Rom 3 | MED | STEP | Uⱡ ei nga, wote Jura wamp mbᵾ ndi, namba uⱡ kai ti ambulk molk kᵾn, wamp mat tᵾk mana ndurmin? Kᵾng kupti uⱡ ila ronduⱡ ti petᵾm nda?

‏ Romans 3

Uⱡ Kit Mbᵾ Ndi, Uⱡ Kai Mbᵾ Tᵾpa Mana Ndui Nandᵾmba

1 Uⱡ ei nga, wote Jura wamp mbᵾ ndi, namba uⱡ kai ti ambulk molk kᵾn, wamp mat tᵾk mana ndurmin? Kᵾng kupti uⱡ ila ronduⱡ ti petᵾm nda? 2 Got ndi, Jura wamp mbᵾ, uⱡ elpa elpa kai mat ngurum. Wote, elim nga ik ei, Jura wamp mbᵾ, kuimp tepa ngumba kᵾn, rᵾp indeing nitim.

3 Wote, Jura wamp mat ndi, Got nga ik ei, pilik pep rui narᵾrᵾng. Uⱡ i etᵾng ei, Got elim nga ik kupa ei, wak romba nda? Ei mon! 4 Ei kapⱡa mon! Wamp mbᵾ pora ik kol rormin, Got tenda ei mint, rᵾk rᵾk ik kupa nᵾtᵾm. Ei nga, Buk Wingti ila nimba mel,

“Got nim nga ik ei kun mint petᵾm. Ei nga, wamp ti ndi, nim kᵾmp tᵾpa ⱡawa petᵾn nimba mel, kapⱡa mon,” nᵾtᵾm.
5 Wote, tᵾn nga uⱡ kit mbᵾ ndi, Got nga uⱡ kun kai mbᵾ mepa pena ila ekit om nda? Wote tᵾn ndi, namba nimin? Got ndi, tᵾn nga uⱡ kit etmin mbᵾ nga punt rondrum uⱡ ei, kapⱡa mon ye! (Na nᵾnt ik ei, wamp nga pilpa kungᵾndi ila nᵾnt ye!) 6 Ei mon! Wote, Got wu kun kai mon ndam, wamp nga uⱡ kit etmin mbᵾ, etpa kᵾmp tilinga mel nant? 7 Wote, na nga ik kol rop nᵾt ik ei ndi, Got nga ik kupa ei, mepa pena ila ekit om kᵾn, Got mbi ou tᵾmba. Ei mel pem ndam, nambuⱡ emel, na uⱡ kit et wu ei nimba kᵾn, kᵾmp tᵾmba? 8 Uⱡ ei mel, wamp mat ndi, tᵾn nga nᵾndᵾk mel, na ndi, enim kundᵾp nimp mel, “Uⱡ kit mbᵾ tamina kᵾn, uⱡ kai mbᵾ omba.” Nᵾk nᵾtmin uⱡ ei, kupa mon! Wamp i iti mbᵾ nga puⱡ ei, kᵾmp tᵾnᵾm uⱡ ei, etmba mel enim.

Mᵾi Kona Ila Wamp Kun Kai Ti Muⱡi Nambrᵾm

9 Wote tᵾn Jura wamp mbᵾ ndi, namba uⱡ kai ti ambulk molk kᵾn, wamp elpa mat tᵾpᵾn mana ndurmin? Ei mon! Tᵾn ndi, nimbun mel, uⱡ kit mbᵾ nga ronduⱡ ei ndi, tᵾn Jura wamp na, wamp rᵾⱡaip elpa na mbᵾ mana tᵾpa pora ndurum. 10 Wote Buk Wingti ei ndi, nimba mel,

“Wamp kun kai ti mᵾi kona ila muⱡi nambrᵾm mon! 11 Wamp ti ndi, pilpa kungᵾndi kai mat kandpa ti natᵾtᵾm, Got kuruk kandᵾk, ti natᵾtmᵾn, mon. 12 Wamp mbᵾ pora, Got kupa ei wak rok kᵾn, uⱡ kit mbᵾ minal etᵾk molk, kit mondᵾrmin. Wamp ti kep, uⱡ kai mat iti natᵾtᵾm, mon! 13 Wote wamp mbᵾ nga keta min mbᵾ, wamp on kut na ni mel, anga rok tek, ik kol puⱡi rok, wamp mat nᵾk kit mondᵾk etmin uⱡ ei ndi, wimbᵾ kalt na ti ndi, wamp ropa kondrum uⱡ ni mel nᵾtmin 14 Rᵾk rᵾk ik kit pundma rui mbᵾ mint nᵾk, wamp mat nᵾk kit mondᵾk mbun nguk etmin. 15 Tᵾkrᵾk mint wamp mat kᵾn popᵾⱡ mondᵾk, rok kondᵾk etᵾng. 16 Rᵾk rᵾk wamp puⱡi etᵾk kit mondᵾk, mbun puⱡi nguk etᵾng. 17 Wote wamp mat kᵾn numan tenda kandᵾk ti natᵾk, Got kᵾn mundmong iti natᵾtmin,” nᵾtᵾm.
19 Tᵾn akup pᵾnmᵾn, mi ik ei nga nᵾtᵾm uⱡ ei, mi ik ei nga mana orunga mormun wamp mbᵾ kondpa nᵾtᵾm. Ei nga, wamp ti ndi, nimba mel, “Na wamp kun kai ti mor i ni nanᵾmba, mon,” nᵾtᵾm. Kona mbila pora, tᵾn Got nga kuimp keta ila nga ⱡawa iti wamp mbᵾ, mint mormun. 20 Ei kᵾn, wamp ti ndi, mi ik kᵾⱡ pep ropa kᵾn, Got nga kuimp keta ila, kun kai muⱡi nambᵾrᵾm mon! Mi ik ei ndi, tᵾn nga uⱡ kit etmᵾn mbᵾ, tᵾpa ora ndurum.

