‏ Acts 2

Penitikosi Vea

1Jua puni Penitikosi vea natohu rejume pu maho'o rira kwinu ahuma hijara. 2'E'eme ni'aha kwinu akúpa 'ahi 'o'ivajamajaho areri puurapo hiravuja'ina rena ro'eme sea ka'ene pura hija kajaho 'ahí'ahí vajamana. 3'E'eme pu ki'eme ira ka'ene vena sa'inijipo rene roariharene ea kwinu kwino puni haha 'ahi tirohara. 4Godoni 'Aveni ruha apene paranarena venaume pu ea maho'o aneja vene ira ani ani'ina 'wavara. 5'Ejume Jua ka'ene Godi oja mahi'ina ka'ene kwaa ani ani rena roajija ijí Jerusaremi hijara. 6'Ena'omo vea ka'ene 'oa kaji henareja ea mapoka kajija ahuma roe niho'o puruva retiana. Ijihuni maijaho ea 'oi'oi he'eju'e puni imaijino hine 'wavara. 7'Ejumakame pu oja pa'arena'e 'ee oja hwa'usahaume ijá 'wava Ikaho ichá vejo? 'Ú ea ka'ene ike 'wavukija Karari ora pane? 8Pu ichá'ina vene núni imaa ka'ene nú nahenuajino 'wavujaho nú hejo? 9Núa Patiani ore Miria ore Irami ore Mesopotemia ore Kapatosia Ponitasi ore Jutia ore Esia ore 10Pirijia ore Pamipiria Ijipiti vajina'omo ijí ore Ripia opuni kwaa Sairini rorine ea 'aho'a Romu ora 'ee Jua 'ee Jua puni tamana hene vejujihuna'e roajivara. 11Nú ea 'aho'a Kuriti ore 'ee Arapia ora 'avo pu hine núni imai Godira uneunecha mama'ina ka'ene venaji rone 'wavu 'wavara. 12'Enareja pu oja hwa'usaha niho'o puruva renaume aposaramapene oji'i ijá 'wava Ijaho iraki reno? 'wavara. 13'Enakaivo ea 'aho'a pu ijí matihe ijá 'wava Ike eakija 'waini vwea rukina'e ine nanamiu 'wavara.

Pitara Vu'a 'Waramajina

14'Ejume Pitara 'urine ea iropu ropu kwinu puni rira kajino nami'i kaivo ira ajira ijá 'umena Jutia ora 'ee ea maho'o Jerusaremi hijukije ataa apúsame nuni ira ike heha. Nara raka ka'ene 'wara'i vejukaho ja ea 'aho'a ijá 'wavo. 15Ja vwihajujaho ea ikija nanamiu roju kaivo pana. Iviamai sú'u sú'u vea hareha 'aha karakaro namijujaho ea pananamiura. 16Ikaho iraka ka'ene poropeti Joerura rone 'warumajina.

17Mwe'akara mai'o pa'are'i ve'eje raka ka'ene rehuniji Godira ika'ina 'waramana. Nara Nuni 'Avena ea mapoka samahakame joni harihija 'apahija Godoni 'waravi'ina rehuna 'ee joni kivasa raka ka'ene túna'i rehunijaho visoni kihuna 'ee joni ema ijija mai'o túna'i raka ka'ene rehunijaho navahi kihuna. 18Nara Nuni pwea ka'ene napara parua ijija Nuni 'Aveni samahakame ijí vea kajaho pu Nuni vu'a 'waravi'ina rehuna. 19Nara uneunecha ani'ina akúpa 'ahi vehuna 'ee aacha ani ani mwe'i najahuna 'ee 'aa 'ee vena 'ee venu'a ani rehuna. 20Vea na'ime nutuma nave masapa niho'o amapu'ura re'eje 'aa puna'i rena nahuna. Ijá re'amani túna'ijino Natohwijaho rohuna. 21Vea kajino ea irara Natohwi jihuni iha 'uraha 'ume'amajaho Hu ni'ajahuna 'wamana.
22'Enakúne Isureri orakije ike vu'akaho hami heha. Jesu ka'ene Nasareti ora ka'ene Godira nimaa vene iji pijahe ranavume roajihuni vaji huni aacha ani ani'ina ea areri pavejujija joni vaji venajaho ja ojono nihena kavu. 23Ike eakaho nitama Godira hena kamarena ni amairiaramana 'omo ja Hu ea sisesa mihume pu korosia 'ahi 'anaume kwamana. 24'Enakaivo Godira vejume Hu kú'o 'urinana. 'Enarena kwamasahe haha ka'ene hehunijaho pa'arenana. Kwamasahuri harurijara Hu 'unanahuna areri pana. 25'Enakaivo Tevitira nitama Hu rone 'waramarena ijá 'iama

