Mat 17 | MED | STEP | Rumbᵾⱡ 6 omba puⱡnga, Jisas ndi, Pita, kᵾn wu ᵾngᵾn ᵾngᵾn Jeims kᵾn, Jon ni kᵾⱡ tᵾpa mepa, komnga mong oⱡa pi tila, monduⱡnga kou morung.

‏ Matthew 17

Jisas Nga Kᵾng Ei Elpa Ti Mel Kurum

1 Rumbᵾⱡ 6 omba puⱡnga, Jisas ndi, Pita, kᵾn wu ᵾngᵾn ᵾngᵾn Jeims kᵾn, Jon ni kᵾⱡ tᵾpa mepa, komnga mong oⱡa pi tila, monduⱡnga kou morung. 2 Molk kandrung ni, Jisas ni etpa mon munduⱡnga, elim nga kuimp keta ni, kona ant mel rᵾⱡang purum. Wote, elim nga muⱡ rᵾrᵾm nimbᵾ omba, kurᵾmᵾⱡa raⱡpa rᵾⱡang ndi ᵾlt nitim. 3 Wote, kitip kᵾni wu raldika ni kᵾⱡ ndi, kandrung mel, Moses kᵾn Ilaija raⱡ okᵾⱡ, Jisas kᵾn ik ni kᵾⱡ morunggil. 4 Ei kᵾn, Pita ndi, Jisas kundpa nimba mel, “Nuim ye! Tᵾn ya ila mbo ngᵾn tᵾnᵾm kant ei kᵾn, nim ndi, kapⱡa nᵾkᵾn pin ndam, na ndi, ya ila manga kouwᵾ raldika ramp, ti nim mel, ti Moses mel, ti Ilaija mel,” nitim.

5 I nimba moⱡnga, kopa rᵾⱡang pi kat omba, morung kona ni, panda ropa pelinga, kopa rᵾk ting ila ik ti, ekit omba nimba mel, “Ya ei, na nga numan ngur kang ei. Nanim kandᵾp numan ngᵾmp mor. Elim ik nim ei, kum tek pilᵾi!” nitim.

6 Kitip kᵾni wu ni kᵾⱡ ik ei, pilik min ngᵾn mundᵾk rumaⱡi petᵾng. 7 Wote, Jisas ndi omba, elim nga ki ei ndi, wu ni kᵾⱡ minda ndupa, “Enim mundmong iti natᵾk, oⱡa muⱡᵾi!” nitim. 8 Tᵾk oⱡa nduk kandrung ei, wamp wei ti, kᵾni nakᵾndrᵾng, Jisas mendpᵾⱡ murum.

9 Komnga ila mana ok mel, Jisas ndi, wu ni kᵾⱡ kᵾn, mi tepa nimba mel, “Enim uⱡ kanmin ni mel wamp ti kᵾn timan rok ni nᵾnᵾi! Na Muⱡᵾl Muⱡᵾl Wu Kupa ei kuⱡamba, wote ⱡoporpa tᵾpa oⱡa mondum ei kᵾn, kandᵾk neing!” nitim.

10 Wote, kitip kᵾni wu ni kᵾⱡ ndi, waldᵾk nᵾk mel, “Mi ik mbo wu mbᵾ ndi, Ilaija kuimp tepa omba nᵾtmᵾn ndi, namba elinga nᵾtmᵾn?” nᵾtᵾng.

11 Nilingina ik ni, punt ropa nimba mel, “Ik mong ti Buk Wingti ila petᵾm ei ndi, Ilaija kuimp tepa omba, wamp mbᵾ tᵾpa kun etmba. 12 Wote na ndi, enim ik ti kundᵾp namp ei, Ilaija ni kor urum ni, wote wamp ndi, kandᵾk poⱡ ndui nandᵾk, rok pint panda etᵾng. I etᵾng ei mel ku, na Muⱡᵾl Wu Kupa ei, wamp mbᵾ nga ki pol ila mindil nuimp!” nitim. 13 I nitim ei kᵾn, kitip kᵾni wu ni kᵾⱡ ndi, ik ninim ei, wamp nu tindi wu Jon nga ninim pᵾnt nᵾk tᵾk mendᵾtᵾng.