Kraist Kᵾn Mondpa Pᵾtᵾm Wamp Ni, Kun Kai Ei Morum

21 Ei nga, akup Got ndi, wamp mbᵾ, elim kᵾn etpa kun kai mondrum uⱡ ei, pena ila ekit omba pora ndurum. Uⱡ ei, mi ik pep rui uⱡ ila ui nᵾwᵾrᵾm mon. Nombuⱡa mam elpa tila urum. Uⱡ ei, Painui wu na, Moses na wu mbᵾ ndi, Got nga mi ik mbᵾ, rok nᵾk ekit ndurung. 22 Got nga nombuⱡa mam ei, Jisas Kraist kᵾn mondᵾk pitmin wamp mbᵾ, Got ndi, wamp mbᵾ kundpa, wamp kun kai mbᵾ nᵾtᵾm. Uⱡ elpa tila, Got ndi, wamp mbᵾ, apᵾrpa kun kai ni nandᵾtᵾm, mon. 23 Tᵾn wamp mbᵾ pora, uⱡ kit mbᵾ etmᵾn. Uⱡ ei ndi, Got nga uⱡ eng nui kai mbᵾ timin mel mon. 24 Got ndi, elim nga wamp pol ti uⱡ ila, tᵾn nga uⱡ kit mbᵾ wak rundrum. Uⱡ ila, tᵾn Kraist Jisas kᵾn mondᵾp pilmin ndam, Got ndi, tᵾn wamp mbᵾ, kundpa kun kai nimba. 25 Got ndi, Jisas tᵾpa munduⱡnga omba, koⱡpa mema oi ndurum uⱡ ei, Jisas mondᵾk piling wamp mbᵾ nga uⱡ kit mbᵾ, wak rundangga nimba itim. Uⱡ ila, Got ndi, elim nga uⱡ kun kai etᵾm mbᵾ, etpa mot ndurum. Unt Got ndi, wamp mbᵾ kᵾn raka nimba kongun etpa, uⱡ kit etᵾng mbᵾ, tᵾkrᵾpa punt ropa ngui ngᵾnggᵾrᵾm. 26 Wote, akup ui ei kᵾn, Got ndi, elim nga uⱡ kun kai mbᵾ, tᵾpa pena ila pendᵾmba etpa kᵾn, wamp mbᵾ nga uⱡ kit etmin mbᵾ wak rondrum. Uⱡ ila, Got ndi, elim nga uⱡ kun kai mbᵾ, elim kᵾn petᵾm nimba tᵾpa mot ndupa, wote Jisas kᵾn mondᵾk pitmin wamp mbᵾ, etpa kun kai mondrum.

27 Uⱡ ei nga, mbi paka rui uⱡ ei nga puⱡ ei nant? Tᵾn mi ik pep rormun nimbun mbi paka ruimin ye? Akup wamp ti ndi, elim nga mbi paka romba mel mon. Mondpa pili uⱡ ei mendpᵾⱡ pilmin. 28 Akup tᵾn ndi pᵾnmᵾn ei, mondpa pili wamp ei mint, Got ndi, wamp kun kai nᵾtᵾm. Mi ik pep rui uⱡ ila mon! 29 Uⱡ ei mel, Got ei, Jura wamp mbᵾ nga mint nda? Wamp rᵾⱡaip elpa mbᵾ nga, Got ti mon nda? Ei mon! Got ei, wamp mbᵾ nga pora morum. 30 Got tenda morum ei ndi, kᵾng kupti wamp na, kᵾng kupti nᵾpti wamp na mbᵾ pora, mondpa pili uⱡ ila mint kandpa, wamp mbᵾ etpa kun kai mondrum. 31 Ei kᵾn, tᵾn ndi, mondpa pili uⱡ ei kai nimbun, mi ik ei, mon ni nandpᵾn kᵾn, etpᵾn ronduⱡ mundmᵾn.