Matthew 11

Yeso ma Yohanna an tom baptisma nya

1A ndiira Yeso yǝ feɗsǝ nkee emfǝɗkaa ɓisa pu nhaa raɓ sǝɓa wa, pa yǝ faɗ a wiiyo yǝn fǝɗkǝ, ɗǝm yǝn nkee mara kwalari ra a ura Galili sa. 2Pa Yohanna yǝsǝ a hit neu ɓeta wa ɓa, yǝ kura mbu Almaseho yǝn tomsǝ ɓa, yǝ timi emfǝɗkaa ɓisa, 3ɓaa taa me, “Ngǝn yaa kiyaa wo yau, ko tǝ war atike ɓolǝu?” 4Yeso yǝ kak me, “Sǝ kang kosǝ nkee Yohanna mbu sǝ kura sǝ ɓa, ma ɗǝm mbu sǝ wǝrsǝ ɓa. 5Ntaata ɓǝn wǝrǝ, ɓaa natsa sǝrsǝ ɓa ɗǝm ɓǝn siki, ɓaa ɓǝsǝ ma siyo tǝmo ɓa, ɓǝ roɓɓon, kwaata ɓǝn kura, ɓaa ɓǝ woɗsǝ ɓa ɗǝm ɓǝ niin, ɗǝm ɓan nkee mara kwalari ra hanhanta. 6Saltǝra kaɗan a ɗuura yaa yǝ pǝn ma niina ra ya.”

7Pa emfǝɗkaa Yohanna ɓa leesǝ hansǝsǝ wa, Yeso yǝ ntii nkee mara ɓaa kwausǝ dem ɓa a ɗuura Yohannan ra me, “Sǝ ko a sanglo me kosǝ sengge mbiu? Kiyaa falang falang u yoro ǝn nyaasǝ wau? 8Me sem maaso ra, yaa sǝ ko me kosǝ sengge mbiu? Atike tung luktaa kwalari wau? Awo, ɓaa ɓǝn tungsǝ luktaa kwalari ɓa, ɓaa taanta kuɓsa ta. 9Pa sǝ ko me kosǝ sengge mbiu? An nawanto keu? Ee nwa. Nǝn nkeesǝ me, yǝ faɗ an nawanto yan. 10U nwa ǝn sase yaa ɓaa nyorsǝ a ɗuura ira ya me,
“‘Kǝnǝ timi an timira yaane a wii nwaango ya,
yaa kiya sǝk ɗǝɗa men wo nwaango ya.’

11Nǝn nkeesǝ ɓongtǝrato, a ɗaaso ɓaa toona haa ɓǝsǝ nsaad ɓa, atike sem kǝn kiya faɗ Yohanna an tom baptisma ya ra. Hana maaso, yaa yǝsǝ ngeek a kuɓsutu a liura ya yǝ faɗsǝn. 12Tǝng kaare Yohanna an tom baptisma ya a wo naawa, kuɓsutu a liura wa ǝn wee kongsa, ɓaa ɓǝn nasǝ kongsa ɓa, ǝn ɓosa ɓǝn yausǝ me ɓǝ kon kuɓsutu kawa ma kokrokto. 13Me nsaad ɓannawanto ɓa ma Masaka Musa wa, ɓǝ nawaanton, pa a wo a ɗuura Yohanna ra. 14Pa me kǝsǝ yau ma mbu ɓǝ nkeesǝ ɓan, Yaa Yohanna ǝn sase Iliya kiya wo ya. 15Yaa yǝsǝ ma ngwee kura kura ya, a lee yǝ kura.

16“Kǝ nǝ mǝɗkǝ kaare ya ma mbiu? Ɓǝ nga emba kaɗsǝ a ham lumu ɓa, ɓǝn yar ɓaata ɓǝn nkee me,
17“‘Tǝ hursǝ tilo,
pa sǝ hirhira ra.
Tǝ kǝɗ pin ngwomra wan,
ɗǝm pa sǝ taarǝ ra.’

18Me Yohanna yǝ wo yǝ seyaa ra, yǝ weeyaa ra, pa ɓǝ nkee me, ‘Yǝ ma wis nsaamse wa.’ 19Au Ete ya, yǝ wo yǝn se yǝn wee, pa ɓǝ nkee me, ‘Eɗ ɗa yǝn se kwang, ɗǝm yǝn wee mbusa kwang, yǝn sik ɓan kon samra ɓa ya, ma “ɓan tentenato ɓa.”’ Pa maa mbuka wa weɗa me u yǝsǝ keke ma lau tinima ima wa.”

Ɓaa nkwaakǝ ura ɓǝ kon nfaata ra ɓa

20Pa Yeso yǝ ntii nkwaakǝ ura u yǝ tomsǝ mbu nhiinyanhiinya ɓa, pa ɓǝ kon nfaata ra wa. 21Yǝ nkee me, “Saase ɓet Korasin ɓa, ǝn mbu manyamanyato ɓa a sani. Saa ɓet Betsaida ɓa, ǝn mbu mayamaya ɓa a saani. Me ka mbu nhiinyanhiinya ɓaa tomsǝ a saani ɓan, ɓaa ka tom a ɓet Taya ɓa ma ɓet Sidon ɓa nǝn, kama ɓǝ kon nfaatan tangtang, ɓǝ tung tuksukta ɓaa puk arma a maabiri ɓose nǝn. 22Pa nǝn nkeesǝ, para ɓet Sidon ɓa ma ɓet Taya ɓa, a kaa kankiita ɓa ma saase. 23Pa saase ɓet Kafarnahum ɓa, ɓaa kǝsǝ too ɓoti a liurau? Sem ra, ɓaa kǝsǝ munkǝ a Hades. ▼

▼Ham woote ɓǝn kaɗsǝ ɓa.

Me ka mbu nhiinyanhiinya ɓa tomsǝ a saani ɓan, ɓaa ka tom a ɓet Sidon ɓa nǝn, kama yǝ nding nga naawa. 24Pa nǝn nkeesǝ, para ɓet Sidon ɓa ma ɓet Taya ɓa, a kaa kankiita ɓa ma saase.”

Sau a nani me sǝ taa nwiinyo

25A fer siso Yeso yǝ nkee me, “Paapa, Ankundi a liura ma putu ya, nǝn nyoo ngǝ, me ngǝ nhuukǝ mbu ɓa, ɓaa ɓǝ weesǝ nuuwa ɓa, ma ɓaa ɓǝ maasǝ mbuka ɓa, pa ngǝ weɗa a em ngeek ngeek ɓa ni. 26Ee nwa, Paapa, mbu ɓa ǝn mbu tom ngǝsǝ yaɓ me ngǝ tom ɓa.

27“Mbusa nsaad Paane yǝ nanǝn. Yaake yǝ maa Au kaya ra ndub Paapa, ɗǝm yaake yǝ maa Paapa ra ndub Au kaya, ma ɓaa Au kaya yǝ tau ɓǝsǝ me kiyaa weɗa ɓa.

28“Sau a nani, saa ɓaa sǝsǝ ma kongsa ma lǝko ɓa, kǝ nǝsǝ ti sǝ nwii. 29Sǝ na ɗuura saa nga naa yǝn nasǝ nkweera ira a kaa ɓota yaa mor nyaanyo wa, sǝ fǝɗkǝ a nani, me nǝn an kura handa ya, nǝn yaa yǝn toosǝ ɗuura ira ya ra, kǝsǝ taa nwiinyo a huurtu waaso. 30Me ɓot mor nyaa nwaano wa paapaa, ɗǝm lǝk nwaano sem lǝklǝk ra.”