Mar 9 | LlaSC | STEP | Pa yǝɓǝ nkee me, Nǝn nkeesǝ ɓongtǝra, ɓaataka kǝn kǝɗ kǝɗ a han ɓa, ɓǝ pǝta woɗɗa ra, ndub me ɓǝ wǝr kuɓsutu Kaa wa, wo ma kwangton.”

Mark 9

1 Pa yǝɓǝ nkee me, Nǝn nkeesǝ ɓongtǝra, ɓaataka kǝn kǝɗ kǝɗ a han ɓa, ɓǝ pǝta woɗɗa ra, ndub me ɓǝ wǝr kuɓsutu Kaa wa, wo ma kwangton.”

Paakira maabiri Yeso ra

2 Ndiira tǝro mindike wa, Yeso yǝ too Bitrus ma Yakubu ma Yohanna yǝ ɓǝn taa a yolko ɓoti a han ɓǝ kaɗsǝ seɗe ɓobɓǝsa ɓa. Ɓǝ kǝnso ɓǝ wo maabiri isi paakin a wii ɓoso. 3 Lukta isa a paaki pengpeng ǝn too handa u hana yaake yǝ nkaa yǝ sob a piɗ nga usu a put ntaadiwa ra. 4 Pa ɓǝ wǝr Musa ma Iliya a wii ɓoso, ɓǝn kankan ma Yeso.

5 Pa Bitrus yǝ nkee Yeso me, “Mallǝm, tomon yaɓ ndǝsa a ham ɓa wa, a lee ndǝ werkǝ pilang taatǝn, fin nwaango, fin u Musa wa, fin ɗǝm u Iliya wa.” 6 Yǝ maa mbu yǝn nkeesǝ ɓa ra, me sase ma ɓaata emfǝɗkaa ɓǝ kura kokton kwang.

7 Pa liuta a fiɗ ɓǝ liki, pa ɓǝ kura kwaro fiɗ a liuta yǝn nkee me, “U nwa ndǝ Auwane, yaa nǝn yausǝsǝ ya, saa kura.”

8 Pa nok kǝnso ɓǝ sengǝ ɓǝ wǝr yaake ɗǝm ra, meen Yeso ma ɓosa ra.

9 Ɓǝn hamsǝn ham a yol kawa wa, pa Yeso yǝɓǝ wiin ngwee me ɓǝ nkee yaake mbu ɓǝ wǝrsǝ ɓa ra. Ɓǝ lee me Au Ete ya yǝ niin a tina nhe. 10 Mee maaso ɓǝ lee mara sǝra, ɓǝn taa ɓaatǝ me si Yeso yǝn sen mbi me, “Nii a tiina wau?.”

11 Pa ɓaa taa me, “Yaa tomtomni malǝmmaa masaka sa nkeesǝ me Iliya kiya nkaa wo saseu?”

12 Yeso yǝ kak me, “Maaso ɓongtǝra Iliya kǝ yǝ wo, ɗǝm kiya werkǝ mbusa nsaad. Pa maaso ɗǝm ɓaa nyor me Au Ete ya kiya wee kongsa ɓolɓol, ɓaa ka ɓisi? 13 Pa nǝn nkeesǝ me, Iliya yǝ wee won, pa ɓǝ tomsǝ nsaad mbu ɓǝn yausǝ ɓa, nga ɓa nyorsǝ me kǝ tom a ɗuura ira wa.”

Yeso yǝ roɓ au ma wis nsaamse ya

14 Ɓǝ wosǝ a han ɓaata emfǝɗkaa ɓa wa ɓǝ wǝr ɓeta kwausǝ dem leurǝ ɓǝsǝ malǝma fǝɗkǝra Musa sa ɓaa rǝkata ma ɓosa. 15 Ɓǝ wǝrsǝ Yeso wa nsaad ɓaa ɓǝsǝ kǝnso ɓa ɓǝ wǝr nhiinyanhiinya to, ɓǝ nii ma mone koɓa kaɗɗa ɓa too.

16 Yeso yǝ taa malǝmma masaka sa me, “Sǝn tom renǝta mbi ma emfǝɗkaa ɓǝnau?” 17 Pa atike a ɗaaso ɓaa ɓǝ kwausǝ ɓa, yaa kak me, “Malǝm nǝ wosǝ ma auwane u yǝsǝ ma wis nsaa wa ǝn tisǝ yǝ nkaa yǝ kanda. 18 Me siyo nisǝn ǝn fang sǝ a putu. Yǝn hik mɓukmɓuka ka a ee isi, yǝn rimbi ɗǝmta ita, maabiri isi ɗǝm yǝ mal kwakwa. Nǝ nkee emfǝɗkaa ɓǝnga me ɓaa hiki pa ɓǝ nkaa ra.”

