Matthew 21

Ɓet Urshalima ɓa ɓǝ tom marafa Yeso

1Pa ɓǝ tomsǝ ngwang ma Urshalima wa, ɓǝ wo Betafaji a kola Zaitun ra. Yeso yǝ timi emfǝɗkaa raɓ, 2yǝɓǝ nkee me, “Soo a ur ngeek a wiiyo a sani wa, me sǝn kan kana, kǝsǝ wǝr kwarǝra kaasǝ kǝnso ma au isi ke. Sǝɓǝ kee, sǝnǝn wo. 3Me yaake nkeesǝ mbuka ke, saa nkee me, Ankundi yǝn taa ɓǝ sase, ɗǝm kiyaa kang nok.”

4Mbu ɓa tom maaso me a kung mbu an nawanto ya nkeesǝ ɓa me,
5“A nkee ɓaa ur Sihiyona ɓa,
Sǝ sengge, kuɓ waaso yǝn wowo a saani,
yǝ too ɗuura ira ra,
yǝn siki siki ɓoti a kwarǝra, a au kwarǝra ya, yǝn sikisǝn siki wa.”

6Pa emfǝɗkaa ɓisa ɓǝ faɗ ko ɓǝ tom nga Yeso nkee ɓǝsǝ wa. 7Ɓaa wo ma kwarǝra kara ma au isi, pa ɓǝ mal luktaa ɓosa, Yeso yǝ laɓɓa. 8Ɓeta kwausǝ dem wa, ɓǝ mal luktaa ɓosa a ɗǝɗa, ɓaata ɗǝm ɓǝ kau nwaamǝta ɓǝ mal a ɗǝɗa. 9Ɓeta dem ɓaa ɓǝ kosǝ a wii usu ɓa, ɗǝm ma ɓaa ɓǝn ɓǝɗsǝsǝ ndiira ɓa, ɓǝn nik kwaro ɓǝn nkee me,
“Nyoota kaɗan a Au Dauda ya ni!”
“Saltǝra kaɗan a sanii, yaa yǝ wosǝ a ɗǝnda Ankundi ya ra!”
“Nyoota kaɗan a Kaa ni!”

10Pa Yeso kansǝ Urshalima wa, ur siso nsaad ɓǝ taa ɓoti, hana nyamni yǝn taa me, “U nwa ndǝ nyamniu?” 11Ɓet kwausǝ dem sǝɓa ɓǝ kak me, “U nwa ndǝ Yeso an nawanto ya, yǝ fiɗ Nazarat a put Galili wa.”

Yeso a hit Kaa Urshalima wa

12Yeso yǝ kan a taanda Hit ɓǝɗ Kaa Urshalima wa, yǝ pǝǝ nsaad ɓaa ɓǝn fangsǝ mbusa ɓa ma ɓaa ɓǝn tirisǝ mbusa kǝnso ɓa. Yǝ tǝng teburaa ɓan paaki koɓaa sa ɓa ma mbu kaɗaa ɓan fang muktaa ɓa. 13Yǝɓǝ nkee me, “Nyorsǝ me, ‘Ɗuur waano kǝ yar me ndǝ ɗuur kǝnara wa,’ pa sǝ kang a tom ‘fer nkwiiya wa.’”

14Pa ntaata ma puta ɓǝ wo a sanii a hit ɓǝɗ Kaa Urshalima wa, ɗǝm yǝɓǝ roɓɓo. 15Pa kuɓsa nek mbusa sa, ma malǝmaa masakaa sa ɓǝ wǝr mbu nhiinyanhiinya yǝn tomsǝ ɓa, ɗǝm ma emba ɓǝn yaulisǝ a taanda hit ɓǝɗ Kaa Urshalima wa, ɓǝn nkee me, “Nyoota kaɗan a Au Dauda yani.” Pa ɓǝ kura nfiima.

16Ɓaa taa Yeso me, “Ngǝn kura mbu emba ɓǝn nkeesǝ ɓau?”

Yeso yǝ kak me, “Ee nwa, sǝ pǝta kauwo rau me,
‘A ɗǝlmata emba ta ma u welta wa,
ngǝ ti nyoota nga a fiɗ wa’ rau?”