Jisas Ndi Kang Ti Kur Kit Murum Ei Etpa Titim

14 Wote yant ok, wamp num morung nila orung ei kun, wu ti omba Jisas kᵾn mura kopᵾtᵾng ropa rumaⱡi pepa nimba mel, “Nuim ye! Na nga kang ei kaimp kun ka! Kang ei, ropa wᵾlᵾ munduⱡnga, purpur ropa ndip ila kep, nu num na mbila kep, ropa rᵾk ndurum. 16 Kang ei mep, nim nga kitip kᵾni wu kᵾⱡ kᵾn oⱡᵾmba, etᵾk ting ei pilik rundrung,” nitim.

17 Jisas ndi, punt ropa nimba mel, “Enim na mondᵾk pili napilik, numan mbo pi nᵾpi wamp mbᵾ ye! Na enim kᵾn moⱡᵾp mint mbi ei? Enim wamp mbᵾ nga na mindil nondᵾp mint mbi ei? I kang ei, na mor ila mek wᵾiya!” nitim. 18 Wote kang ni, mek oⱡina, Jisas ndi, tᵾpa pendpa kur kit ni, ik nguⱡnga, kur ni kang ei, wak ropa puⱡnga, ni kᵾn ku kui ni wang nitim.

19 Ei kᵾn, kitip kᵾni wu ni kᵾⱡ ndi ok, Jisas mo rok waldᵾk nᵾk mel, “Tᵾn kur kit ei, mak rᵾp tᵾp mundmin nᵾmp etᵾp koi nimᵾn ei, namba ei mel em nda?” nᵾtᵾng.

20 Ik ni, punt ropa nimba mel, “Ei nambuⱡ emel, enim nga Got kᵾn mondpa pili ei, ronduⱡ pi napᵾrᵾm. Ik kupa ei enim kundᵾp nᵾnt, enim Got kᵾn mondᵾk pilik muⱡing uⱡ ei, nde kaipa mong ei mel kapⱡa pem ndam, int komnga ei kundᵾk, ‘Nim akᵾkᵾn pukᵾn noi ila mul nana mba moⱡmba.’ Wote nim ndi i etkᵾn uⱡ mat kapⱡa itᵾn ku. 21 [Kur kit mbᵾ, wei ok pi nᵾping, enim atinga rok, rᵾng mowi pek eng ei ndi, kapⱡa makrᵾk munding,” nitim.]

Jisas Elim Koⱡmba Ei Nga Aldpa Nitim

22 Wote, kitip kᵾni wu ni kᵾⱡ ok, Galili kona ila tᵾk tenda etᵾng. Ni kᵾn, Jisas ndi, wu kᵾⱡ kundpa nimba mel, “Muⱡᵾl Wu Kupa ei, imp molk, tᵾk wu mat ngangina, wu mbᵾ ndi, rok kunding. Wote, ant raldika omba pangga, ⱡoporpa tᵾpa oⱡa mondᵾmba,” nitim. Wote, kitip kᵾni wu ni kᵾⱡ ik ei, pilik munt mindil tᵾtᵾng.

Manga Wingti Ila Ku Moni Takis Ngui Uⱡ Ei

24 Wi Kaperniyum yant oⱡina, manga wingti ku takis tᵾtmᵾn wu kᵾⱡ ndi ok, Pita waldᵾk nᵾk mel, “Nim nga ik mbo wu ei, manga wingti ku takis ngorum muna mon?” nᵾtᵾng.

25 Pita ndi, “Ngorum ei ka!” Nimba pendpa, manga nila murᵾk puⱡnga, Jisas ndi, kuimp tepa nimba mel, “Saimon ye! Nim etᵾk pᵾn mel nant? Ya mᵾi kona wu peng mumuk mbᵾ, ku takis ei nam kᵾn tᵾtmᵾn? Mᵾi puⱡ wamp mbᵾ kᵾn tᵾtmᵾn muna, wamp elpa mbᵾ kᵾn tᵾtmᵾn?” nitim.

26 Pita ndi, nimba mel, “Wamp elpa mbᵾ kᵾn tᵾtmᵾn,” nitim. Jisas ndi, punt ropa nimba mel, “I pᵾnt ei kᵾn, mᵾi puⱡ wamp mbᵾ, ku takis ngui ngᵾngmin. 27 Wote tᵾn ndi, ku takis ngui ngᵾngmin ndam, tᵾn kᵾn, pilik kit piling ei mon. Wote nim pukᵾn, met num ᵾldᵾ ila oma uk mundana, oma kuimp tepa omba pem oma ei nga keta ei. Ambulkᵾn aka etkᵾn kᵾni, ku moni ti, pemba ku ei ndi, mek pukᵾn tilinga, ku takis ngui,” nitim.