Rom 4 | MED | STEP | Unt Aparam ni, wu murum ei, tᵾn Jura wamp rᵾⱡaip mbᵾ nga anda kouwᵾ ei murum. Wu ei, tᵾn mel kapⱡa murum ei nga, tᵾn ndi, wu ei nga akup namba nimin?

‏ Romans 4

Got Ndi, Aparam Nga Mondpa Pili Uⱡ Ei Kun Kai Nitim

1 Unt Aparam ni, wu murum ei, tᵾn Jura wamp rᵾⱡaip mbᵾ nga anda kouwᵾ ei murum. Wu ei, tᵾn mel kapⱡa murum ei nga, tᵾn ndi, wu ei nga akup namba nimin? 2 Aparam ndi, uⱡ kun kai mat elinga, wamp mbᵾ ndi, kundᵾr kai pᵾtᵾng ndam, elim nga mbi ei, wamp mbᵾ paka roⱡnga, wote Got nga kuimp keta ila i iti natilinga. 3 Nambuⱡ emel, Buk Wingti ila nimba mel, ‘Aparam ndi, Got kᵾn mondpa pitim uⱡ ila, Got ndi, Aparam kundpa, wu kun kai ei!’ nitim.

4 Uⱡ ei mel, wamp ti kongun etpa kᵾn, mel mat titim ni, wei gem ti natᵾtᵾm, mon. Kongun etᵾm uⱡ ila nga punt ropa tᵾtᵾm. 5 Wote, wamp nam ti, uⱡ kai mbᵾ iti natᵾpa, uⱡ kit etmin wamp etpa, kun kai mondrum Got ei, mondpa pᵾtᵾm uⱡ ila, Got ndi, wamp ei kun kai nᵾtᵾm. 6 Unt Depit ndi, nimba mel, “Wamp nam ti, uⱡ kai mat iti natilinga, Got ndi, kun kai nᵾtᵾm ndam, wamp ei numan kai pilangga,” nitim.

7 ‘Got ndi, wamp namin mat nga uⱡ kit mbᵾ, wak rondum nda, wamp mbᵾ ambulk palk muⱡeing. Wote, wamp mbᵾ nga uⱡ kit mbᵾ, pendpa kelpa aldpa pili napᵾtᵾm. 8 Got ndi, wamp nam ti nga uⱡ ⱡawa etᵾm mbᵾ nga kᵾmp rui narᵾrᵾm wamp ei, ambuⱡpa paⱡpa muⱡangga!” nᵾtᵾm.

9 Ambuⱡpa pᵾl uⱡ ei, kᵾng kupti wamp mbᵾ nga mint, mon! Wote, kᵾng kupti nᵾpti wamp mbᵾ nga kunda ku. Nambuⱡ emel, Buk Wingti ila nimba mel,

“Got ndi, Aparam nga mondpa pitim uⱡ ei kandpa kᵾn, Got ndi, Aparam wu kun kai ei,” nitim.
10 Got ndi, Aparam kundpa, wu kun kai nitim uⱡ ei, Aparam ni, kᵾng kupti uⱡ ei itim kᵾn, muna kupti napᵾtᵾpa murum kᵾn, nitim nda? Kᵾng kupti napᵾtᵾpa murum ei kᵾn, Got ndi, wu kun kai ti nitim. 11 Aparam ni, unt kᵾng kupti nᵾpti kᵾn, Got kᵾn mondpa pitim ila, Got ndi Aparam wu kun kai ei nitim. Uⱡ ila nga, Got ndi, kandpa kᵾn, kᵾng kupti uⱡ to ei, kuimp tepa Aparam nimba ngurum ila uⱡ ei itim. Ei nga, wamp namin mat, kᵾng kupti napᵾtᵾk, Got kᵾn mondᵾk pilingina, kun kai nitim wamp mbᵾ nga tipam ei, Aparam morum. 12 Aparam Got kᵾn kuimp tepa mondpa pilpa, wote kᵾng kupti uⱡ ei itim. Ei nga, wamp namin mat, Got kᵾn mondᵾk pilik, kᵾng kupti uⱡ ei etmin. Wamp mbᵾ nga tipam ei, Aparam ku morum.