17Pa yǝ faɗ yǝɓǝ lee, yǝ ko Betanya yǝ tǝr kǝnso.

Yeso nemmeto ɓot sata ɓa

18Pa naakǝn a ɗenda, Yeso yǝn kangsǝn kang a uru wa, pa ɗoora aa si. 19Pa yǝ wǝrsǝ ɓot sata ɓa a kal ɗǝɗa wa. Yǝ ko a ɓot sǝsa, pa yǝ taa mbuka a sin da ǝn nwaama seɗe. Pa yǝ nkee ɓot kaɓa me, “Ngǝ pǝta nsee emba wa ɗǝm ra!” Nok kǝnso, ɓot kaɓa yǝ ee.

20Pa emfǝɗkaa ɓǝ wǝrsǝ maaso wa, pa weɗara ɓǝ ma, ɓǝ nkee me, “Tomtomni ɓot sata ɓa eesǝ nok maasou?”

21Pa Yeso yǝɓǝ kak me, “Ɓongtǝra nǝn nkeesǝ, me sǝma na ɓongtǝra wa, ɗǝm sǝ pǝǝn da, sǝkǝ nkaa sǝ tom mbu faɗsǝ mbu nǝ tomsǝ ɓot sata ɓa wa, sǝkǝ nkaa ɗǝm sǝ nkee yol wa me, ‘A npuu ko ngǝ ham a aulaara,’ ɗǝm ki yǝ tom maaso. 22Me sǝ na ɓongton, nsaad kǝnara sǝ tomsǝ ma kuɗa fin da kǝsǝ taa.”

Ɓan pǝn kwangto Yeso wa

23Pa Yeso yǝ kansǝ a taanda hit ɓǝɗ Kaa Urshalima wa, yǝ saa fǝɗkǝra wa, kuɓsa nek mbusa sa, ma wiina ɓeta a ɗaaso uru wa ɓa, ɓǝ wo a sanii. Ɓaa taa me, “Ma kwangto yamni wa ngǝn tomsǝ mbu ɓau? Ɗǝm yaa na ngǝ kwangto siso niu?”

24Pa Yeso yǝɓǝ kak me, “Niina kǝn kǝnǝsǝ taa mbuka fin. Me sǝ kak nǝn, kǝnǝsǝ nkee ma kwangto yamni wa, nǝn tomsǝ mbu ɓa wa. 25Baptisma Yohanna ya, yǝ fiɗ nau? Fiɗaa liurau ko a ɓeta niu?”

Pa ɓǝ ntii kanmǝra a ɗaaso ɓoso, ɓǝn nkee me, “Me ndǝ nkee me, ‘Fiɗaa liura,’ kiyǝn ndǝ taa me, ‘Yaa tomtomni ndǝ na ɓongtǝra ma siso rau?’ 26Pa me ndǝ nkee me, ‘Fiɗaa ɓetani,’ nɗǝn kura kokto ɓeta wa, me ɓeta nsaad ɓǝ too Yohanna ndǝ an nawanto ya.”

27Pa ɓǝ kak Yeso me, “Tǝ maa ra.”

Sase kǝn yǝɓǝ nkee me, “Niina kǝn nǝsǝ nkee ma kwangto yamni wa nǝn tomsǝ mbusǝsa wa ra.

Mǝɗkǝta yaa ma emba rab paraata ya

28“Pa nwa sǝ wǝr miniu? Atike yǝ ma emɓisa raɓ parata. Yǝ ko a au ntiiri ya ni yaa nkee me, ‘Auwane, ngo kongǝ tom tinima nyaa naso.’

29“Yaa kak me, ‘Nǝ ko ra,’ pa ndiira usu yǝ paki senda ira yǝ ko.

30“Pa pap kaya yǝ ko a raɓte ni, yaa nkee nga yǝ nkeesǝ au a ntiira ya wa. Yaa kak me, ‘Paane ee nwa nǝ ko,’ pa yǝ yau yǝ ko ra.

31“A em raɓ sǝsa ǝn nyamni yǝ tomsǝ mbu pap ɓisi yǝ yausǝ ɓau?”

Ɓǝ nkee me, “Au a ntiiri ya.”

