Act 28 | MED | STEP | Wote, tᵾn mᵾi ila ekit omp, kai mundurmᵾn, wote pitmin mel kona ei, mbi tek Malda nᵾtᵾng.

‏ Acts 28

Malda Kona Ila Murmᵾn

1 Wote, tᵾn mᵾi ila ekit omp, kai mundurmᵾn, wote pitmin mel kona ei, mbi tek Malda nᵾtᵾng. 2 Kona ila mᵾi puⱡ wamp mbᵾ, tᵾn kᵾn uⱡ kai mbᵾ etᵾk, ik rungᵾndᵾk etᵾng. Wote ui ei kᵾn, kona ropa ᵾt itim ila, wamp nimbᵾ ndi, tᵾn numan ngᵾk kᵾn, ndip etᵾk kandrung. 3 Pol ndi, nde kat rᵾkᵾlpa, ndip ila tᵾpa oⱡa nduⱡnga kᵾn, wote wimbᵾ ti, ndip muⱡ ei ndi, roⱡnga ekit omba, Pol nga ki ila mᵾkᵾp rurum. 4 Mᵾi puⱡ wamp nimbᵾ ndi, kandrung mel, Pol nga ki ila, wimbᵾ ni konggilpa pitim ila kandᵾk kᵾn, wamp mbᵾ ndi, en enim nᵾk mel, “Wu ei, wamp ropa kondurum wu ei nda?” nᵾtᵾng. Wote wu ei, num kuta ila nu wᵾngi nangᵾm ndam, wote akup kont muⱡi nambᵾⱡmba,” nᵾtᵾng. 5 Wote Pol ndi, wimbᵾ ni pilinga, ndupa tᵾpa, ndip ila ruk ndurum. Wote, wimbᵾ ei ndi kep, Pol ropa uⱡ ti iti nᵾtᵾtᵾm mon! 6 Wote, mᵾi puⱡ wamp nimbᵾ ndi, Pol nga ki awᵾmba, muna koⱡmba nda, nᵾk pilik nokundᵾk morung ni, uⱡ ti iti nᵾtᵾtᵾm. Wote, numan ropᵾl rok, min ngᵾn mundᵾk, Pol kundᵾk, nᵾk mel, “Wu ei got nda?” nᵾtᵾng.

7 Wote, tᵾn murmᵾn ila nga wuldᵾng orunga nondpa kona ti titim. Ila nga wu Pupliyas nga kona ei, titim, kona ei nga wu nuim ei. Wu ei ndi, tᵾn numan kai pendpa, rawe etpa, tᵾl nga kun manga ponᵾng ombun moⱡmina, rumbᵾⱡ raldika omba purum. 8 Wu Pupliyas nga tipam ni, kui ou ti kandpa, manga tᵾpa rupⱡaima ila pitim. Pol ndi, rupⱡaima ila mba wu ei, atinga rondpa, ki raⱡ ndi, wu ei nga peng ila oⱡa ndupa ambuⱡpa, kui wu ei etpa titim. 9 Uⱡ ei itim ni, wamp mbᵾ ndi kandᵾk, kui peng itim wamp mbᵾ mek oⱡina, Pol ndi, etpa titim. 10 Wote, tᵾn mbin elimina, tᵾn mel kai mat ngorung. Wote, sip ila tᵾn kun kuⱡmin nᵾk, mel mbᵾ nga puⱡi rok, oⱡa ndurung.

