ɓǝkǝ wo ɓǝ tom mbusa nhiinyanhiinya u weɗara wa, me ɓǝ nlaa ɓeta hana ma ɓet ɓaa tau ɓǝsǝ ɓa, me kǝ tomo. 23 Me maaso, sǝ sengge! Nǝ nkeesǝ mbusǝsǝ naakǝn si ntii sundura.

24 “Pa a ndiira tǝromse u wee kongsa siso wa,
“‘kaa kǝ kang tebteb,
ofe ɗǝm yǝ too handa ɗekɗek ra,
25 seklǝmeta a liura ta kǝ roo a putu,
ɗǝm ɓaa kǝ nyaa mbu kwang kwang a liura ɓa.’

26 “Pa fer siso ɓeta kǝ wǝr Au Ete ya, yǝn hamham a liuta ma kwangto dem ma too. 27 Ɗǝm kǝ yǝ tung ɓantimira ɓisa, ɓǝ kwau ɓet ɓǝsa u yǝ tausǝ ɓa, fiɗaa ɓotira ma kundara, ma seyara ma kwasara u put ntaandi wa nsaad.

28 “Sǝ fǝɗkǝ mbuka a ɓot sata ɓa. Me sǝ wǝr ɓǝn ntii tom nwaama nwa, sǝ maa me raara kanan ngwang. 29 Pa maaso ɗǝm me sǝ wǝr mbu ɓan nsaad, sǝ maa me tomon ngwang, yǝ kǝk ma inntii. 30 Nǝn nkeesǝ ɓongtǝra, ɓaa kaareyase ɓa, a talǝra ndub me mbu ɓa nsaad wo tomon. 31 Liura ma put ntaandi wa, kǝ talǝ pa mara na a pǝta talo ra.

Yaake sem kǝn yǝ masǝ kaa Yeso kiya wo ɓa ra

32 “Pa yaake sem kǝn yǝ maasǝ fersiso ma kaa ɓisa wa ra, hana ɓantimira a liura ɓa, hanan Au kaya ra, pa ǝn Paapa fin maɗ. 33 Sǝ sengge! Sǝ kaɗ ma waro! Me sǝ ma kaa kiya wo ɓa ra. 34 Yǝ nga ete yaa kiyǝ tom siko ya, me yǝ nii sikon, yǝn lee ɗuur usu a nema hoota ita nii, hana yamni ma mbu kiya tom ɓa, ɗǝm yǝ nkee an war taanda ya me, yǝ kaɗ ma waro.

35 “Me maaso, sǝ tom a waroo, me sǝ maa a kaa antaanda ya kiya kang wara. Me kiya nkaa ya wo hana a pǝrta hana a ɗenda hana osa ɓee hana ɗikira. 36 Pa me yǝ wo maa semra sǝ yau wo yǝsǝ taa saa mundara. 37 Mbu nǝn nkeesǝ ɓa, nǝn nkee hana yamni, sǝ kaɗ ma ‘Waro!’”