Act 13 | MCQ | STEP | Enitioki sosia vajijaho poropetia 'ee najahi'inijija ijí hijara. Panapasiho Simiani ka'ene ea ajijaho 'ee Rusiasi ka'ene Sairini orijaho Manaini ka'ene Heroti oni napurijaho 'ee Soru 'u'o ahuma ijihi pu'úmo hijara.

‏ Acts 13

Panapasi'o Soru'o Iji Pijihe Irechamiajina

1 Enitioki sosia vajijaho poropetia 'ee najahi'inijija ijí hijara. Panapasiho Simiani ka'ene ea ajijaho 'ee Rusiasi ka'ene Sairini orijaho Manaini ka'ene Heroti oni napurijaho 'ee Soru 'u'o ahuma ijihi pu'úmo hijara. 2 'E'eme pu Natohwiji oja vwihanareja pu 'iruma aura areme siporua 'oji'i hi'eme Godoni 'Aveni ijá 'iama Panapasi'o Soru'o irechamie kaukara raka ka'ene Na pura ve'avarono 'umenauji veja 'iamana. 3 'Ejume pu 'iruma aura areme 'ee siporua 'onareja pu 'urine puni ija húmata 'ahi irechamiume pu no'o va'ara.

Panapasi'o Soru'o Saiparasi Hine 'Ee Soru Poru 'Ivajina

4 'Ene pu Godoni 'Aveni irechamiume va'e Serusia useme ijino sisima ajima Saiparasi va'ara. 5 'Enareja pu va'e Saramisi useme Jua puni Sinakoku vaji aneja vene Godoni vu'a najahara. 'Ene Joniho pu ni'ajihuna'e ahevara. 6 'Enareja pu ijí Saiparasi opuni ara kwaa kajaho 'uraho paranareja pu va'e ara iha ka'ene Pepasi 'wavuji ea pina piunavara. Ijí ea kajihuni ihijaho Pajesuna. Hu poropetia ira'asina. Hu atama ani ani'ina mapoka veji'ina. 7 'Ena'omo hu ea natohwa ka'ene 'ajohi'iniji'i hinuna. Hu niho'o hami vwihaji'ina. Hu Godoni vu'a he'irono Panapasi'o Soru'o 'umenaume roara. 8 'Enakaivo Erimasi ka'ene atama veji'inijara kanisoru nimaa ro'amarono 'unama same tanumana. 9 'Ejumakame Soru ka'ene Poruna 'wavujaho Godoni 'Aveni huni oja vaja rarena parajumakame hu niimano kanavi'i 10 ijá 'wama A niho'o 'avena sisei jihuni hariha. A uneunecha ka'ene mamaijihipuni nana'eji'ina. 'Ene ira'ata uneunecha ka'ene siseijipo oni oja vajijaho rarejara. Ijihuna'e na'ia mapoka a Natohwijihuni 'unama ariramaijaho a 'eke siseimaa venujaho vecha are'ena? 11 Ijihuna'e Natohwijara Huni ija oni haha 'ahi ranamahe a niho'o nia supama'ena. 'Eje a na'ia 'aho'a vea pakame pavehuna 'wa'eme huni nia vaji 'imitia samarena nutuma na'eme huni nia kwino supamana. 'Ejumakame hu 'urahe ijino napapanama apene ijí oji'i ea 'ahopo iji 'unama apene va'avarono hu ea saramana. 12 'Ejumakame kanisorua ijí kamarena hu nimaa ronana. 'Enarena hu Natohwiji rone najahaji henarena oja hwa'usahana.

