Rom 15 | MED | STEP | Tᵾn mondpa pili ila ronduⱡ pum wamp mbᵾ ndi, mondpa pili ronduⱡ pi napᵾm wamp mbᵾ nga mbun tᵾng uⱡ mbᵾ, tᵾp rᵾpᵾndamin! Tᵾn nga orunga mendpᵾⱡ pili nᵾpᵾlmᵾn mon!

‏ Romans 15

Kraist Nga Numan Pᵾtᵾm Ei Mel Pilmin

1 Tᵾn mondpa pili ila ronduⱡ pum wamp mbᵾ ndi, mondpa pili ronduⱡ pi napᵾm wamp mbᵾ nga mbun tᵾng uⱡ mbᵾ, tᵾp rᵾpᵾndamin! Tᵾn nga orunga mendpᵾⱡ pili nᵾpᵾlmᵾn mon! 2 Tᵾn nga angmᵾn mbᵾ, etpᵾn numan kai pindamina, en enim nga mondpa pili orunga etᵾp, ronduⱡ mundmin. 3 Tᵾn pᵾtmin ni, Kraist ndi, el elim nga orunga mendpᵾⱡ pili nᵾpᵾtᵾm mon. Wote, Buk Wingti ei ndi, nimba mel,

“Wamp mat ndi, nim kᵾn ik kit nᵾk ngurmin nimbᵾ, na kᵾn onum,” nitim.
4 Unt Buk Wingti ila rorung ik mbᵾ ndi, tᵾn wamp mbᵾ, mbo inding pilik rorung. Buk Wingti ei ndi, tᵾn etpa numan orunga ronduⱡ mundpa elinga, Got ndi, tᵾn wote etpa rukᵾr tᵾmba ei nga, ronduⱡ mundpᵾn nokundpᵾn muⱡmin.

5 Tᵾn nga ronduⱡ ei, Got tenda ei kᵾn tᵾtmin, wote elim ndi ku, tᵾn nga numan orunga tᵾpa tenda etpa ronduⱡ munduⱡnga mormun. Ei kᵾn, Got ndi, akup enim tᵾpa rᵾpᵾndangga kᵾn, Kraist Jisas nga uⱡ itim mbᵾ mel, pep rok etᵾk, numan tenda ei mint pilik muⱡeing. 6 Ei mel, etᵾk molk kᵾn, enim numan tenda pilik, keta tenda pangga, Got nga mbi paka rundᵾi! Ei elim Got, wote tᵾn nga Nuim Jisas Kraist nga Tipam ei.

Wamp Rᵾⱡaip Elpa Mbᵾ Kᵾn Rᵾnang Ik Kai Ei Purum

7 Kraist ndi, tᵾn wamp mbᵾ pora, numan ngumba etpa, elim kᵾn rukᵾr tᵾpa, Got mbi ou ngurum. Ei mel ku, enim ndi, ᵾngᵾnᵾl mat, numan nguk rukᵾr tᵾk numan tenda mundᵾk muⱡᵾi! 8 Ei kᵾn, na ndi, enim kundᵾp nᵾnt! Kraist unt kont moⱡpa, kongun itim uⱡ mbᵾ, Jura wamp kᵾⱡ nga nindpa itim. Uⱡ ora ndurum ei, Got ndi, unt anda kouwᵾmᵾn kᵾⱡ kᵾn, mᵾi ropa nitim ik mbᵾ, wak rui narᵾpa, ambuⱡpa oⱡnga, Kraist ndi, etpa kupa inditim. 9 Wote, wamp rᵾⱡaip elpa mbᵾ, Got wamp kont kurum ei nga, mbi paka rundeing nimba, etpa kapⱡa inditim ku. Uⱡ ei nga, Buk Wingti ei ndi, ei mel nᵾtᵾm,

“Ei nga na ndi, wamp rᵾⱡaip elpa mbᵾ kᵾn moⱡᵾp, nim nga mbi paka ruimp. Wote na ndi, kinan nᵾmp, nim nga mbi paka rundimp,” nitim.
10 Aldpa, Buk Wingti ila nimba mel,

