Act 3 | MCQ | STEP | Nusirea ape'eju'e pu siporua 'ona 'ojura'omo Pita'o Joni'o ajima va'e Temiporui siporua 'o'i va'ara.

‏ Acts 3

Irivi'ina Ka'ene Jariravi'ina Vejume Maranajina

1 Nusirea ape'eju'e pu siporua 'ona 'ojura'omo Pita'o Joni'o ajima va'e Temiporui siporua 'o'i va'ara. 2 Ea pina oahoni tea vaji irivi'ina'e roana'omo erapo kima apena va'e veko veko Temiporu sea vwicha jiami ranavura. Vwicha jiami ruha kajaho Mavarasa'ina 'wavura. 'Ena'omo ea ka'ene mumora siseraji'ina kajaho ijí vwicha jiama kajino hi'eju'e erapo ijí Temiporu kajino va'iro va'ukivi'i moni jariramuna. 3 'Ena'omo Pita'o Joni'o va'areja Temiporu vaji arui vejumakivi'i hu pu moni jariramana. 4 'Ejumakavi'i Pita'o Joni'o niima kanavi'i ijá 'wava Nú kúma 'wavara. 5 'Ejume hu unenu'u pina pununa'i apehuna vwihaji 'urí ahasirima kimana. 6 'Enakaivo Pitara ijá 'wama Na siriva 'ee korutia pa'ana kaivo raka ka'ene núnuna'i namuji na mahu. Jesu Keriso ka'ene Nasareti orijihuni ihiji 'urahi'i 'waravukúne 'urina namina va'a. 7 Huni ija mana'inija'i 'unama apene 'urijume ni'aha kwinu 'urina kajino huni mumora 'ee atoka kajija marasahe harura rejara. 8 'Ejume hu ohurikune namine aneja vene pu pu'úmo Temiporu vaji ohurikuna 'uraha oji'i Godi ta'arohara. 9 'Ene ea mapoka maho'o ka'eme hu 'uraha oji'i Godi ta'arohana. 10 Hu ea ka'ene mumora siseraji'ina ka'ene Temiporu vwicha jiami Mavarasa'ina 'wavuji hine monia'e jariravi'i hinujina kaivo iraki hu renaji kame puruvaretiume oja hwa'usahara.

Pitara Temiporu Vaji Vu'a 'Waramajina

11 'E'ejume Pita'o Joni'o aharu 'onamie nami'eme ea mapoka ninukujaha roe ijí Saramani oni sea kajihuni orota 'wavuji namina kame oja hwa'usahara. 12 'Ejume Pitara ijí kime eaka mapoka kajija ijá 'iama Isureri ore ja rakijihuna'e hine oja hwa'usahu'e niimaru kúnamúo? Núra núni harurijino veju'e eakaho maraju'e 'uraha onu rojare?

Pita'o Joni'o Tea Junahuni Vu'a 'Waramareja Irechamiajina

13 Ijaho Eparahami oni Godi 'ee Aisiki oni Godi 'ee Jekapi oni Godi 'ee núni sahiji jihipuni Godijara vejume Huni pwea Jesuni pinana 'urinana. Ea ka'ene ja apena Pairati oni una'i va'ume hu rana'i vejume ja Hu pavavara. 14 'Ene ja Ea ka'ene arimaijaho pataarohara kaivo ea ka'ene ea 'aniu'e kwamasahi'iniji mihuna ura renana. 15 'Ejume ja Ea ka'ene majama hihuni anesurijaho 'anaara. 'Enakaivo Godira vejume kú'o 'urinaji kavara'omo nú ijí rone nimaa 'waravu. 16 'Ena'omo nú Huni ihiji nimaa rojujihuna'e nú ijí Jesuni iha kaji 'urahi'i 'waravume ea ka'ene ja kame hejukaho maranana. 'Ene nimairoa ka'ene Huni vaji rena roajara vejume ea ikaho maho'o joni una'i marana paranana. 17 'Ena'omo vwehu nune ja puruva rena'eme ija'ina vejara. Areri joni ea mama'inapo vejaja'ina'e vejara. 18 'Enakaivo ikija Godi nitama poropetia 'waramarena ijá 'iamana. Huni Kerisora roe sisei hihunaka 'warumajaho iviamaa ijaho Hu vejume nimaa renana. 19 Joni sisea are mamaa'e are'i kaivo ta'arohe roha. 'Eje Godira joni sisea 'eke ato'arumama. 'Ejakame Natohwi jihuni una'i vea ka'ene joni oja sonahunijaho rena roama. 20 'Ejakame Hu Jesu Keriso ka'ene jonijihuna'e iji pijahajaho ranave joni roama. 21 Hu ijí akúpa 'ahi hi'eje Godira uneunecha maho'o ka'ene Huni poropetia arimaijihi puni ira vaji nitama 'waramajija veje marasaha parahuna. 22 Mosisira nitamatama ema ijá 'waramana. Joni Godi Natohwijara poropetia areri na'ina pina joni vwehipuni vaja kajino veje 'urihuna. 'Enakúne Hura raka 'warava he'avajaho hami he'avara. 23 Ea irara Poropetia kajihuni ira pahe'amajaho hu emaa puni vaja kajino 'anae pa'arehuna. 24 Ijaho ija'ina'e poropetia maho'o Samueri oni rene ijí kahi roa ijipo iviamaa raka ka'ene rena roe 'e'unukaho 'waruvara. 25 Ja poropetia kajihipuni harihija. 'Ene Godira vehuna ka'ene emahu jona'e nahama 'warama ja'ina'e iviamaa jona 'u'o venu. Hu Eparahami 'waramaja'ina Oni amuhipuni vajijino kachi'ina maho'o mwe'akino hijujija merajihuna 'wamana. 26 'Enajihuna'e Godira Huni pwea vejume 'urine amura joni roana'omo merajihakame ea mapoka joni 'unama siseijaho ta'arohe aré ranahuna.