Rom 5 | MED | STEP | Ei nga akup, tᵾn Got kᵾn mondᵾp pᵾtmᵾn uⱡ ila, Got ndi, tᵾn wamp mbᵾ, kun kai nᵾtᵾm. Uⱡ ila nga, tᵾn nga Nuim Jisas Kraist ei ndi, Got kᵾn etpa numan tenda pendilinga mormun.

‏ Romans 5

Got Ndi, Tᵾn Wamp Mbᵾ Kundpa Kun Kai Nᵾtᵾm

1 Ei nga akup, tᵾn Got kᵾn mondᵾp pᵾtmᵾn uⱡ ila, Got ndi, tᵾn wamp mbᵾ, kun kai nᵾtᵾm. Uⱡ ila nga, tᵾn nga Nuim Jisas Kraist ei ndi, Got kᵾn etpa numan tenda pendilinga mormun. 2 Wote, wu tenda ei ndi, tᵾn mondᵾp pᵾtmᵾn uⱡ ila, Got nga wamp poⱡ ti uⱡ ila mepa rukᵾr puⱡnga akup mormun. Mondpa pili ei ndi elinga, Got ndi, tᵾn etpa eng nondᵾmba. Ei nga, ambᵾⱡᵾp paⱡpᵾn nokundpᵾn mormun. 3 Uⱡ ei nga mint mon, tᵾn mbun kandᵾp tᵾtmᵾn ei kᵾn, ambuⱡpᵾn paⱡpᵾn ku mormun. Ei nambuⱡ emel, mbun kandᵾp tᵾtmᵾn mbᵾ ndi elinga, tᵾn Got nga uⱡ mbila ronduⱡ mbun mormun. 4 Ronduⱡ mbun mormun uⱡ ila, Got ndi, pilpa kai pᵾtᵾm. Wote, pilpa kai pᵾtᵾm uⱡ ei ndi, tᵾn etpa peng kont tᵾmba nᵾmp pilpᵾn nokundᵾp mormᵾn. 5 I nᵾmp pitmin uⱡ ei ndi, tᵾn mbun ti natᵾtmᵾn. Ei nambuⱡ emel, Got ndi, elim nga wamp numan ngui uⱡ ei tᵾn nga mundmong ila, Muⱡnga Wingti nga ronduⱡ ei ndi, oi ndupa pinditim.

6 Tᵾn unt wening elinga, pilip rundᵾp murmᵾn ei kᵾn, Kraist ni, tᵾn wamp meka rui mbᵾ nga Got ndi, ui pinditim ila kurum. 7 Wamp ti ndi, wamp kun kai ti nga rapundpa koⱡmba uⱡ ei nga mbun etpa tetᵾm. Wote, wamp ti ndi kapⱡa, wamp kai ti nga tᵾpa rapundpa koⱡmba uⱡ ei, kapⱡa elinga mint. 8 Wote, tᵾn uⱡ kit mbᵾ pikᵾ, tepᵾn murmᵾn ei kᵾn, Kraist ni, tᵾn nga nindpa kurum! Ni kᵾn, Got ndi, tᵾn numan ngorum uⱡ ei nga ronduⱡ ei, tᵾn tᵾpa ora ndurum.

9 Elim kurum uⱡ ei ndi, tᵾn Got kᵾn etpa kun kai mundrum. Ei nga akup, tᵾn pilip kun etᵾp mormun ei, Got nga popᵾⱡ ei om kᵾn, tᵾn etpa peng kont tᵾmba. 10 Tᵾn unt, Got nga el rui wamp kᵾⱡ murmᵾn ei, wote elim nga kangᵾm kurum uⱡ ei ndi, tᵾn etpa, elim nga wamp mᵾn kᵾⱡ mundrum. Akup tᵾn, Got nga wamp mᵾn kᵾⱡ mormun ei kᵾn, Kraist nga uⱡ nga kᵾnt nga kont morum uⱡ ei ndi, Got ndi, tᵾn rᵾk rᵾk etpa peng kont tᵾmba ei nga mormᵾn. 11 Wote, ei mint mon! Got ndi, tᵾn nga Nuim Jisas Kraist ei kᵾn itim uⱡ ila, Kraist ndi, tᵾn etpa, Got kᵾn mᵾn mundrum. Uⱡ ei nga, tᵾn Got kᵾn ambᵾⱡᵾp paⱡᵾp mormᵾn.