Yeso yǝɓǝ nkee me, “Nǝn nkeesǝ ɓongtǝra, ɓan kon samra ɓa, ma tulata, ɓǝkǝ nkaa kano a kuɓsutu Kaa wa. 32Me Yohanna yǝ wo a sani yǝsǝ weɗa ɗǝɗa ɗekɗek ra, pasǝ na ɓongto ma sase ra, pa ɓan kon samra ɓa, ma tulata ɓǝ na ɓongto ma sasen. Pa nsaad ma mbu sǝ wǝrsǝ ɓa, nding waso sǝ kon nfaata ra, ɗǝm sǝ na ɓongto ma sase ra.

Mǝɗkǝra a ɓan waa nyaanyo ɓa

33“Sǝ kura mǝɗkǝra kǝra ɗǝm. An nyaanyo ke yǝ turkǝ emngwate inabi ma a nyaanyo usu, yǝ luu ma tǝute ya leurǝ nyaanyo siso, yǝ nsaa npoo ra nhem emngwate inabi ɓa, yǝ mar hitwaroo ɓoti ɓoti a ɗaaso nyaanyo wa. Pa yǝ na haya nyaayo kawa ɓaataka me ɓǝ waa, yǝ faɗ mbusa a urko. 34Pa fer ɗot emngwate inabi ma kansǝ wa, yǝ timi hoota ita a ɓan haya kaɓa ni, me ɓaa kon emngwate ɓisa.

35Pa ɓan haya kaɓa ɓǝ ma hoota ɓisa, ɓǝ hoɓ yaa fin ya, ɓǝ toɗ yaa fin ya, ate ɗǝm ɓaa muɗkǝ ma ɗungate. 36Pa yǝ ɓaarǝ yǝ timi ɓaata ɓantimira u fadsǝ ntiiri wa, ɓan haya kaɓa, ɓǝɓǝ tom nga ɓaa a ntiiri sǝɓa. 37A feɗe feɗe, pa yǝ timi au isi, yǝ nkee me, ‘Nǝ maan me ɓǝkǝ na mbarta auwane.’

38“Pa ɓan haya sǝɓa ɓǝ wǝrsǝ au isi wa, ɓǝ nkee ɓaatǝ me, ‘U nwa ndǝ sase an se kǝnaa ya. Sawo ndaa toɗɗo ɗǝm ndǝ too kǝnaa usu. 39Pa ɓaa maa, ɓaa muɗkǝ a nkaara nyaanyo ra ɗǝm ɓaa toɗɗo.

40“Pa waso, me an nyaanyo ya yǝ won, kiyǝ tom mbi ma ɓan haya sǝɓau?”

41Ɓaa nkee me, “Kiyǝ toɗ ɓet kwalakwala sǝɓa yǝ na haya nyaanyo siso ɓaataka ka ɓol, ɓaa kǝ ɓǝsaa na usu emngwate inabi ma, me fer ɗot usu kanan.”

42Yeso yǝɓǝ nkee me, “Sǝ pǝta kauwo a Likarkar Kaa wa rau? U yǝ nkeesǝ me,
“‘Ɗungara u ɓan mara ɓa ɓǝ mɓisǝsǝ ɓa wa,
ǝn siso yǝ kangsǝ yaɓ a timra hito ra wa.’
U nwa ndǝ tomo Ankundi wa,
ɗǝm ǝn mbu nhiinyanhiinya ɓa a nuunwa sǝnda.’

43“Me maaso nǝn nkeesǝ, ɓaa kǝ kon kuɓsutu Kaa wa a nema a sani, a na ɓaataka ɓol, ɓaa kaa tom tinima kuɓsutu Kaa ma. 44Yaa yǝ nwiisǝ a ɗungara ra ɓa, kiyǝ kau fin fin, pa yaa ɗungara hamsǝsǝ a maabiri isi ya, kiyaa ookǝ yǝ kang arma.”

45Fer kuɓsa nek mbusa sa ma ɓaa Farisiyawa ɓa, ɓǝ kurasǝ mǝɗkǝta ita wa, ɓǝ maan me yǝn kan a ɗuura ɓora. 46Ɓǝ kǝr ɗǝɗa ɓǝ kǝsa maa ra, pa ɓǝn kura kokto ɓet ɓǝ kwausǝ dem sǝɓa, me ɓeta ɓǝ toosǝ yǝn an nawanto ya.