Panapasi'o Poru'o Pisitia Vaji Enitioki Hijajina

13 'E'eme Poruho 'ee huni napuhija ka'ene pu pu'úmo va'a kajihija Pepasi rene sisima 'ahi Peka Pamipiria vaji use'eme Joniho pu irechami'i kaivo 'unama Jerusaremi va'ana. 14 'E'eme Peka raname va'e Pisitia Enitioki vaji usevara. 'E'eme ijí Sapati rejume pu va'e Sinakoku vaji hijara. 15 'Ejumakame ea ka'ene Sinakoku 'ajohi'inijipo tamana 'ee poropetia tahume pa'arejume ijá 'iava Vwehije ja vu'a 'aho'a ea ikihi ni'ajihe 'warahuna'e re'avajaho 'waraha 'iavara. 16 'Ejume Poru 'urine arini nami'i kaivo iji hararajihi'i ijá 'iama Isureri ora ka'ene Godi juhavi'inakije ataa apúsama ike heha. 17 Godikara amuhu núna ka'ene Isureri orijija iji pijihana. 'Enajihuna'e pu Ijipiti hi'eme Hura vejume pu ea mapoka rejara. 'Enareja Hu Huni harurijino pu aherame ro samai roana. 18 Pu juara mapoka (40) nechi'i roajaho Godi pu mají 'ajoaha'eme roara. 19 'Ejume Hura ijino Kenani opuni kwaa ara kajino ara iropu no'ohe'i ea mapoka 'aniume tiraa ranavara. 'E'eme Hu Huni ehija'e ijí mwe'a kajaho ahaame 'oi'oi vajihana. 'Ene pu ijí hijajaho Hu 'ajoha'eme juara mapoka (450) paarenana. 20 'E'eme ijihuni túna'ijino Hu puni 'otua heji'ina irechamiume pu hinona apena va'u va'u va'e Samueri ka'ene poropeti ijihuni veijino 'e'ujara. 21 'Enareja ijihuni túna'ijino pu kinia'e jarivume Godira Soru ka'ene Kisi oni harihiji mihana. Hu Penijimani oni ituha'omo ijara 'ajoha'eme juara mapoka (40) paarenana. 22 'Ejume Hu hu rana'i kaivo Teviti vejume roe puni kinia'e renana. Hua'e rone Hu ijá 'waramana Na Teviti ka'ene Jesi oni harihiji kavuta. Ea ka'ene Nuni ojijara ura renujaho ijina. Hura Nuni ura ijaho vehuna. 23 Ninahama 'warama ja'ina'e ea ikehuni amuja vaji Godira Isureri opuni ni'ajihi'ina Jesuho mihana. 24 'Ena'omo Hu mai'o ro'amarono Joniho Isureri ora maho'o puni sisea vwihane areme ta'arohakame toi samahuna 'waramana. 25 Joni oni kaukara mai'o paare'i ve'eme hu eaka mapoka kajihi ijá 'iama Ja vwihajujaho na rana rojo? Na Ea ka'ene ja hine 'ajahujaho pana kaivo heha! Hu nuni túna'i rou nara Huni mumora hwana jahehuna areria pareniu. 26 Vwehu nunakije ja Eparahami oni harihi jihipuni kachi'ina 'ee ea ka'ene Godi juhavi'inaka iki ja pu'úmo hijujija Hu nú ni'ajúharena Hu Huni vu'a nú múhana. 27 Ea ka'ene Jerusaremi hijujija 'ee puni 'ajohai'ina Hua 'ee poropetiepo 'waravara ka'ene na'ia mapoka'e Sapati rejukavi'i tahujaho pu mai'o pahena pakavura'omo ijara nimaa re'amarono pu Hu apene 'otua vetiara. 28 'Enakaivo pu 'unama ka'ene venareje Hu 'anahuniji savujaho pakamareja Pairatira 'ana'amarono 'waravara. 29 'Enareja Hu rone 'waravaji pu Hu korosi 'ahi namajaho apene arihe va'e muna ari ranavara. 30 'Enakaivo Godira vejume Hu kú'o 'urinana. Na'ia mapoka ea ka'ene pu pu'úmo Karari rene Jerusaremi roajihipuni roana. 'Ena'omo ijí ea kajipo iviama Huni 'waravi'ina rejara. 32 'Ena'omo nú vu'a maa maiu'ina ka'ene emahu núna nahama 'waramaji 'waravu. 33 Godira raka ka'ene nahama 'waramajaho iviamaa sesahu núpuni veakino Jesuho vejume 'urinana. Areri Samusi 2 vaji vejaja'ina.

Nara A saravu jihuna'e A iviasi Nuni Hariha renu 'wamana.
34 Godira vejume Hu kú'o 'uri'eme ika'ina 'warumana.

