Matthew 15

Mbu ɗekɗek ɓa ma mbu sem ɗekɗek ra ɓa

1Pa ɓaata ɓaa Farisiyawa ka, ma malǝmaa masaka sa, ɓǝ fiɗ Urshalima ɓǝ wo a Yeso ni, ɓaa taa me, 2“Tomtomni emfǝɗkaa ɓǝnga ɓǝn tomsǝ mbu wiina ɓǝnda nkeesǝ me ǝn tom ra ɓau? Ɓǝ soɓaa nema ɓosa pa ɓǝ se mbuseyaa ra!”

3Yeso yǝɓǝ kak me, “Pa waso tomtomni sǝ kausǝ mbu Kaa yǝ nkeesǝ me aa tom ɓa, me sǝ ɓǝɗ mbu wiina ɓǝsaa nkeesǝsǝ ɓau? 4Me Kaa yǝ nkee me, ‘A na mbarta paange ma maange,’ ɗǝm ‘hana yamni yaa yǝ sǝrsǝ pap ɓisi hana maasi ya, aa toɗɗo.’ 5Pa saase sǝn nkee me, ‘Hana yamni yǝ nkee pap ɓisi hana maasi me, “Nsaad mbu kama kǝsaa taa a nani ɓa, nǝ na Kaan,’ nwa sem ɓongɓong yǝ na mbarta pap ɓisi ra.’ 6Me, sǝ ɓǝɗ mbu wiinaa ɓǝsaa nkeesǝsǝ ɓa. Pa sǝ lee u Kaa wa, me sǝn ɓǝɗ mbu wiina ɓǝsaa nkeesǝ ɓa 7Saa ɓaa ma ɗǝlmara raɓ ɓa, tomon keke Ishaya yǝ nasǝ waanto a ɗuura saa wa me,
8“‘Ɓet ɓaa ɓǝn nanǝ mbarta ma tǝrmǝta ɓota maɗ,
pa senta ɓota mǝbmǝb ma niina.
9Ɓǝn nyoo nǝ sal, fǝɗkǝta ɓota ǝn masaka ɓeta wa maɗ.’”

10Yeso yǝ yar ɓet kwausǝ dem ɓa a sani yǝ ɓǝ nkee me, “Sǝ pira ngwee ɗǝm sǝ maa. 11Sem mbu ǝn kansǝ ete a ee isi ɓa, ǝn kwasǝsǝ yǝ tom ‘sem ɗekɗek ra wa, pa mbu ǝn fiɗsǝ a ee isi ɓa, ǝn siso ǝn kwasǝsǝ yǝ tom ‘sem ɗekɗek wa’ ra.”

12Pa emfǝɗkaa ɓisa ɓǝ wo a sani ɓaa taa me, “Ngǝ maan me ɓaa Farisiyawa ɓa, ɗaa ɓǝn ma mbu ɓǝ kurasǝ ɓa nǝu?”

13Yǝ kak me, “Nsaad mbu turkǝsǝ ɓa, me Paane a liura ya yǝ turkǝ sase ra, ɓaa kǝ npuu ma hinti kong. 14Əɓǝ lee. Ɓǝn ɓan ma kwalanga ntaata ɓa. Me ntaara yǝ ma kwalango ate ntaara ya, ɓǝkǝ nwii a npoo kong.”

15Bitrus yaa nkee me, “Ətǝ nkee mbu mǝɗkǝta ta ǝn sensǝ ɓa.”

16Yeso yǝɓǝ taa me, “Nding waso kasǝ maa rau? 17Sǝ maa me mbu kansǝ a ee ɓa, ǝn ko ɗaan a kuɗa, pa ɗǝm yǝ fiɗ a maabiri rau? 18Pa mbu fiɗsǝ a ee ɓa, fiɗ a seura ɗaan, ɗǝm ǝn siso tisǝsǝ yǝ tom ‘sem ɗekɗek ra’ wa. 19Me mbu ǝn fiɗsǝ ɗaan a seura ɓa, ǝn senta kwalakwala ta, ma toɗ ete wa, ma tǝr toone ete wa, ma pepeto, ma tang mbusa wa, ma nkee para mara a ɗuura ete ra, ma tǝblǝ ɗǝnda ete wa. 20Mbu ɓa ndǝ mbun kwaasǝ ete yǝ tom ‘sem ɗekɗek ra’ wa, pa se mbuseya nema soɓ ra wa, a kwaa ete yǝ tom ‘sem ɗekɗek ra’ ra.”

