Mat 13 | LlaSC | STEP | A kaa sǝsa, Yeso yǝ fiɗ a ɗur kawa, yǝ ko yǝ kaɗ a kira aulaara Galili ra.

Matthew 13

Mǝɗkǝra a ɗuura an kabira ya

1 A kaa sǝsa, Yeso yǝ fiɗ a ɗur kawa, yǝ ko yǝ kaɗ a kira aulaara Galili ra. 2 Ɓeta dem ɓǝ kwausǝ a sanii wa, pa meen siso kwaasǝ yǝ kana kurnyaamo, yǝ kaɗ ɗaan, ɓeta ɗǝm ɓǝ nǝɗ a kira aulaara ra. 3 Pa yǝɓǝ nkee mbusa dem a mǝɗkǝta, yǝ nkee me, “An waa nyaanyo ke yǝ ko a rǝko. 4 Yǝsaa rǝkoo wa, nkaama peera ma a roo a ɗǝɗa, pa rǝmɓa ɓǝ wo ɓǝ tiki ndiira. 5 Peera a roo a ham ɗungate ɓa, a ham putu sem ɓong ra ɓa. Pa ɓǝ nhaa naakǝn, me putu sem ɓong a ham sǝsa ra. 6 Pa osa tomsǝ wa, ɓǝ lukanyǝ ɓǝ ee, me ɓǝ sem ma hinti ra. 7 Nkaama peera ma a roo a tǝute, pa tǝute kaya yǝ mbar yǝɓǝ sartǝ. 8 Maaso ɗǝm, peera nkaama a roo a ham putu yaɓ ɓa, pa ɓǝ nsee emba, ɓaata peera pusa puu pusa puu, peera pamindike pamindike, peera pataatǝn pataatǝn a mbu yǝ rǝksǝ ɓa. 9 Yaa yǝsǝ ma ngwee kura kura ya, a lee yǝ kura.” 10 Pa emfǝɗkaa ka ɓa ɓǝ wo a sanii, ɓaa taa me, “Tomtomni ngǝn kansǝ mara ɓeta ma mǝɗkǝtau?”

11 Yǝɓǝ kak me, “Ɓaa weesǝ yauwon me sǝ maa mbu a nhuukǝta u kuɓsutu a liura wan, pa ɓosa, ɓaa na ɓǝ ra. 12 Yaa yǝsǝ ma mbuka ya, ɓaa ka sookǝ me a kwii, ɗǝm yaa semma mbuka ra ya, hana u yǝ sǝ ngeek wa, ka kon a sanii. 13 U nwa ǝn siso mbu kwaasǝ nǝn nkee ɓǝsǝ mara ma mǝɗkǝta wa me,
“Hana ka ɓǝ sengge, ɓǝ nkaa ɓǝ wǝr ra,
hana ka ɓǝ pira ngwee ɓǝ kura ra, ɗǝm ɓǝ nkaa ɓǝ maa ra.

14 A ɗuura ɓora, ɓaa kungsǝ nawanto Ishaya wa me,
“‘Sǝkǝ pira ngwee sǝ kura, pa sǝ pǝta maa ra,
sǝkǝ tomaa wǝro, pa sǝ pǝta maa ɗaanto ra.
15 Me kuti ɓet ɓa ya kengrenggǝn,
ɓǝ ɗot ngweeme ɓosen,
ɗǝm ɓǝ liki nuunwa ɓosan.
Pa me ka sem maaso ra, kama ɓǝkǝ nkaa ɓǝ wǝr ma nuunwa ɓosa,
ɗǝm ɓǝkǝ kura ma ngweeme ɓose,
ɗǝm ɓǝkǝ maa a kuti ɓose,
ɗǝm ɓǝkǝ kǝrtǝ ɓǝ wo a nani, nǝ ɓǝ roɓɓo.’

16 Pa saltǝra yǝ kaɗan a nuunwa sǝsaan, me ɓǝn wǝrǝ, ɗǝm ma ngweeme yaase ɓǝn kura. 17 Pa me nǝn nkeesǝ ɓongtǝrato, ɓannawanto ɓa ma ɓaa ɓǝn tomsǝ mbu yǝsǝ keke a wiiyo a Kaa ni ɓa dem, ɓǝn yau me ɓǝ wǝr mbu sǝn wǝrsǝ ɓa, pa ɓǝ wǝr ra, ɗǝm me ɓǝ kura mbu sǝn kurasǝ ɓa, pa ɓǝ kura ra.