19 Yeso yǝ kak me, “Saa ɓaa kaareyase ɓa, ɓaa semma na ɓongto ra ɓa, tǝro miniu kǝnǝ kaɗ ma saaseu? Kǝnǝ sǝm ma saase tǝro miniu? Nga woma au sisi a ham ɓa.”

20 Pa ɓaa sa wo ma au kaya. Wis nsaa kawa yǝ wǝrsǝ Yeso wa, nok kǝnso yǝ hob au ka ya, mabiri isi a madki, yǝ wii a putu yǝn kwǝlfǝr kwǝlfǝrǝ, ee isi ǝn piɗ mbukmbuka. 21 Pa Yeso yǝ taa pap au sisi ya, “Siyo wa ntiisǝ kau niu?”

Pabsi ya nkee me, “Ntiisǝ sa yǝ auwe nhun” 22 “Ən munkǝsǝ a ara, ka fera ɗaan a mbraa me yaa toɗɗo. Pa me kǝngǝ nkaa ngǝ tom mbuka, a kura nyorataara taa ngǝtǝ kwasi.”

23 Yeso yaa nkee me, “Tomtomni ngǝn taasǝ me mee kǝnǝ nkaau? Ai mbu nsaad ɓa kǝ tomo a yaayǝ nasǝ ɓongtǝra ya.”

24 Nok kǝnso pap au kaya ya yǝ nik kwaro yaa nkee me, “Nǝ na ɓongtǝran, ǝnǝ kwasi nǝ soko na ɓongtǝra wa!”

25 Yeso yǝ wǝrsǝ ɓeta ɓǝn wowo ma mone wa, pa yǝ kwaakǝ nsaa suwa yaa nkee me, “Ngase wis ngǝn tisǝ au ya yǝ nkaa yǝ kanda suwa, nǝn nkee ngǝ a piɗ a maabiri isi, ngǝ ɓaarǝ ngǝ kana a sani ɗǝm ra.”

26 Wis nsaa suwa yǝ pommo, yǝ ɓǝngtǝng au kaya dem, pa yǝ pidi. Au kaya yǝ tǝr nga yǝ wodɗon, ɓeta dem ɓǝn nkee me, “Yǝ wodɗon,” 27 Pa Yeso yǝ ma nem isi yǝ niki au kaya ya nii kǝɗ.

28 Ndiira Yeso yǝ kansǝ ɗaan a ɗuur siso wa, emfǝɗkaa ɓǝsa ɓaa taa a nhukura, ɓǝ nkee me, “Tomtomni tǝ nkaa tǝ hik rau?”

29 Yeso yǝ kak yǝ nkee me, “Kamǝra wis nsaamse sǝra yǝ fiɗa ra me sem ma kǝnara Kaa ra ra.”

Yeso yǝ ɓaarǝ yǝ nkee mara wodɗa ira ra.

30 Pa Yeso ma emfǝɗkaa ɓǝsa ɓǝ lee hansǝsǝ, ɓǝ faɗ wiyo ma siko, ɓǝ ɓaa ma lau Galili wa. Yeso yǝ yau me yaake yǝ maa han ɓǝsǝ ɓa ra, 31 me yǝn fǝɗkǝ emfǝɗkaa ɓǝsa me, “Ɓaa kǝ fang Au Ete ya a nema ɓeta sa, ɓǝ ka toɗɗo, ɗǝm ndiira tǝro taatǝn wa, kiyǝ nii.” 32 Pa ɓǝ maa mbu yǝn nkeesǝ ɓa ra, ɓǝ ɗǝm kura kokto ɓǝkǝsǝ taa wa.

Yaa yǝ faɗ kwangto niu?

33 Pa ɓǝ kan Kafarnahum. Ndiira kansǝ ɗuur wa, pa Yeso yǝ taa emfǝɗkaa ɓǝsa yǝ ɓǝ nkee me, “Sǝ na renǝta ɓaatǝ a mbi a ɗǝɗau?” 34 Pa ɓǝ roo seu me a ɗǝɗa ka ɓǝ na renǝta me ya kiya tom yaa kwang a ɗaaso ɓoso niu.

