Mat 16 | MED | STEP | Perisi wu mat kᵾn, Sarusi wu mat kᵾn, Jisas murum ila rᵾk ok, Jisas ei kupa, Got nga kangᵾm nda nᵾk, oⱡa tᵾk muⱡ ila kᵾning pilik muⱡ ila uⱡ rᵾpndi ti itangga kᵾnmin, nᵾtᵾng.

‏ Matthew 16

Jisas Ndi Uⱡ Rᵾpndi Ti Itangga Kᵾnmin Nᵾtᵾng

1 Perisi wu mat kᵾn, Sarusi wu mat kᵾn, Jisas murum ila rᵾk ok, Jisas ei kupa, Got nga kangᵾm nda nᵾk, oⱡa tᵾk muⱡ ila kᵾning pilik muⱡ ila uⱡ rᵾpndi ti itangga kᵾnmin, nᵾtᵾng. 2 Wote Jisas ndi, punt ropa nimba mel, “Kona ant ei mana purum ei kᵾn, enim ndi, nᵾk mel, ‘Muⱡ ei kunt enim ei, kona kai etmba,’ nᵾtmin. 3 Wote, ipri unt ei kᵾn, ‘Mᵾkᵾlmᵾ rumbᵾⱡ morum ei kᵾn kona romba,’ nitmin. Kona ant mba muna, kona romba ei oⱡa muⱡ ei kandᵾk kᵾn, tᵾk mendᵾtmin. Wote enim ndi, akup penim uⱡ mbᵾ kandᵾk, tᵾk mindi namindᵾtmᵾn. 4 Enim uⱡ kit mbᵾ etᵾk, Got pep rui nᵾri wamp mbᵾ ye! Na uⱡ rᵾpndi ti itamba kᵾnmin ninmin ei? Ei mon! Got ndi, Jona kᵾn uⱡ rᵾpndi itim ei mel, na uⱡ rᵾpndi ti, wote itamba kᵾning,” nitim. Ei mel nimba pendpa, wu ni kᵾⱡ wak ropa kelpa purum.

Perisi Na Sarusi Wu Kᵾⱡ Nga Yis Ei

5 Wote Jisas kᵾn, elim nga kitip kᵾni wu ni kᵾⱡ kᵾn, num Galili poⱡa rok noi orunga purung. Wote, rᵾng nuing ei nga bret mat, mek pi naprᵾng. 6 Wote Jisas ndi, wu kᵾⱡ kundpa nimba mel, “Enim Perisi na, Sarusi wu kᵾⱡ nga Yis ei nga, tᵾk mendᵾk muⱡᵾi!” nitim. 7 En enim ol tek nᵾk int yant etᵾk nᵾk mel, “I nᵾnᵾm, ei nambuⱡ emel, tᵾn bret ti, mep ui nawᵾnmᵾn ei nga ninim nda?” nᵾtᵾng.

8 Wu kᵾⱡ nᵾtᵾng ik ni, Jisas tᵾpa mendpa waldpa nimba mel, “Enim bret ti, mek ui nawᵾng ei nga, nambuⱡ emel, ol wal tenmin? Enim Got kᵾn mondᵾk pᵾtmᵾn ei, ronduⱡ pi naprᵾm kant ei ka! 9 Enim tᵾk mindi namindᵾnmᵾn ye? Na bret 5 kᵾⱡ puk rop nguⱡmba wu 5000 rᵾng endᵾtᵾng. Wote, rᵾng mana titim ei, kowa wal namba iti rok peka rondrᵾng ye? 10 Muna bret 7 kᵾⱡ ila, wu 4000 rᵾng endᵾtᵾng. Wote, rᵾng norung mana titim ei, kowa wal namba iti rok peka rondrᵾng ye? 11 Na bret mendpᵾⱡ ei nga ik ti, ni nanᵾnt. Ei nambuⱡ emel, pilik kun iti natᵾnmᵾn? Enim Perisi na, Sarusi wu kᵾⱡ nga yis ei, tᵾk mendᵾk muⱡᵾi!” nitim. 12 I nitim ila, kitip kᵾni wu ni kᵾⱡ, yis bret ila mundᵾrmᵾn ei nga ni nᵾndᵾtᵾm. Ya Perisi na, Sarusi wu kᵾⱡ nga, ik mong wamp mbo endᵾtmin kᵾⱡ nga, tᵾk mendᵾk muⱡeing nimba nitim ik ei, akil tek pilik kun etᵾng.

Pita Ndi, Jisas Nga Nimba Mot Ndurum

13 Jisas kᵾn, elim nga kitip kᵾni wu kᵾⱡ kᵾn puk, Sesariya nga kona peng Pilipai nga tetᵾm kona tila puk molk, elim nga kitip kᵾni wu kᵾⱡ, waldpa nimba mel, “Wamp mbᵾ ndi, Muⱡᵾl Wu Kupa ei, kundᵾk wu nam ninmin?” nitim. 14 Wu nimbᵾ ndi, punt rok nᵾk mel, “Wamp mat ndi, wamp nu tindi wu Jon ninmin mat ndi, wu Ilaija ninmin mat ndi, wu Jerimaiya muna, painui wu ti ninmin,” nᵾtᵾng.