11 Wote, kalimp raldika omba puⱡnga kᵾn, tᵾn Aleksandriya kona ila nu sip kat mbi tek, ‘Got Pᵾklᵾm,’ nᵾtᵾng, kᵾⱡ ila tᵾn purmun. Sip ni kᵾⱡ, kona kᵾpkᵾ rurum ui kit ei kᵾn, kona ila ku moⱡpa, tᵾpa mundrum. 12 Wote tᵾn mbun, Sirakus kona peng ou ila moⱡmina, rumbᵾⱡ raldika omba purum. 13 Wote, kona ila moⱡpᵾn int mbun, Rekiyum kona ila ruk purmun. Wote utᵾma orunga, nu por orunga kᵾpkᵾ wunt rurum ila, rumbᵾⱡ ui raⱡ tᵾp mundpᵾn, wote mbun Puteyoli kona kel ila, ruk purmun. 14 Kona ila, mondpa pili wamp mat, kandᵾp telmina, wote wamp mbᵾ, tᵾn waldᵾk rᵾp rop muⱡamin nilingina, kapⱡa nimbun moⱡmina, rumbᵾⱡ 7 omba purum. I etᵾp ombun, wote Rom kona ila ruk urmᵾn. 15 Rom kona ila mondpa pili wamp morum mbᵾ, tᵾn urmᵾn ik ei pilik ok, Apiyus mel rop kona kᵾn, Ur Manga Raldika anggᵾtᵾm kona kᵾⱡ ila ok, tᵾn kᵾnmᵾn nᵾk, nokundᵾk morung. Pol ndi, wamp kᵾⱡ kandpa, Got kᵾn angge nimba, wote elim nga orunga ronduⱡ titim.

Pol Rom Mba Murum

16 Wote Pol ndi, Rom kona ila ruk purum. Ei kᵾn, Pol elim pepa muⱡangga nᵾk, el wu tenda ti ndi, Pol rᵾp itangga nᵾk, tᵾk mundrung. 17 Wote, rumbᵾⱡ raldika omba puⱡnga, Pol ndi, Jura wamp mbᵾ nga rᵾp wu morung mbᵾ, wi ropa ruk tᵾpa, mou rᵾmin nitim. Wote, wu mbᵾ ok mou roⱡmina, Pol ndi, wu kᵾⱡ kundpa, nimba mel, “Na nga Angmᵾn! Na ndi, tᵾn nga wamp rᵾⱡaip mbᵾ nga mbi tᵾp mana ndup, wote tᵾn nga anda kouwᵾmᵾn mbᵾ nga, mbo uⱡ etᵾng uⱡ mbᵾ nga tᵾp roi ndup kᵾn, numan pendᵾp uⱡ ti iti nᵾtᵾt mon. Na wei nuwᵾ, Jerusalem kona ila tᵾk imp molk, Rom kona ila wamp kᵾⱡ nga ki ila ngᵾk, ruk ndurung. 18 Wote, na nga puⱡ orunga, waldᵾk pilik, kai etᵾk kᵾn, na wak ruing etᵾng. Ei nambuⱡ emel, na rok kunding ei nga uⱡ ⱡawa ti, na kᵾn kandᵾk ti natᵾtᵾng. 19 Wote, ik ei, Jura wamp kᵾⱡ ndi, tᵾk roi nduⱡina kᵾn, na itimp uⱡ ti pili napilip, wote wu nuim mumuk Sisa ei ndi, na nga ik ei pilangga nit. Ei na nga, Jura wamp kᵾⱡ kᵾn, ik ti nᵾmp kit mundi nᵾmᵾndᵾr ku. 20 Uⱡ ei mel, na kᵾn penim nᵾmp kᵾn, na enim kandᵾp nimp pilip kᵾn, enim wᵾi nint. Nambuⱡ emel, Isrel wamp ndi, wamp tenda ti, nokundurmᵾn ei nga nᵾmp pilmba kᵾn, na imp molk, tᵾk kan ngonmin,” nitim. 21 Wote Pol kundᵾk, nᵾk mel, “Tᵾn Juriya kona ila wamp ti ndi, mon rok, nim nga ik nᵾk ngui nganggᵾrᵾng. Wu angmᵾn wamp ti ndi ok, ik timan ei rok, wote nim kᵾn ik nᵾk etᵾng uⱡ ei nga, tᵾn kopᵾt kum ila, pili nᵾpᵾtmᵾn, mon! 22 Wote tᵾn ndi, nim nga numan ila ik nana, tᵾn pilmin ei nga numan ngonmᵾn. Ei nambuⱡ emel, kona mbila wamp pora mormin mbᵾ ndi, nim nga wu rᵾⱡaip kᵾⱡ kᵾn, ik ou ndupa nᵾk kᵾn, tᵾk mana ndᵾnmᵾn,” nᵾtᵾng.

