Mar 7 | LlaSC | STEP | Ɓaa Farisiyawa ɓa ma ɓaata malǝmaa fǝɗkǝra masaka sa, ɓǝ fiɗ Urshalima ɓǝ kwau a Yeso ni,

Mark 7

Mbu ɗekɗek ɓa ma mbu sem ɗekɗek ra ɓa

1 Ɓaa Farisiyawa ɓa ma ɓaata malǝmaa fǝɗkǝra masaka sa, ɓǝ fiɗ Urshalima ɓǝ kwau a Yeso ni, 2 pa ɓǝ sengge ɓǝ wǝr ɓaata emfǝɗkaa Yeso ɓa ɓǝn se mbuseya ɓǝ “sob nema nga Farisiyawa nkeesǝ me a tom wa ra,” 3 Ɓaa Farisiyawa ɓa ma ɓaa Yahudawa ɓa ɓǝ se mbuseya ra, me ɓǝ sob nemara meen fǝɗkǝra mbu wiina ɓosa ɓǝn tomsǝ ɓa. 4 Me ɓǝ fiɗ a lumu ɓǝ wo ɓǝn so nhe pa ɓǝ se mbuseya. Mbu ɓǝn tomsǝ ɗǝm nga sobɓo nkwaa wa, ma huna.

5 Pa ɓaa Farisiyawa ɓa ma ɓaata malǝmaa fǝɗkǝra masaka sa, ɓǝ taa Yeso me, “Tomtomni emfǝɗkaa ɓǝnga ɓǝ ɓǝɗaa mbu wiina ɓǝnda nkeesǝ me ǝn tom ra ɓau? Ɓǝn se mbuseya nema ɓosa sem ɗekɗek ra.”

6 Pa yǝɓǝ kak me, “Saa ɓaa ma ɗǝlmara raɓ ɓa, tomon keke Ishaya yǝ nasǝ wanto a ɗuura saa wa me, nga ɓaa nyorsǝ wa me,
“‘Ɓet ɓaa ɓǝn nanǝ mbarta ma tǝrmǝta ɓota maɗ,
pa senta ɓota mǝbmǝb ma niina.
7 Ɓǝn nyoo nǝ sal,
fǝɗkǝta ɓota ǝn masaka ɓeta wa maɗ.’

8 Sǝ mudkǝ mbu Kaa yǝ nkeesǝ me a tom ɓa, sǝn ɓǝɗ fǝɗkǝra ɓeta ra ɓǝ nkeesǝ ɓa.”

9 Pa yǝɓǝ nkee me, “Ɓongtǝra sǝn nkaa sǝ muɗkǝ mbu Kaa nkeesǝ ɓa, me sǝ ɓǝɗ mbu wiina ɓǝsaa nkeesǝsǝ ɓa. 10 Me Musa yǝ nkee me, ‘A na mbarta paange ma maange,’ ɗǝm, ‘hana yamni yaa yǝ sǝrsǝ pap ɓisi hana maasi ya, aa toɗɗo.’ 11 Pa saase sǝn nkee me, ‘Hana yamni yǝ nkee pap ɓisi hana maasi me, ‘‘Nsaad mbu kama kǝsaa taa a nani ɓa, nǝ na Kaan.’’ 12 Me maaso, saa lee yǝ tom mbukake pap ɓisi hana maasi ra. 13 Me maaso, sǝ muɗkǝ mara Kaa ran, me sǝ ɓǝɗ mbu wiina ɓǝsaa nkeesǝsǝ ɓa, u sǝn fǝɗkǝsǝ emɓǝsaa katakata wa.

Mbuka kwa ɓeta ɓǝ kat ɓa sem ɗekɗek ra a wii Kaa wa ɓa

14 Pa Yeso yǝ yar ɓet kwausǝ dem ɓa a sani yǝ ɓǝ nkee me, “Sǝ pira ngwee nsaad, ɗǝm sǝ maa u nwa. 15 – 16 Sem mbu fiɗsǝ ntaandi a kan a ete ni ɓa, ǝn kwasǝ ete yǝ tom ‘sem ɗekɗek ra’ wa, pa mbu ǝn fiɗsǝ a ete ni ɓa, ǝn siso ǝn kwasǝsǝ yǝ tom ‘sem ɗekɗek ra’ wa.” ^{▼▼Ɓaata ɓan nyorma ɓa ɓǝ nyor mbu me, yaa yǝsǝ ma ngwee kuraya, a lee yǝ kura.}

17 Ndiira Yeso yǝ pedsǝ ma ɓet kwausǝ ɓa wa, pa yǝ kana taanda, emfǝɗkaa ɓǝsa ɓa taa ɗaanto mǝɗkǝra sǝra wa. 18 Yǝ kak ya nkee me, “Nding waso maa rau? Sǝ maa me, sem mbu fiɗsǝ ntaandi a kana ete ni ɓa, ǝn kwasǝ yǝ tom sem ɗekɗek ra wa rau? 19 Me sem a seura ira ǝn kansǝ wa ra, pa a kuɗa ira, ɗǝm pa a fiɗ a maabiri isi.” (Yǝn nkeesǝ maaso wa, Yeso yǝ weɗa me mbuseya nsaad “ɗekɗek.”)