15 “Wote enim ndi, na wu nam ninmin?” nimba wu ni kᵾⱡ wuldᵾtᵾm. 16 Wote, Saimon Pita ndi, ik punt ropa nimba mel, “Nim Wu Kraist, nim kont moⱡpa, mint pi Wu Got ei nga Kangᵾm,” nitim. 17 Ni kᵾn, Jisas ndi, ik punt ropa nimba mel, “Wu Jon kangᵾm Saimon ye! Got ndi, nim memp pindilinga, nim ik kupa nᵾn. Ya mᵾi kona ila wamp ti nga ronduⱡ tila tᵾkᵾn, ni nanᵾn mon. Ik nᵾn ei, na nga muⱡ kona Wu Tipam ei ndi, nim nimba nguⱡnga nᵾn. 18 Ei kᵾn, Pita ei, nim ik kupa ei kundᵾp nᵾnt, nim ku mel muⱡana, ku pol ila na nga manga wingti ei, rᵾⱡimp wamp mbᵾ, tᵾp oⱡa ndup mundimp. Wote, wamp kul uⱡ ei ndi, manga wingti ei ropa mana ndui nandᵾmba. 19 Muⱡ ila tᵾpa mumuk rui kona ei nga kumba ki kᵾⱡ, nim nguimp. Nim ndi, ya mᵾi kona ila mi run uⱡ mbᵾ, oⱡa muⱡ kona ila mi ku romba. Ya mᵾi kona ila, kapⱡa nin uⱡ mbᵾ, oⱡa muⱡ ila kapⱡa ku nimba,” nitim. 20 I nimba, kitip kᵾni wu ni kᵾⱡ kundpa, wamp ti kandᵾk, elim Kraist ei, ni nᵾnᵾi nitim.

Jisas Elim Koⱡpa Kont Mba Ei Nga Nimba Mot Ndurum

21 Ui ni kᵾn, puⱡ mondpa, elim nga kitip kᵾni wu ni kᵾⱡ kᵾn, nimba mot ndupa, na wi Jerusalem pamba rᵾp wu na, wu peng mumuk na, mi ik mbo wu na mbᵾ nga ki pol ila mindil mam nomp, wote rok kundangina, rumbᵾⱡ raldika omba pangga! Wote Got ndi, ⱡoporpa kont mundᵾmba.

22 Wote Pita ndi, ik ni pilpa, Jisas ᵾldᵾ tila ekit tᵾpa, ik ngumba nimba mel, “Nuim ye! Uⱡ mbᵾ nim kᵾn omba ei, Got ndi, pendpa kilangga. Nin uⱡ mbᵾ, nim kᵾn omba pi nᵾpangga!” nitim. 23 Jisas tᵾpa ropᵾl ropa, Pita ni tᵾpa pendpa ik ngumba, “Seitan ye! Na mor ila kelkᵾn pa! Nambuⱡ emel, na nga mbi nombuⱡa mam ei imp mon? Nim nga pilkᵾn nᵾn ik kᵾⱡ, Got kᵾn ui nawᵾnᵾm mon. Nim wamp nga numan ila pilkᵾn nᵾn,” nitim.

24 Jisas ndi, ik ei nimba kᵾn, wote elim nga kitip kᵾni wu kᵾⱡ kundpa nimba mel, “Wamp ti ndi, na kᵾn uimp nimba pilim ndam, elim nga mul uⱡ ei wak ropa, elim nga nde peta ei koma ropa, na punt mel kandpa, pep ropa akil tepa wangga! 25 Wamp ti ndi, elim nga kont mul uⱡ ei, ambuⱡpa gi ndum ndam, uⱡ nga kᵾnt nga kont mul uⱡ ei ti natᵾmba. Wote, wamp ti ndi, elim nga mul uⱡ ei na nga nimba wak rom ndam, uⱡ nga kᵾnt nga kont mul uⱡ ei tᵾmba. 26 Wamp ti ndi, ya mᵾi kona ila mel mbᵾ nga etpa nomba, elim nga min ei nimba etpa yant tᵾmba. Ei kapⱡa iti natᵾmba. Ei kᵾn, namba mel mat ndi, int ndupa ngumba, elim nga min ei etpa tᵾmba? 27 Muⱡᵾl Wu Kupa ei, elim nga anggelo mbᵾ kᵾn, tipam nga rᵾpndi pol ila omba, tᵾn wamp mbᵾ uⱡ etmin mbᵾ mel, punt ropa elpa elpa ngumba. 28 Enim ik kupa ei, kundᵾp nᵾnt, ya wamp mormin mbᵾ nga mat, kuⱡi nᵾⱡangina, Wu Nuim Mumuk ei, elim nga Tipam nga rᵾpndi pol ila Nuim moⱡpa, wangga kᵾning,” nitim.