“Enim wamp rᵾⱡaip elpa mbᵾ, Got nga Jura wamp mbᵾ kᵾn, ambulk palk muⱡᵾi!” nitim.
11 Aldpa, Buk Wingti ruk ting tila, nimba mel,

“Enim wamp rᵾⱡaip elpa mbᵾ pora, Nuim ei nga mbi paka rundamin!
Wote, wamp mbᵾ pora, elim nga mbi paka rundamin!” nitim.
12 Wote aldpa, painui wu Aisaiya ndi, nimba mel,

“Jesi nga wu pundun ti, wote oⱡa omba. Elim oⱡa omba, wamp rᵾⱡaip elpa mbᵾ, rᵾp etmba. Wote, wamp rᵾⱡaip elpa mbᵾ ndi, rᵾp wu ei, nokundᵾk mondᵾk pilik muⱡing,” nitim.
13 Got kᵾn muⱡmin nimbun nokᵾndᵾrmin uⱡ ei nga puⱡ ei, Got elim morum. Wote elim mondᵾk pᵾtmin uⱡ ei ndi, enim etpa numan wang ndangga, ambulk palk muⱡeing. I etᵾk kᵾn, wote Muⱡnga Wingti nga ronduⱡ ila, enim muⱡ kona timin nᵾk mondᵾk pᵾtmin numan ei, etpa ronduⱡ mundangga!

Muⱡnga Wingti Ndi, Pol Ronduⱡ Monduⱡnga Kongun Itim

14 Na nga angmᵾn! Na nga numan ei ndi, kupa pᵾnt ei, enim uⱡ kai mbᵾ etᵾk mormin. Enim numan mbo kai tek mormin ei ndi, wamp mat mbo inding ei nga kapⱡa mormin. 15 Wote, ya mon runt ila, uⱡ mat ila na ik ronduⱡ mundᵾp nint. Ei nambuⱡ emel, Got nga wamp pol ti uⱡ ei, na ngurum. Ei unt nit ik mbᵾ nga, wote aldpa enim nᵾmp ndoimp rondunt ku. 16 Na ik ronduⱡ mundᵾp nint uⱡ ei, nambuⱡ emel, na Got ndi, etpa rukᵾr tᵾpa kᵾn, Kraist Jisas nga kongun wu moⱡᵾp, wamp rᵾⱡaip elpa mbᵾ kᵾn, kongun iteimp nimba, Got ndi, na rukᵾr titim. Ei nga, na ik ronduⱡ mundᵾp nᵾt. Got nga Rᵾnang Ik Kai, na kᵾn oⱡnga pilip tᵾp, wote wu pris mel moⱡᵾp, ik puⱡ mbᵾ nᵾndᵾt. Uⱡ ei etᵾp kᵾn, wamp rᵾⱡaip elpa mbᵾ, Muⱡnga Wingti ei ndi, etpa kun kai mundangga, angge nᵾk mel kai, Got mbᵾ ndi, numan ngumba titim ni mel, wamp kᵾⱡ kᵾn ei mel ku itangga!

17 Ei nga, na kongun et ei, Kraist Jisas kᵾn kunda etᵾmbᵾⱡ. Got nga kongun ei, na endᵾt ei nga, na kapⱡa numan kai pilimp mint. 18 Kraist elim ndi, na nga ik nit, wote kongun kai it mbᵾ, tᵾpa rapundᵾⱡnga, na kᵾn mendpᵾⱡ uⱡ itim mbᵾ nga ronduⱡ mundᵾp nilmba, wamp rᵾⱡaip elpa mbᵾ ndi, Got nga ik ei, pilik teng ndurung. 19 Wote, Muⱡnga Wingti ndi, na kᵾn ronduⱡ mundpa, kongun elinga, na ronduⱡ nguⱡnga uⱡ rᵾpndi mat etᵾp, Kraist nga Rᵾnang Ik Kai ei, Jerusalem kona ila, puⱡ mondᵾp nᵾmp mbo, met Ilirikum kona ila rukᵾr pur. 20 Wamp ti nga manga rakᵾmba pilpa, koⱡ numba tetᵾm ila manga rᵾkimp ei, enimp rorum. Wote, Kraist nga mbi pili napᵾtmᵾn kona mbila, Rᵾnang Ik ei, mbo nimp ei nga numan minal ngur. 21 Ei mel ku, Buk Wingti ei ndi, nimba mel,

“Wamp mat, Got nga ik ei pili napᵾtmᵾn wamp mbᵾ, wote kᵾning. Wote wamp mat, Got nga ik ei pilik ti natᵾtmin wamp mbᵾ, wote pilik ting,” nᵾtᵾm.

