Rom 7 | MED | STEP | Angmᵾn, enim mi ik pili wu kᵾⱡ ndi, pᵾtmin ni, wamp ti kont morum ei kᵾn, mi ik ei ndi, rᵾp etᵾm. Wote, wamp ti korum ei kᵾn, mi ik ei ndi, rᵾp iti natᵾtᵾm. Uⱡ ei enim pili napᵾtmᵾn ei?

‏ Romans 7

Wu Amp Raⱡ Nga Timan Ei

1 Angmᵾn, enim mi ik pili wu kᵾⱡ ndi, pᵾtmin ni, wamp ti kont morum ei kᵾn, mi ik ei ndi, rᵾp etᵾm. Wote, wamp ti korum ei kᵾn, mi ik ei ndi, rᵾp iti natᵾtᵾm. Uⱡ ei enim pili napᵾtmᵾn ei? 2 Uⱡ ei mel, amp wu purum ti nga wam kont morum ei kᵾn, mi ik ei ndi, kan mel kuⱡpa tenda elinga mormbil. Wote, wam wu ei, kont moⱡangga kᵾn, wu elpa ti pum kandᵾk, wu amp ndenggᵾⱡa ni, uⱡ ti enim ning. Wote, wam korum ei kᵾn, amp ei wam kᵾn, tᵾpa tenda etᵾm uⱡ ei, pora nᵾtᵾm ila, amp wiya morum. Wote mi ik ei ndi, imp muⱡi nambᵾⱡmba. Amp ei mba, wu elpa ti pum kandᵾk, wu amp ndenggᵾⱡa ni, uⱡ ti enim ning mel mon.

4 Ei mel ku, na nga angmᵾn! Kraist nga kᵾng ila, tᵾn tᵾpᵾn rᵾmp nduⱡmᵾn ei kᵾn, mi ik ei nga ronduⱡ ei pora nitim. Akup tᵾn koⱡpa, kont mba morum wu ei nga wamp raⱡpᵾn, Got nga kongun kindmant endpᵾn muⱡmin. 5 Unt tᵾn mbo wamp raⱡpᵾn murmᵾn ni kᵾn, mi ik ei ndi, kunt kan elinga, punt timin ei nga numan ngurmin. Wote kᵾmp ki na mbᵾ ndi, kongun etᵾp kai mundmin ni kelpᵾn, wamp kui nga uⱡ mbila rukᵾr mbun itmin. 6 Ei kᵾn, uⱡ unt nga mat ndi, tᵾn imp murum uⱡ nimbᵾ, wak ropᵾn, rop kondpᵾn pora ndurmun. Ei nga, akup tᵾn mi ik kᵾⱡ ndi, imp moⱡangga, uⱡ unt nga mbᵾ nga kindmant indimin mel kapⱡa mon. Tᵾn uⱡ kont paka mat, Muⱡnga Wingti ei ndi, mbo rondum ei mel itimin.

Mi Ik Ei Kᵾn, Uⱡ Kit Mbᵾ Nga Ik Raⱡ

7 Ei nga, tᵾn ndi namba nimin? Mi ik ei, elim uⱡ kit nimin ei? Ei kapⱡa mon! Nambuⱡ emel, mi ik ei, pi napilinga ndam, uⱡ kit iti uⱡ ei, kandᵾp mbi ndui nandᵾⱡmina, mi ik ei ndi, kum pindi nᵾpᵾndi nᵾtᵾm uⱡ ei, ni nandilinga ndam, na ndi, kum pindi uⱡ ei, etᵾp mor nᵾmp pili napilimba. 8 Mi ik ei, pi napilinga ndam, uⱡ kit iti uⱡ mbᵾ koⱡnga. Wote, mi ik ila mendpᵾⱡ, uⱡ kit iti uⱡ ei, ruk omba, kunt kan elinga, na nga numan rukrᵾng orunga, kandpa kum pindi uⱡ minal etᵾp mor. Mi ik ei, pi napilinga ndam, uⱡ kit iti uⱡ mbᵾ koⱡnga. 9 Unt mi ik ei, pili napilip wei mur. Wote, mi ik ni ekit oⱡnga, uⱡ kit iti uⱡ mbᵾ, omba mot nitim ila, na koⱡᵾp pora ndur. 10 Mi ik ei ndi, na rᵾp etpa, kont mul uⱡ ei, tᵾpa ngumba nᵾmp pit. Ni wote, aldpa na kᵾn wamp kui nga uⱡ ei, mepa urum. 11 Nambuⱡ emel, uⱡ kit ei, mi ik ila rukᵾr omba kongun etpa, na tᵾpa tiki ponduⱡnga, mi ik ei ndi, na ropa kundrum. 12 Ei nga, mi ik elim kai wingti, wote mi ik petᵾm mbᵾ pora, kun kai petᵾm.