Andam Kᵾn Kraist Raⱡ Nga Ik Petᵾm Mel

12 Ei nga, ya mᵾi kona ila, wu tenda ti ndi, ⱡawa elinga, uⱡ kit mbᵾ rukᵾr urum. Wote, uⱡ kit ei ndi, wamp kui nga uⱡ ei mepa urum. Uⱡ puⱡ ila, wamp kaⱡpa tᵾpa urum ei kᵾn, wamp kui nga uⱡ ei pepa mint urum. Ei nambuⱡ emel, wamp mbᵾ pora, uⱡ kit etᵾng ei nga. 13 Mi ik kᵾⱡ ngui ngᵾngi kᵾn, uⱡ kit mbᵾ, unt kuimp tepa pitim. Wote, mi ik mat pi napᵾtᵾm kona mbila, uⱡ kit mbᵾ, Got ndi, kandpa kui etᵾm. 14 Wote, Andam nga murum ui ei kᵾn omba, Moses moⱡpa kurum ruk ui ila, wamp kui nga uⱡ ei ndi, wamp mbᵾ pora rᵾp itim. Wote Andam ndi, Got nga ik ei tᵾpa roi ndupa, uⱡ kit itim ei mel, iti natᵾtᵾng wamp mbᵾ pora, wamp kui nga uⱡ ei ndi, rᵾp itim. Wote, wu akil tepa omba ni nga, Andam ni, unt to tᵾndpa murum.

15 Wote Andam ndi, itim uⱡ kit ei kᵾn, Got nga wamp poⱡ tᵾtᵾm uⱡ raⱡ elpa elpa. Wu tenda ei nga uⱡ kit ila wamp minal korung uⱡ ei kupa. Wote, Got nga wamp poⱡ ti uⱡ ronduⱡ ila, Jisas Kraist wu tenda ei, Got ndi, wamp mbᵾ kᵾn, wei gem nguⱡnga, wamp minal nga ⱡawa mbᵾ, wak rundrum ila, wamp kui nga uⱡ ei, tᵾpa mana ndurum. 16 Andam wu tenda ei nga uⱡ kit tenda itim ila punt ropa ngurum uⱡ ei, Got nga wamp kᵾmp ti uⱡ ei ndi, wamp minal nimba kit monduⱡnga kolk mint ormᵾn. Wote Got ndi, tᵾn wei gem ngurum uⱡ ei, Kraist ndi, tᵾn wamp mbᵾ nga uⱡ kit minal etmin mbᵾ, pendpa kelpa etpa kun kai mondpa, kont mul uⱡ eng nui kai ti ngurum. 17 Wu tenda ei nga uⱡ kit itim ei ndi, wamp kui nga uⱡ ei ndi, wamp mbᵾ pora rᵾp itim. Wote, wu tenda Jisas Kraist nga itim uⱡ ronduⱡ ei ndi, wamp kui nga uⱡ ei, tᵾpa mana ndurum. Ei nga, wamp mat Got ndi, kun kai muⱡeing nimba etpa tᵾtᵾm wamp mbᵾ, rᵾk rᵾk Kraist kᵾn kont puk molk mint ping.

18 Ei kᵾn, wu tenda ei nga uⱡ kit itim ila mᵾi kona wamp mbᵾ pora kit morung. Ei mel ku, Kraist nga uⱡ kun kai tenda itim ei ndi, mᵾi kona wamp mbᵾ pora, etpa kun mundpa kont mul uⱡ ei ngurum. 19 Wu tenda ei nga ik tᵾpa roi ndurum uⱡ ila wamp mbᵾ pora kit morung. Ei mel ku, wu tenda ei nga ik pilpa ti uⱡ ei ndi, wamp minal Got kᵾn etpa kun kai randᵾmba.

20 Tᵾpa roi ndui uⱡ ei, kakina etmba ei nga, mi ik ei, mim etpa ngurum, uⱡ kit kakina itim. Wote, uⱡ kit ei ndi, wamp rᵾp elinga, wamp kui nga uⱡ ei kandᵾk tᵾtᵾng. Ei kᵾn, Got nga wamp etpa ti uⱡ ei, ama kakina etpa mam itim. Ei mel, Got nga wamp poⱡ etpa ti uⱡ ei ndi, wamp etpa kun kai mondpa, mepa pangga, tᵾn nga Nuim Jisas Kraist ei ndi, uⱡ nga kᵾnt nga kont mul uⱡ ei tᵾpa ngumba.