Pol Rom Kona Mbi Nimba Tᵾpa Kun Itim

22 Na enim kᵾn, ui ou ndupa, uimp nᵾmp pᵾt. Ei wote, na kongun nᵾnt mbᵾ ndi, imp moⱡnga, na enim kᵾn uimp mel kapⱡa iti nᵾtᵾtᵾm. 23 Ei kᵾn na ndi, enim omp kᵾnimp ei nga, pilmba pana ou ndupa omba purum. Wote akup, ya kona mor mbila, na nga kongun mbᵾ etᵾp pora ndunt. 24 Wote akup, nondpa omp kᵾnimp nᵾmp pᵾnt. Na Spein kona ila mbi ei nga, unt enim kᵾn omp, ik rungᵾndᵾp, ambᵾⱡᵾp paⱡᵾp moⱡᵾp, wote na mbi nᵾnt kona ila, tᵾk rᵾpᵾndangina mbi. 25 Akup mendpᵾⱡ, na Jerusalem kona ila mbi, Got nga wamp mbᵾ tᵾp rᵾpᵾndimp mbi. 26 Masaroniya kᵾn, Akeiya kona raⱡ, Got nga wamp mbᵾ, en enim nga numan ei ndi, Got nga wamp kurpa mat, Jerusa-lem mormin mbᵾ, tᵾp rapᵾndᵾk, en enim nga mel mat, kᵾmp tᵾpᵾn nguimin nᵾng. 27 Ik Kupa ei, wamp kᵾⱡ en enim ndi, numan kai pendᵾk, uⱡ ei iting mel eng. Wote, ik ti ndi pepa kᵾn, tᵾk rupᵾndi uⱡ eng ei, elimina mel eng. Ei nambuⱡ emel, Jura wamp kᵾⱡ, Muⱡnga orunga memp tᵾtmin uⱡ kᵾⱡ, wamp rᵾⱡaip elpa kᵾⱡ kᵾn kunda tᵾtmin. Wote, wamp rᵾⱡaip elpa kᵾⱡ, en enim nga mel mbila, memp tᵾtmin kᵾⱡ, mek puk, Jura wamp mbᵾ tᵾk rᵾpᵾnding. 28 Wote na kongun ou ei, etᵾp pendᵾp, wote ku moni tindint mbᵾ, wamp nᵾnt mbᵾ ngump pendᵾp kᵾn, na Spein kona ila mbi omp kᵾn, enim omp kandᵾp mbi. 29 Na pᵾnt ei, na enim kᵾn unt ei kᵾn, Kraist nga memp ei na kᵾn, peka ropa muⱡangga, enim kᵾn uimp.

30 Angmᵾn, na enim kᵾn ik nᵾmp piral ndup kᵾn, ei mel nᵾnt. Tᵾn nga Nuim Jisas Kraist kᵾn, wote Muⱡnga nga wamp numan ngui uⱡ ila pilik molk, na nga numan orunga pilip, Got kᵾn atinga rᵾk rᵾk ronduⱡ ropᵾn, muⱡ ti nᵾtmin. 31 Atinga rok kᵾn, Juriya kona ila mondpa pili nᵾpili wamp mormin kᵾⱡ ndi, na rok uⱡ ti iting. Ei nga, Got ndi, na rᵾp itangga nᵾk atinga rᵾi. Wote Jerusalem mbo kongun itimp uⱡ ei, Got nga wamp mormin mbᵾ ndi, na nga kongun et mbᵾ kandᵾk numan ngeing. 32 Wote, ei mel tangina, Got ndi, kapⱡa nim ndam, na enim kᵾn numan kai pilip omp, enim kᵾn ronduⱡ tᵾp, muⱡ tᵾp moⱡᵾp mbi. 33 Numan wang ndui nga Puⱡ Wu Got ei, enim kᵾn pora muⱡangga! Ei Kupa.