20 Pa Yeso yǝ nkee me, “Mbun fiɗsǝ a ete ni ɓa, ǝn siso ǝn tisǝsǝ ete yǝ tom ‘sem ɗekɗek ra’ wa. 21 Me mbu ǝn fiɗsǝ ɗaan a seura ɓeta ra ɓa, ǝn senta kwalakwala ta, ma pepeto, ma tang mbusa wa, ma toɗ ete wa, ma tǝr toone ete wa, 22 ma yau ɗuura wa, ma kwanatiro, ma rǝǝ ɓeta wa, ma ɗeura toona ra, ma simɓara, ma tǝblǝ ɗǝnda ɓeta wa, ma too ɗuura wa, ɗǝm ma hautǝma. 23 Nsaad mbu ɓa, ǝn fiɗ ɗaan a kuɗa, ɗǝm ǝn siso kwasǝ ete yǝ tom ‘sem ɗekɗek ra’ wa.”

Naa ɓongtǝra toone kewa

24 Yeso yǝ nii yǝ lee hansǝsa yǝ ko a put Taya ma Sidon. Yǝ kana a ɗuur ko, yǝ yau me ɓeta ɓǝ ma me yǝ kǝnso ra, hana maaso yǝ nkaa yǝ nfaara. 25 Nok kǝnso pa tooneke u autoone si yǝ ma siyo wis tenatena wa yǝ kura me Yeso yǝ won kǝnson, yǝ wo ya wii a wiiyo a sani. 26 Toone Baheleniya, a put Finikiya wa ɓa haasǝ kǝnso, a put Suriya wa. Pa yǝ kǝna Yeso me yǝ hik siyo nsaawa a auwesi ni.

27 Yeso yaa nkee me, “A lee emba ɓǝ se ɓǝ kwee nhe, pam me a too nkaadǝng emba wa, a na empaa ra.”

28 Pa toone kaya yaa kak, yaa nkee me, “Ee nwa, Ankundi, pa hana empaa ɓǝn se nyǝwǝrta u rosǝ a ham se mbuseya emba ɓa.”

29 Pa ya nkee me, “Me mbu ngǝ kaksǝ sǝsǝ, ngo ɗuuru, wis nsaa suwa lee auwangen.”

30 Pa yǝ kang ɗuuru ko yǝ wo auwesi ɗunk a hantǝra, wis nsaa suwa leesǝn.

Yeso yǝ roɓa ya kanara ya

31 Pa Yeso yǝ fiɗ a put Taya wa, yǝ ɓǝɗ ma lau Sidon wa yǝ ko ma lau aulaara Galili wa yǝ ko a put kwang ma ura puu sa lau Dikafolis wa 32 Kǝnso ɓa sa wo ma ate ke yǝ kurara, yǝn kan ma kongsa. Ɓaa kǝna me ya ntee eɗ ɗa kaya me yǝ roɓo.

33 Yeso yǝ wiin eɗ ɗa kaya kala han yake semra ɓa, pa yǝ tung wasa isa a ngweeme isi, yaa nem mesa, a ntee ɗǝlmara ira ma mesa. 34 Pa yǝ nik ɗuura ira ɓoti yǝ henmǝ kwang, ya nkee me “Iffata!” Yǝn nkee me “A Kura!” 35 Yǝ nkeesǝ maaso wa ngweeme eɗ ɗa kaya ya a wili, mbu ka kaasǝ ɗǝlmara ira ma a kee, pa yǝ ntii kanmǝra kwalari.

36 Yeso yǝ wiin ɓǝ ngwee me ɓǝ nkee yaake mbu tomsǝ ɓa ra, yǝn saa ɓǝsǝ wa ɓosa ɗǝm ɓǝ toma nkee mara ira wa. 37 Ɓeta ɓǝ kung ma nhiinyanhiinya to, ɓǝ nkee me, “Yǝ tom mbusan yaɓ, yǝ tii ɓa kaɓǝ kwaata ɓa ɓǝn kura ɓaa ɓǝn kanara ɓa ɓǝn kana.”