35 Pa Yeso yǝsǝ ɗaa wa, yǝ yar ɓaa puu nhaa raɓ sǝɓa, yǝɓǝ nkee me, “Hana yamni yaa yǝn taasǝ me yǝ kaɗ yaa ntiiri ya, tomon ɗaɗ, yǝ tom yaa ndiira ya, ɗǝm yǝ kaɗ hoora ɓeta ra nsaad.” 36 Pa yǝ too auke ngeek, yaa ti kǝɗ a ɗaaso ɓoso, pa yaa ti nem isi a nkora au kaya ra, yǝɓǝ nkee me, 37 “Nsaad yaa yǝ nkeesǝ kwaata fin a ɗaaso em ngeek ngeek nga u nwa, me ɗǝnda na ya, yǝ nkee a niina. Nsaad yaa yǝ nkee nǝsǝ nkwaata ya ɗǝm, yǝ nkee niina ra, yǝn nkee yaa tungnǝsǝ ya.”

Yaa yǝ nhaanda nuura ya ndǝ ke

38 Pa Yohanna yaa nkee me, “Malǝm, tǝ wǝr ate ke yǝn hik wis nsaa wa ma ɗǝnda nga, ta saa, me yǝ sem a ɗaaso waado ra.”

39 Pa Yeso yǝ nkee me, “Sǝn saa ra, Ai yaake yǝ nkaa yǝ tom mbu nhiinyanhiinya ɓa a ɗǝnda na pa yǝ kan maa ra kwalakwala a ɗuura na nok ra, 40 ai nsaad yaa yǝ nhaaɗa nuura ya ǝn yau. 41 Nǝn nkeesǝ ɓongtǝra, nsaad yaa yǝ nasǝsǝ nkoo wee mbraa fin a ɗǝnda na ya, me sǝ ke ma Almaseho, yǝ pǝta ntaa nsaa usu ra.

Mbu kwiɗ kwiɗ ɓa

42 “Pa yaa yǝ kwaasǝ fin a ɗaaso em ngeek ngeek ɓa ya, u ɓǝ nasǝ ɓongto a nanii wa, ɓǝ tom tenatenato ɓa, para a sanii ɓaa kaa ɗungara nsoo numu ra a nkweera ira, ɓaa muɗkǝ a aulaara ɗaan. 43 – 44 Me nem nyaange kwaa ngǝ ngǝ tom tenatenato, a nɗǝm ngǝ muɗkǝ ndiira. Kǝ ngǝ tom yaɓ ngǝ kan a ham huurtu ɓa pura, ma u kǝ nga tom ma nema sǝngga raɓ, pa ɓaa ngǝ tung a ara ya, han ara a nkaa a loo ra wa. ^{▼▼Ɓaata ɓan nyora ntiiri ɓa ɓǝ nyor me, ara kaɓa ɓǝ woɗɗa ra, ɗǝm ara ka ɓa loo a ra.}” 45 – 46 Ɗǝm me nat ɓǝnga kwaa ngǝ ngǝ tom tenatenato, a nɗǝm ngǝ muɗkǝ ndiira. Kǝ ngǝ tom yaɓ ngǝ kan a ham huurtu ɓa pura, ma u kǝ nga tom ma natsa sǝngga raɓ, pa ɓaa ngǝ tung a ara ya. ^{▼▼Ɓaata ɓan nyora ntiiri ɓa ɓǝ nyor me, “Nraa kasa ɓǝ wodɗara ɗǝm ar kaɓa loora.”} 47 Ɗǝm me nuu nwaango ǝn kwaa ngǝ ngǝ tom tenatenato, a hik ndiira. Para ngǝ kan a kuɓsutu Kaa wa ma nuu fin, ma u kǝ ngǝ tom ma nuunwa raɓ, pa ɓaa ngǝ muɗkǝ a ara wa. 48 Kǝnso
“‘Nraa wodɗa ra,
Han ka ɓa ar sǝsa nkaa a loora,’ 49 Hana yamni ɓaa ka pǝta ma ar kongsa ɓa.

50 “Tuma ǝn mbu yaɓ ɓa, pa me yǝ ɓaa ma songsongto usun, kǝ ngǝ werkǝ mini ya tom songsong ɗǝmǝu? Sǝ tom nga tuma a ɗaaso waso, sǝ kaɗ keke ma ɓaatǝ.”