Na ka'eju'e Natohwijaho nuni una'i na'ia mapoka hinu. Hu nuni ija mana'inija'i hinujihuna'e na oja pahianihuna. 26Ijihuni hahi nuni oja vajakaho niho'o teamanivu'e 'ee nuni mitara mari'umu. 'Eju'e nuni haha 'u'o 'ojuta hami hwehuna'e vwihaji'i hiju. 27Na niheju. A Nuni 'avena paranave va'e ruha ka'ene veni renujaho vahuna. Oni Ariramaijaho pamaka'eje sakara'ena. 28'Enakaivo A majama hihunijaho najihana. 'Ene na Oni una'i hi'ujara veje teamanima paranihuna 'iamana.
29Vwehu nune maki'eje na núni sasa rone 'waravuma. Tevitira kwavumakame ranava jihuni húijaho ikeho majama núni rori namo. 30Hu poropetia'omo Godira raka ka'ene nahama 'waramajaho hu he paraji'ina renana. Godira nahama 'waramajaho Hu vejakame Teviti oni amuhiji pini huni ruha apene hihuna 'waramana. 31Teviti túna'i raka ka'ene rehunijaho hu nihena kamarena hu Kerisora kwama 'urihuniji ronarena ijá 'iama

Huni 'Avena paranave va'e ruha ka'ene veni renujaho vahuna. Huni haha pasakarahuna 'iamana.
32Godira vejume Jesura 'urinaji nú maho'o nihena kavajihuna'e ja 'waravu. 33Godira vejume Hu Godoni ija mana'inija'i hinu. 'Eju'ukame Amora Huni 'Avena ka'ene nahama 'waramaji Hu mihu'ukame jara raka ka'ene iviamaa hena kavujaho Hura Huni 'Avena kaji usesamaana. 34Tevitiho nitama mai'o akúpa 'aha pavai'ini hu ijaho 'waramarena ijá 'iama Natohwijara nuni Natohwa ijá 'wama

Nuni ija mana'inika'i asuma hi'eje 35Nara Oni naka vena'e Oni omora hari hija 'wamana.
36Ijihuna'e 'warave ea mapoka ka'ene Isureri hijujaho niho'o hami hami he para'avara. Godira Jesu vejume Natohwa rene 'ee Keriso renana ka'ene jara icha 'ahi 'anaajina 'iamana. 37'Ejume pu ea kajipo ijí henareja pu oja 'urina parajume Pitaho 'ee apasorua 'aho'ijija ijá 'iava Nú ichá'ina ve'eja? 'iavara. 38Joni sisea vwihane aremamaa are'i kaivo ta'arohe Jesu Keriso oni iha 'ahijino toi sama'e joni sisea pa'are'amana. 'E'eje ja swara ka'ene Godoni 'Aveniji apeha. 39Ijí nahama 'warama kajaho jone 'ee joni harihipune 'ee ea ka'ene kwaa jojori hiju jihipune 'ee areri ea mapoka ka'ene núni Godi Natohwijara Huna'e 'umena ijihipuna 'iamana. 40'Ejume Hu vu'a 'aho'a 'u'o 'waramarena hu 'ejahie ijá 'iama Mwe'a kehuni siseijaho asinamie ruva'eje maraniama. 41Ea ka'ene vu'a kaji hene vejajija toi samahara. 'Ene ea ka'ene nimaa roji'ina mapoka (3,000) vea kajino huri rejara. 42'Enareja ijí apasorua kajipo najahajaho henareja pu veku veku ahuma hine siporua 'one 'ee puretia tuachame iji'i hijura.

Nimai Roji'inapo Hia Ka'ene Hijajina

43'Ejume Godira apasoru puni vaji aacha ani ani'ina ka'ene ea areri pavejujipo rejumakame ea mapoka ka'ene hija kajija oja hwa'usahara. 44Ea ka'ene ijí nimaa nimaa roji'ina kajija oja kwinu vwihane uneunecha mapokaka punijaho vajúsaravi'i hijara. 45'Ejume pu aneja vene puni kukua 'ee aachia 'eke 'imene ea ka'ene pivusahi'inijihi ni'ajihara. 46'Enareja veku veko Temiporui vaji ahuma hine vwiha kwino vwihane 'ee sea sea ijí va'e puretia tuachame ine 'ee 'iruma temarasahi'i oja kwisu reji'i ijura. 47Pu Godi ta'arohe ea 'ahopo pu kivajaho teamanavura 'ee Natohwijara veju'e ea veku veko nimaa rojujija huri 'umanami'i namana.