13 Ei kᵾn, Got nga mi ik kai kᵾⱡ ndi elinga, na wamp kuⱡi uⱡ ei kandᵾp tit ei? Ei mon! Uⱡ kit mbᵾ ndi itim. Uⱡ kit ei ndi, uⱡ kai titim ila ruk omba, kongun elinga kᵾn, wamp kul uⱡ ei, na kᵾn urum. Ei kᵾn, uⱡ kit mbᵾ nga puⱡ ei, tᵾpa mot ndumba pilpa itim. Ei nga, mi ik petᵾm mbᵾ ndi, uⱡ kit iti uⱡ ei, ama uⱡ kit wei nimba, tᵾpa mot ndurum.

Wamp Numan Ei Uⱡ Kit Nga Mi Manga

14 Tᵾn pᵾtmᵾn ni, mi ik mbᵾ pora, muⱡnga nga ik petᵾm. Wote, na numan unt nga mbᵾ, tep mor ei, uⱡ kit mbᵾ ndi, tᵾpa kan nguⱡnga kindmant etᵾp mur. 15 Na nanim uⱡ kai itimp nᵾmp pᵾt uⱡ mbᵾ iti natᵾt. Wote, uⱡ kit iti nᵾtimp nᵾmp pᵾt uⱡ mbᵾ, na etᵾp ku mor. Nambuⱡ emel, uⱡ mbᵾ et nda? Na pili napᵾnt. 16 Na ndi, iti nᵾtimp nᵾmp pᵾt uⱡ kit mbᵾ, pilip kelip et ei kᵾn, na ora ndupa, mi ik ei kun petᵾm nᵾmp kandᵾr. 17 Ni kᵾn, uⱡ kit et mbᵾ, nanim ndi iti natᵾt. Wote uⱡ kit iti uⱡ ei, na kᵾn petᵾm ei ndi etᵾm. 18 Na pᵾnt mel, na nga mbo kᵾng tila uⱡ kai mbᵾ pi napᵾtᵾm nᵾmp pᵾt. Nambuⱡ emel, uⱡ kai mbᵾ elimba nᵾmp pᵾt. Ei wote, itimp mel kapⱡa iti natᵾtᵾm. 19 Ei kᵾn, uⱡ kai ti itimp nᵾmp pᵾt uⱡ ei, wote iti natᵾt. Uⱡ kit ti iti nᵾtimp nᵾmp pᵾt ei, wote et. 20 Ei nga, na ndi, iti nᵾtimp nᵾmp pᵾt uⱡ kit mbᵾ, wote et. Uⱡ mbᵾ na ndi, iti natᵾt mon! Uⱡ kit iti uⱡ ei, na kᵾn rukᵾr petᵾm, ei ndi etᵾm.

21 Na uⱡ kai mbᵾ, itimp ku nᵾmp pᵾt. Wote, na nga et uⱡ kit mbᵾ, kandᵾr mel, uⱡ kit mbᵾ, na kᵾn rᵾmp nimba petᵾm. 22 Na nga muⱡnga ei ndi, Got nga mi ik mbᵾ, pilip numan ndi kor. 23 Wote, na kandᵾr mel, na nga kᵾmp ki na mbila, uⱡ elpa ti ndi pepa, na nga numan kun ei kunt kan elinga, uⱡ kit iti uⱡ mbᵾ ndi, na nga kᵾmp ki na mbila petᵾm ei ndi, na tᵾpa kan ngumba pendpa ku etᵾm. 24 Na wu kit ei, na wamp kui nga kᵾng tep mor ila, nam ndi, etpa tᵾmba nda? 25 Uⱡ ei, tᵾn nga wu Nuim Jisas ndi, tᵾn tᵾpa rapundᵾmba ei nga nᵾmp kᵾn, Got kᵾn angge nᵾnt. Na nga numan kun ei ndi, Got nga mi ik mbᵾ, pilip kindmant endᵾt. Wote, na nga kᵾng orunga, mi ik petᵾm mbᵾ ndi, na uⱡ kit mbᵾ iti nilinga, kindmant endᵾp mor.