Mat 3 | MED | STEP | Ui nimbᵾ kᵾn, wamp nu tindi wu Jon ni Jura kona kui waka ronggᵾt Got nga ik ei puⱡ mondpa, wamp mbᵾ kᵾn nimba mel, “Got nga wamp tᵾpa mumuk rui kona ei nundpa onum kᵾn, en enim nga uⱡ kit mbᵾ tᵾk mbuldung ngᵾi!” nitim.

‏ Matthew 3

Wamp Nu Tindi Wu Jon Got Nga Ik Puⱡ Nimba Ngurum

1 Ui nimbᵾ kᵾn, wamp nu tindi wu Jon ni Jura kona kui waka ronggᵾt Got nga ik ei puⱡ mondpa, wamp mbᵾ kᵾn nimba mel, “Got nga wamp tᵾpa mumuk rui kona ei nundpa onum kᵾn, en enim nga uⱡ kit mbᵾ tᵾk mbuldung ngᵾi!” nitim. 3 Jon ni wu ei, painui wu Aisaiya ndi, nitim wu ni, nimba mel,

“Kona kui waka ila, wamp ti wi ropa, ‘Wu Nuim ei tᵾn kᵾn omba ei nga nombuⱡa mam ei kᵾtᵾk kai itᵾi! Nombuⱡa rondung ei, kun pangga,” nitim.
4 Jon nga muⱡ mbal wal pᵾki pᵾkrᵾm mbᵾ, kng kamel nga kᵾng mbila rok rambrᵾng. Wote, kng kᵾng ei, kᵾp kan rurum. Rᵾng nui mel, uipᵾ nguimba mbᵾ ropa numba, pilma muⱡ mbᵾ tᵾpa numba itim. 5 Elim nga ik nitim ni kᵾnmin nᵾk, Jerusalem ila wamp na, Jura wamp rᵾⱡaip na, nu Joran ᵾldᵾ ila wamp rᵾⱡaip na mbᵾ orung. 6 En enim nga uⱡ kit etᵾng nimbᵾ nᵾk para nduⱡina, nu Joran ila nu tinditim.

7 Perisi na, Sarusi wu minal Jon ndi, nu tᵾndangga nᵾk, orung ni kandpa, i nitim, “Enim kimbuⱡa mbᵾ ye! Enim Got ndi, popᵾⱡ tᵾpa mundᵾmba enim ila enim nᵾng nᵾk, ping nimba wamp nam ndi nitim? 8 Nim nga uⱡ in mbᵾ ndi, nim nga numan ropᵾⱡ run uⱡ ei, tᵾpa mot ndangga. 9 Wote, mindil tᵾpa mundᵾmba uⱡ ei na, Aparam nga pundun kungan ei, nᵾmp kᵾn na, nᵾng nᵾmp mbi nᵾk pili nᵾpᵾlᵾi! Na ndi, enim kundᵾp namp, ‘Ku mbᵾ mana, Got ndi, etpa Aparam nga wamp pundun kungan kapⱡa randᵾmba!’ 10 Rui ti ndi, nde ei nga puⱡ pilkan kᵾⱡ, rung ndumba ei nga tᵾpa kun etpa morum. Nde ti, mong kai ropa iti natᵾm nde ei, rui rok tᵾk, ndip ila munding. 11 Na enim nu ila mint nu tindint ei ndi, nim kupa numan ropᵾⱡ rᵾn nᵾmp ent. Wote, akil tepa omba wu ei ndi, Muⱡnga Wingti kᵾn, ndip kᵾn pendpa nu tᵾndᵾmba. Wu ei, na mel kapⱡa mon! Wu Nuim ei nga ronduⱡ ei, kot oⱡa mel, na wu mana orunga ei ndi, elim nga kᵾmp rᵾk mel raⱡ kep, tᵾp mimp mel kapⱡa mon. 12 Wu ei ndi, wit ropa muⱡ petᵾm mana, ropa nᵾnou rorum mbᵾ apurᵾrmᵾn ni mel, mana wamp mbᵾ i etpa, apᵾrpa wamp kit kai mbᵾ, tᵾpa elpa elpa mondᵾmba. Wit ropa muⱡ pem mbᵾ tᵾpa, manga etpa, wit ropa nᵾnou rom mbᵾ tᵾpa, ndip tila kaⱡmba, ndip ei kumbᵾⱡi nambᵾrᵾm!” nitim.

Jon Ndi, Jisas Nu Tinditim

13 Jon wamp nu tinditim ui ni kᵾn, Jisas wil Galili orunga moⱡpa, omba nu Joran ila omba, Jon ndi elim nu tᵾndangga nimba urum. 14 Ni kᵾn, Jon ndi numan pilpa onum ei, wak rangga nimba Jisas kundpa, “Na wu mana ei, nim ndi nu tᵾndᵾn nᵾmp kel rondᵾp mor ndi, wote na ndi, nim nu tᵾndamp nᵾn ei, etᵾk pilik nᵾn mel nant?” nitim.

15 Ni Jisas ndi, ik punt ropa nimba mel, “Akup nᵾnt uⱡ ei mel, peng piyangga. I etᵾp mbuⱡ uⱡ ei, Got nga numan ila pilangga kapⱡa etmba,” nitim. Wote Jon ndi, Jisas nitim ni mel pilpa teng ndupa itim.

16 Wote Jon ndi, nu tᵾndᵾlnga, Jisas nu mil ni wak ropa ekit oⱡnga, wi muⱡ ei, wei guⱡ gaⱡa nimba kumba tilinga, Got nga Muⱡnga ni kᵾi Imil mel ndui nimba mana omba, Jisas nga peng ila rᵾⱡang ngumba murum. 17 Ni kᵾn, wi muⱡ ila ik ti ekit omba nimba mel, “Ya wu ei, na nga kangᵾm mendpᵾⱡ ei, nanim kandᵾp numan ndi kont,” nitim.