23 Wote, ui ti kᵾn, uimin nᵾk Pol kᵾn kanggᵾp rorung. Ui ei kᵾn, wamp ou ndupa, Pol murum kona ila oⱡina, rumbuldi rᵾngmᵾ raⱡ mba rumbuldi, Pol ndi, wamp mbᵾ, Got nga wamp tᵾpa mumuk rui uⱡ ei nga, ik puⱡ petᵾm mbᵾ mel, nimba piral ndurum. Pol ndi, wamp mbᵾ nga numan orunga ropa rut ndupa, Jisas mondᵾk pileing nimba kᵾn, Moses nga Mi Ik na, painui wu ik mon rorung mbᵾ, ekit tᵾpa nimba ngurum. 24 Wamp mat, ik nitim nimbᵾ, mondᵾk pᵾtᵾng. Wote wamp mat, pilik ti natᵾtᵾng. 25 Ik pilik ti natᵾtᵾng wamp kᵾⱡ, numan elpa elpa pᵾtᵾng ei ndi elinga, mou rok morung uⱡ ei, wak rok kelik purung. Wamp kᵾⱡ, kelik ping ei nga, Pol ndi, kuimp tepa ik tenda ti nimba mel, “Unt Muⱡnga Wingti ei ndi, ik kupa kat, tᵾn nga anda kouwᵾmᵾn kᵾⱡ kᵾn, painui wu Aiseiya nga keta ila nimba mel,

‘Nim pukᵾn, wamp kᵾⱡ kundkᵾn, Enim ik ei pili piling, wote ik puⱡ ei, pilik ti nᵾtᵾng. Enim kᵾnmin nᵾk ti iting, wote mong ei ndi, kᵾni nᵾkᵾning. 27 Nambuⱡ emel, enim wamp kᵾⱡ nga, numan mbo orunga ku raⱡpa petᵾm, Ei ndi, kum raⱡ ila ik piling ei nga rᵾng kuⱡing, Wote, mong raⱡ ndi, mel ti kᵾni nᵾkᵾning. Ei mel mon ndam, mong raⱡ ndi kandᵾk, wote, kum raⱡ ndi ik pilik, numan ei ndi, pilik mbi nduk, Got elim kᵾn rukᵾr wangina, elim ndi, wamp mbᵾ etᵾp kai mondᵾmba,’” nitim.
28 Wote, Pol ik nimba pora ndupa, nimba mel, “Enim akup pᵾnmin ei, Got nga wamp etpa tᵾmba nombuⱡa rung ik ei, wamp rᵾⱡaip elpa kᵾⱡ kᵾn purum. Wamp kᵾⱡ ndi, ik ei pilik ting!” nitim. [ 29 Pol ik kᵾⱡ nimba pora nduⱡnga kᵾn, Jura wamp mbᵾ, ekit puk, en enim ruk ila ik palk ik mat nᵾtᵾng.]

30 Pana raⱡ mel, Pol manga ti, rarᵾp ropa titim nila pepa moⱡpa, wamp mat, elim kᵾning orung mbᵾ kᵾn, uⱡ kai mbᵾ mint itim. 31 Got nga wamp tᵾpa mumuk rui uⱡ ei nga, ik puⱡ mbᵾ nimba ngumba, wote wamp ti ndi, mi pindi nᵾpᵾndᵾtᵾm ila, ronduⱡ mundpa moⱡpa, wamp mbᵾ, Nuim Jisas Kraist nga ik mbᵾ mbo inditim.