Na ɓongto toone put Kan’ana ke

21Yeso yǝ lee hansǝsa yǝ faɗ a put Taya ma Sidon wa. 22Toone a put Kanˈana ke, yǝ wo a Yeso ni, yǝ nik kwaro, yǝ nkee me, “Ankundi, Au Dauda ya, a kura nyorataara na! Au waane toone yǝn wee kongsa ma wis nsaamse wa.”

23Yeso yǝ nkeesǝ hana mbuka fin da. Pa emfǝɗkaa ɓisa ɓǝ wo a sani ɓaa kǝna, ɓaa nkee me, “A nkee yǝ faɗa, me yǝn ɓǝɗ ndǝ, yǝn rǝka ndǝ ma oro.”

24Yǝ kak me, “Ɓaa timinǝ a tǝmnkaa Isra’ila u leetǝsǝ wa maɗ!”

25Toone kaya yǝ wo yǝ kwirsǝ a wii usu, yǝ nkee me, “Ankundi, ǝnǝ kwasi!”

26Yǝ kak me, “Pam me a too nkaadǝng emba wa, a na empaa ra.”

27Yǝ nkee me, “Ee nwa, Ankundi, pa hana empaa ɓǝn se nyǝwǝrta u rosǝ a ham se mbuseya An taanda ɓose ɓa.”

28Pa Yeso yǝ kak me, “Toone, ngǝ ma na ɓongtǝra wa kwang! Mbu ngǝn kǝrsǝ ɓa ngǝ taan.” Pa nok kǝnso au isi toone yǝ roɓ a fer siso.

Yeso yǝ na mbuseya ɓeta pusa pu pu kurun

29Yeso yǝ lee hansǝsa, yǝ ɓǝɗ ma kal aulaara Galili wa. Pa yǝ taa a yolo yǝ kaɗ kǝnso. 30Ɓeta dem ɓǝ wo a sani, ɓǝn wosǝsǝ ma ɓaa natsa sǝrsǝ ɓa, ma ntaata, ma puuta, ma kwaata, ɗǝm ma ɓaata dem, ɓaa ɓǝ nhii a kunda natsa isa, ɗǝm yǝ ɓǝ roɓɓo. 31Ɓeta ǝɓǝ tom nhiinyanhiinyato, ɓǝ wǝrsǝ kwaata ɓǝn kan nwa, puuta ɓǝ roɓɓon, ɓaa natsa sǝrsǝ ɓa ɓǝn siki, ɗǝm ntaata ɓǝn wǝrǝ. Pa ɓǝ nyoo Kaa Isra’ila ɓa. 32Yeso yǝ yar emfǝɗkaa ɓisa yǝɓǝ nkee me, “Nǝn kura nyorataara ɓet ɓa ra, me ɓǝ ke ma niina tǝro taatǝn ɗǝm ɓǝ se mbuka ra. Nǝn taarǝ me nǝ ti ɓǝ pamo ma ɗooran, tom pa ɓǝ nwii a ɗǝɗa ra.”

33Emfǝɗkaa ɓisa ɓǝ kak me, “Pa ndǝ kǝ taa nkaadǝng dem na a sanglo wa, u ka maa ɓeta dem nga wau?”

34Yeso yǝɓǝ taa me, “Sǝ ma nkaadǝng mininiu?”

Ɓǝ kak me, “Tǝsǝ mbutu, ma nsenya ngeek.”

35Pa yǝ nkee ɓet kwausǝ dem sǝɓa me ɓǝ kaɗ a putu. 36Pa yǝ too nkaadǝng mbutu suwa ma nsenya kasa, yǝ tom himara, pa yǝ ɓaa yǝ na emfǝɗkaa ɓisa, ɓosa kǝn ɓǝ na ɓeta. 37Nsaad ɓǝ kǝu ɓǝ nkwee. Ndiira maaso wa, emfǝɗkaa ɓǝ kwau nyǝwǝrta a kung hote mbutu. 38Ɓaa ɓǝ kǝusǝ ɓa, ɓǝ pusa pu pu kurun, sem ma toona ma emba ra. 39Pa Yeso tisǝ pamo ɓeta wa, pa yǝ kan a kurnyaamo yǝ ko a put Magadan wa.