18 “Sǝ kura ɗaanto mǝɗkǝra an rǝko ya wa. 19 Hana yamni yaa yǝ kurasǝ mara a ɗuura kuɓsutu ya ra, pa yǝ maa mbusa ra ya, pa yaa kwalakwala ya yǝ wo yǝ ngwǝrtǝ mbu ɓaa tisǝ a kuɗa a sani ɓa. U nwa ndǝ nkaama rosǝ a ɗǝɗa ma, 20 Nkaama rosǝ a ham ɗungate ɓa, ǝn mǝɗkǝ yaa yǝ kurasǝ mara Kaa ra, yǝ kon ma hurhurto ya. 21 Pa me yǝ sem ma hinti ra, yǝ tǝr kwang ra. Me yǝ taa rǝkata hana kongsa a ɗuura mara Kaa ra, yǝn kwiɗ yǝ nwii. 22 Nkaama rosǝ a tǝute ma, ǝn mǝɗkǝ yaa yǝ kurasǝ mara Kaa ra ya, pa rǝkata kaɗo put ntaandi wa ra, ma ɗeura kǝnaa ra, ǝɓǝ nhemme, pa yaa ti yǝ tom sal. 23 Pa nkaama rosǝ a put yaɓ ɓa wa, ǝn mǝɗkǝ yaa yǝ kurasǝ mara Kaa ra yǝ maa nya. Pa maaso yǝn wo yǝ nsee emba, ɓaata pusapu pusapu, ɓaata pamindike pamindike, ɓaata ɗǝm pataatǝn pataatǝn.”

Mǝɗkǝta a nkaama muuma ma

24 Yeso yǝ ɓaarǝ yǝ ɓǝ nkee mǝɗkǝra me, “Kuɓsutu a liura wa, yǝ nga ete yaa yǝ rǝksǝ nkaama yaɓ ma a nyaanyo usu ya. 25 Pa ɓaa tǝrsǝ munda nsaad nwa, ateker isi yǝ wo, yǝ rǝk nkaama kwalakwala kǝma ɗaan a muuma kama, yǝ faɗ mbusa. 26 Pa muuma kama nhaasǝ wa, nkaama kwalakwala ma, yǝ nhaa kǝn.

27 “Pa hoota an taanda ya, ɓǝ wo ɓǝ taa an taanda ya, ɓǝ nkee me, “An taanda ya, ngǝ rǝk nkaama yaɓ ma a nyaanyo nwaango rau? Pa nkaama kwalakwala ma fiɗ nau?

28 “Pa yǝ ɓǝ kak me, ‘Atekere yǝ tom sase.’ Hoota kata ɓǝ taa me, ‘Ngǝn taa me ko tǝ npuu ndiirau?’

29 “Yǝ kak me, ‘Awo, me sǝn npuu nkaama kwalakwala kama, tom pa sǝ npuu ke ma muuma ra. 30 Sǝ lee ɓǝ mbar ke a kana fer ɗaɗɗo wa. A fer siso kǝnǝ nkee ɓan ɗaɗɗa ɓa me, ɓǝ ntii ɓǝ ɗaɗ nkaama kwalakwala kama, ɓǝ kwau silimta a neke, pa ɓǝ kwau muuma ɓǝ nhii a pin nwano.’”

Mǝɗkǝta a ɗuura nkaama karaɓa ma

31 Yǝ ɓaarǝ yǝ ɓǝ nkee mǝɗkǝra me, “Kuɓsutu a liura wa, yǝ nga nkaama karaɓa ma, u eɗ ke yǝ rǝksǝ a nyaanyo usu wa. 32 Hana kayǝsǝn nkaama ngeekǝlek a ɗaaso nkaamǝta wa nsaad, pa me yǝ mɓaran, ǝn sase yǝ faɗsǝ kwangto a ngwate ya, rǝmɓa ɗǝm ɓǝn sǝk hitsa a si.”

33 Yǝ ɓaarǝ yǝ ɓǝ nkee mǝɗkǝra kǝra me, “Kuɓsutu a liura wa, yǝ nga yisti u toone ke yǝ too yǝ rootǝ ma nfaara kwang, pa yisti kaya yǝ pam ma nfaara kara nsaad.”

34 Yeso yǝ nkee mbusǝsa nsaad, ɓaa ɓǝ kwausǝ dem ɓa ma mǝɗkǝta, yǝ nkee ɓǝ mbuka ra ndub ma mǝɗkǝra. 35 U nwa tom maaso me a kung mbu an nawanto Ishaya nkeesǝ wa me,
“Kǝ nǝ kan ma mǝɗkǝta,
kǝ nǝ nkee mbu yǝ saa nhuukǝra ɓa tǝng ntiiri put taandi wa ya.”

Mǝɗkǝta a ɗuura nkaama kwalakwala ma

36 Pa yǝ lee ɓaa kwausǝ dem sǝɓa, yǝ kan a hito. Emfǝɗkaa ɓisa ɓǝ wo a sanii ɓaa nkee me, “Ətǝ nkee ɗaanto mbu mǝɗkǝra nkaama kwalakwala sǝma ǝn sensǝ ɓa.”

37 Yǝ ɓǝ kak me, “Yaa yǝ rǝksǝ nkaama yaɓ ma nya, ndǝ Au Ete ya. 38 Nyaanyo kawa ndǝ put taandi wa, ɗǝm nkaama yaɓ sǝma ndǝ em kuɓsutu ɓa, nkaama kwalakwala sǝma ɗǝm, ndǝ em yaa kwalakwala kaya ɓa, 39 pa ateker yǝ rǝksǝ nkaama kwalakwala sǝma ya, ndǝ Shaitan. Fer ɗaɗɗa wa, ndǝ feɗefeɗe put ntaandi wa ya, ɗǝm ɓan ɗaɗɗa ɓa, ndǝ ɓantimira Kaa ɓa ra.