Got Nga Nimba Mᵾi Rurum Uⱡ Ei Mondpa Pili Wamp Mbᵾ Nga Pora

13 Unt Got ndi, Aparam kᵾn, elim nga pundun mbᵾ kᵾn, nimba mᵾi ropa mᵾi kuimp tepa punum mbᵾ pora nguimp nitim. Uⱡ ei, Aparam nga mi ik pep rurum uⱡ ila mon! Aparam ndi, Got kᵾn mondpa pilpa kun kai murum uⱡ ila mendpᵾⱡ itim. 14 Ei mel ku, wamp namin mat mi ik mbᵾ, pep rok eng mbᵾ mint. Got ndi, nimba mᵾi ropa mel mat nguⱡnga ndam, mondpa pili uⱡ ei, wei nᵾwᵾ tiyangga kᵾn, Got nga nimba mᵾi rurum uⱡ ei, ronduⱡ pi napᵾⱡnga. 15 Ei nga, mi ik mbᵾ, rok puⱡa rormun. Ei kᵾn, punt ropa, Got nga popᵾⱡ ei, mepa orum. Wote, mi ik ei, pi napilinga ndam, wamp mbᵾ ndi, mi ik mbᵾ, rok puⱡa ronmin ni nandilmina.

16 Got ndi, Eiparam poⱡ tᵾpa kᵾn, wamp pundun, wote oⱡa uing mbᵾ nga nimba mᵾi rurum. Uⱡ ei nga, Got ndi, mel mat to rondpa wamp teing nitim mbᵾ, Got kᵾn mondᵾk pilik, mel mbᵾ kapⱡa ting. Mi ik ei mint pilik, pep rok kᵾn, mel mbᵾ ti nᵾting mon. Aparam nga mondpa pitim uⱡ ei mel, wamp mat eng ndam, Got ndi, mel mbᵾ ngumba. Aparam ni wu ei, tᵾn wamp mbᵾ nga pora anda kouwᵾ kuimbal ei morum. 17 Uⱡ ei nga, Buk Wingti ei ndi, nimba mel,

“Na ndi, nim etᵾp wamp minal mbᵾ nga anda kouwᵾ ei mondunt,” nitim.
Ei kᵾn, nimba mᵾi rurum ik ei, Got nga kuimp keta ila ronduⱡ mba petᵾm. Aparam mondpa pitim Got ei ndi, wamp kui mbᵾ, etpa kont mondpa, mel mat ti nᵾtᵾtᵾm mbᵾ, nimba oⱡa tᵾpa etᵾm.
18 Got nga uⱡ etmba pilpa nitim nombuⱡa mam ei, Aparam kᵾni nᵾkᵾndrᵾm. Buk Wingti ei ndi, nimba mel, “Nim wamp rᵾⱡaip minal mbᵾ nga anda tipam ei muⱡin,” nitim. Ei kᵾn, Aparam moⱡpa puⱡnga, pana l00 mel nondpa itim. Wote, ambᵾm Sera wenda itim ku. Wamp raⱡ wenda anda etᵾnggil ku ei nga, wote mondpa pili uⱡ ila ronduⱡ purᵾnggil. Ik ei, roldᵾnga mondpa pilpa nokundpa moⱡpa kᵾn, “Wamp rᵾⱡaip minal oⱡa uing mbᵾ nga anda tipam ei murum,” nitim. 20 Got ndi, Aparam kᵾn, uⱡ wote pemba nitim uⱡ mbᵾ, Aparam ni pilpa kᵾn, mondpa pili uⱡ ei, wak rui nᵾrᵾrᵾm mon! Mondpa pili uⱡ ila moⱡpa kᵾn, Got nga mbi paka rondpa mint murum. 21 Unt Got ndi, uⱡ wote itimp nitim mbᵾ, Aparam ndi, pitim ei, Got ndi, etmba mint nimba pitim. 22 Uⱡ ila nga, Aparam mondpa pitim uⱡ ei, Got ndi, kandpa kᵾn, Aparam ni wu kun kai ti,” nitim. 23 Buk Wingti ila nimba mel, “Got ndi, Aparam kundpa wu kun kai,” nitim. Ik ei, Aparam mint kundpa ni nᵾndᵾtᵾm mon. 24 Ik ei, tᵾn wamp namin mat, Got kᵾn mondpᵾn pᵾtmᵾn mbᵾ kundpa nitim. Ei Got ndi, Jisas etpa tᵾpa kont mundrum Nuim ei nga, Got ndi, tᵾn nga mondpa pili uⱡ ei, kun kai nimba. 25 Got ndi, Jisas tᵾpa munduⱡnga kᵾn, tᵾn wamp mbᵾ nga uⱡ kit mbᵾ, wak rondpa kᵾn kurum. Wote, Jisas on kona ila ⱡoporpa, tᵾpa kont mundrum uⱡ ei, tᵾn wamp mbᵾ, Got kᵾn kun kai muⱡmin nimba itim.