Hu kú'o pa'unama va'e mwe'a vaja pasakarahuna. Na Teviti merajahu ja'ina'e ja 'u'o merajihuna 'iamana.
35 Ijihuna'e hu Samusi vaji kú'o ija'ina 'waramana.

A Oni Ea ka'ene ariramaijaho ranave mwe'a vaja pasakara'amana 'iamana.
36 Tevitiho Godoni ura ijaho hura hinani veijino ehwa puna'e veji'i hinu va'o kwamana. 'Ejumakame pu apene va'e huni amuhija irechamiajino ranavume sakaranana. 37 'Enakaivo Godira Hu vejume 'urinajaho pasakaranana. 38 Ijihuna'e vwehu nune sisea vwihana arehuna ka'ene Huni vaji rena roana ka'ene 'waravujaho heha! 39 Ja niheju ea mapoka ka'ene Hua'e nimaa rojujaho ariramaa renauna. Mosisi oni tamanijara ija'ina veje ariramaa rehuna areria pana. 40 'Enakúne poropetiepo raka ka'ene 'waravajaho ja hami hami 'ajohakame ijija joni haha 'aha pare'avara. 41 Pu ijá 'iava

Ja ea ka'ene Godoni ira matihi'inijija ijí vwihaji'i kwamasa'avara. Na joni veijino kaukara pina veju kaivo kaukara kajaho ea 'ahopo nirisajihe 'warahuna kaivo ja niho'o taina pina panimaa rohuna 'iamana.
42 Poru'o Panapasi'o 'waravume paarejume ma'ahi va use'i va'eme eaka mapoka kajipo hura hara jarirame ijá 'iava Ja no'o Sapati piniji 'u'o roe vu'a kajihuna kajaho 'waru'avara 'iavara. 43 'E'ikaivo ea mapoka ka'ene ijí Sinakoku hija kajija ni'aha kwino ma'ahi usemareja Jua mapoka'e 'ee ea 'aho'a ka'ene Jua rejara ka'ene Godi juhavi'inijija Poru'o Panapasi'o 'ararihie va'ara. 'Ejume pu 'ejahie ijá 'iava Ja Godira maiji vwihanúana vajijino 'uraho'avara 'iavara. 44 Ijihuni túna'i Sapati re'i vejuma kamareja araka natohwa kajaho ahuma hine Godoni vu'a he'iro roara. 45 'E'eme pu ea mapoka ahuma hijuma kimareja Jua niho'o senama parajara. 'Ejumakame pu Poru oni vu'ijaho apene arohe ani 'warame Poru ira sisea 'warame matahara. 46 'Ejume Poru'o Panapasi'o ira paju'ika'i ijá 'iava Nú mamaa vene Godoni ira ikaho ja marako 'waravara kaivo ja majama hihuna apehunijaho niho'o sename hwe'i 'ahiu jihuna'e ijaho ja ojono ka'eje nú Jenitarua puni vau. 47 Ikaho raka ka'ene Natohwijara nú ve'avarono 'warumajina.

Nara ja Jenitaru puni ira sa'ina'e irechamiu 'ee ea ni'ajihuni vu'a apene mwe'a kehuni urakino va'avara 'úmana.
48 'Ejakame ijí Jenitaru kajija pu vu'a kaji henareja temarasahe 'ee Natohwi jihuni vu'ijaho ta'arohara. 'Ene ea ka'ene majama hihuna'e Godira iji pijihajija nimaa rojara. 49 'Enarena Natohwi jihuni irijaho kwaaka kajino maho'o rausaha va'ana. 50 'Enakaivo Juapo vejume napara ka'ene iha rukina 'ee parua ka'ene ara kaji ura ni'ina pisimie oja inaume Poru'o Panapasi'o rurahe 'ararihiume kwaa puna kajaho are'i kaivo va'ara. 51 Pu 'urine puni mumora hari saina ka'ene navajaho pua'e sise'i 'ahie tairevume arihumakivi'i pu Aikoniami va'ara. 52 'Ejumakame tisaiporua Godoni 'Aveni ruha apena parajukame niho'o teamana'eju'e hijura.