40 “Nga ɓan kwausǝ kiyo a nek ara wa, kǝ tom maaso a feɗefeɗe put ntaandi wa ya. 41 Au Ete ya ki yǝ tung ɓantimira ɓisa, ɗǝm ɓǝ kǝ kwau nsaad ɓaa ɓǝn kwaasǝ ɓeta ɓǝ tom tentenato ɓa ya, ma ɓaa ɓǝn tomsǝ tinima kwalakwala ɓa ya, ǝɓǝ hik a kuɓsutu usu. 42 Ɓaa kǝɓǝ muɗkǝ a ar hǝrhǝr ɓa, kǝnso ɓǝkǝ tee ma kǝu ɗǝmta wa. 43 Pa ɓaa ɓǝn tomsǝ mbu yǝsǝ keke a wiyo a Kaa ni ɓa wa, ɓǝkǝ weɗ nga osa a kuɓsutu Pap ɓose wa. Yaa yǝsǝ ma ngwee kura kura ya, a lee yǝ kura.

Mǝɗkǝta a ɗuura kǝnaa u ɓaa hoksǝ wa

44 “Kuɓsutu a liura wa yǝ nga kǝnaa u ɓaa hoksǝ a nyaanyo nwa, u yaake yǝ taasǝ wa, yǝ ɓaarǝ yǝ hoko. Me yǝ weɗa hur kuɗa usu, pa yǝ ko yǝ fang nsaad mbu yǝsǝ ma siso ɓa, yǝ tiri nyaanyo kawa.

45 “Maaso ɗǝm Kuɓsutu a liura wa, yǝ nga au lumu nya, u yǝn kǝrsǝ mɓǝtama nya. 46 Me yǝ ta fin u yǝsǝ ma koɓaa dem wa, kiya ko yǝ fang mbu ɓisa nsaad yaa tiri.

Mǝɗkǝta a ɗuura langtanga ra

47 “Maaso ɗǝm, kuɓsutu a liura wa yǝ nga langtanga u ɓaa yaɓsǝ a aulaara wa, me a ma hana nkaamǝra nsenya naara. 48 Pa yǝ kungsǝ wa, ɓan ma nsenya ɓa ɓǝ win a kira. Pa ɓǝ kaɗ ɓǝ tau u yaɓ yaɓ wa ɓǝ nhii a kumta, pa ɓǝ yaɓ u sem yaɓ ra wa. 49 Kǝ tom maaso a feɗefeɗe put ntaandi wa ya. Ɓantimira Kaa ɓa ɓǝkǝ wo ɓǝ nweerǝ ɓaa kwalakwala ɓa a ɗaaso ɓaa ɓǝn tomsǝ mbu yǝsǝ keke a wiiyo a Kaa ni ɓa ya, 50 Ɓaa kǝɓǝ muɗkǝ a ar hǝrhǝr ɓa, kǝnso ɓǝkǝ tee ma kǝu ɗǝmta wa. 51 Yeso yǝɓǝ taa me, “Sǝ maa mbu ɓan nsaad nǝu?”

Ɓǝ kak me, “Ee nwa.”

52 Pa yǝ ɓǝ nkee me, “Me maso nsaad malǝm masaka Musa wa u ɓaa fǝɗkǝsǝsǝ a ɗuura kuɓsutu a liura wa ya, yǝ ngaa An taanda ya, u haasǝ kǝnaa nfiinfiita ma meeta a pin usu wa.”

Ɓaa mbisi Yeso a Nazarat

53 Pa Yeso feɗsǝ nkee mǝɗkǝta sǝta wa, yǝ nii yǝ lee hansǝsa. 54 Yeso yǝ wosǝ ur usu wa, pa yǝ ntii fǝɗkǝ ɓeta wa, a hit kwau Yahudawa ɓoso, ǝɓǝ tom mbu weɗara ɓa, ɓǝ nkee me, “Eɗ ɗa yǝ taa pǝr mbuka wa nau, yǝn tomsǝ mbu nhiinyanhiinya ɓa maasou? 55 U nwa sem au an ankwaakǝ mbusa siya rau? Sem maasi ǝn yarsǝsǝ me Maryamu ya rau? Ɗǝm ɓaata ɓisa ǝn Yakubu ma Yusufu ma Siman, ɗǝm ma Yahuda wa rau?” 56 Sem ɓaata ɓisa mboona nsaad ndǝsǝ ke ma ɓosa a ham ɓa wa rau? A ham na ɓa Eɗ ɗa yǝ taasǝ mbu ɓa nsaad maasou?” 57 Pa ɓǝ ɗaa dem.

Pa Yeso yǝɓǝ nkee me, “An nawanto ya, yǝ ma mbarta hana na, pa sem a ur usu ɗǝm ma ɗur usu ra.”

58 Yǝ tom mbu nhiinyanhiinya ɓa dem kǝnso ra, me ɓǝ sem ma na ɓongto wa ra.