Rom 9 | MED | STEP | Na Kraist mondᵾp nᵾnt, na ik kol rop ni nanᵾnt. Na ik kupa ei nᵾnt. Na nga numan mbo kel ei, Muⱡnga Wingti ei ndi, ronduⱡ ngumba nduimp roⱡnga, ik kupa ei nᵾnt.

‏ Romans 9

Got Elim Ndi, Kᵾmp Ropa Titim

1 Na Kraist mondᵾp nᵾnt, na ik kol rop ni nanᵾnt. Na ik kupa ei nᵾnt. Na nga numan mbo kel ei, Muⱡnga Wingti ei ndi, ronduⱡ ngumba nduimp roⱡnga, ik kupa ei nᵾnt. 2 Ei kᵾn, na nga mundmong ei, mindil elinga, rᵾk rᵾk mbun tᵾt. 3 Na Got kᵾn atinga rop nᵾmp mel, na nanim Kraist kᵾn mor uⱡ ila, tᵾpa ekit ndangga, koⱡ ila na nga Jura wamp kᵾⱡ, Kraist tᵾn tᵾpa rᵾmp ndupa monduⱡnga ndam, kapⱡa elinga. 4 Isrel wamp kᵾⱡ, Got ndi tᵾpa, elim nga kangambuⱡa rᵾndrᵾm. Wote elim nga rᵾⱡang kai ei kandrᵾng, wote wamp mbᵾ kᵾn mi ambuⱡpa, mi ik kᵾⱡ ngumba, mbi paka rundi uⱡ kupa ei, ora ndupa, omba Got nga nimba mᵾi rui uⱡ kᵾⱡ ngurum. 5 Ni kᵾn, anda kouwᵾmᵾn mbᵾ, Got ndi, unt kandpa mbi ndurum kᵾⱡ, enim nga tᵾpanᵾmᵾl kᵾⱡ nga, anda kouwᵾmᵾn mbᵾ nga rᵾⱡaip ila ku, Kraist ni, mana omba mᵾi kona wamp kᵾng titim. Wu ei, akup muⱡ mᵾi raⱡ nga pora Nuim morum. Ei kᵾn, Got nga rᵾk rᵾk mbi mundamin! Ei kupa!

6 Na nᵾnt ik ei ndi, Got nga nimba mᵾi rurum ik ei omba, kawa ndurum ni nanᵾnt. Wote Isrel wamp mbᵾ pora, Got ndi kᵾmp ropa ti nᵾtᵾtᵾm. Ei nambuⱡ mel, Isrel wamp mbᵾ pora, Isrel wamp kupa mat mon. 7 Aparam nga mema ila kalk tᵾtᵾng wamp mbᵾ pora, Got nga kangambuⱡa ni nᵾnmᵾn mon. Ei nambuⱡ emel, unt Got ndi, Aparam kundpa nimba mel, “Aisak nga rᵾⱡaip ila kaⱡpa tᵾm wamp mbᵾ, nim nga wamp rᵾⱡaip,” nitim. 8 Ik ei nga puⱡ ei mel, ya mᵾi kona ila wu amp ndi, wamp kaⱡᵾp tᵾtmᵾn mbᵾ, Got nga kangambuⱡa mon! Got nga nimba mᵾi ropa nitim ik mbᵾ, mondᵾk pᵾtmin wamp mbᵾ, Aparam nga kangambuⱡa kupa ralk mormin. 9 Uⱡ ei nga, Got ndi, unt nimba mᵾi ropa nimba mel, “Na ndi, ui kanggᵾp ambᵾⱡᵾp pindᵾt ila, yant wamba kᵾn, amp Sera ni, kang ti memba,” nᵾtᵾm.

10 Wote, ei mint mon! Amp Repeka nga kangᵾm wu raⱡ nga tipam ei, tᵾn nga anda kouwᵾ tipam Aisak. 11 Wote, wu raⱡ mi nᵾmi kᵾn, wote uⱡ kit kai mbᵾ nga ti iti natᵾtᵾnggil kᵾn, Got ndi, amp Repeka kundpa, nimba mel, “Kang kumina ei omba, kang akil ei nga kindmant wamp mel muⱡangga!” nitim. Uⱡ ei, wu raⱡ nga etᵾnggil uⱡ tila mon. Uⱡ ei, Got ndi, itangga nimba pitim ei mel omba, kupa itim. 13 Wote, Got nga ik ti, Buk Wingti ila petᵾm ei, omba kupa etpa nimba mel, “Na Jekop numan ngur. Wote Iso numan ngui ngᵾnggᵾr mon!” nᵾtᵾm.

14 Ei kᵾn, akup tᵾn ndi, uⱡ ei nga namba nimin? Muna Got nga wamp kᵾmp titim uⱡ ei kᵾn, pi napᵾrᵾm nimin ei? Ei ama mon! 15 Akup elim ndi, Moses kundpa, nimba mel,

“Wamp nam ti kᵾn, uⱡ kai ti itimp nᵾmp pint ndam, ei nanim pint ei mel ku itimp. Wote, wamp nam ti, kont kuⱡimp nᵾmp pint ndam, ei nanim pint ei mel ku itimp,” nᵾtᵾm.
16 Ik ei ndi, nimba kᵾn, tᵾn wamp nga numan pᵾtmᵾn uⱡ ila, Got ndi, kandpa kᵾn, kᵾmp ropa ti natᵾtᵾm mon. Uⱡ ei, Got elim nga wamp kont kuⱡi uⱡ ila mint etᵾm. 17 Wote, Got nga Buk Wingti ila ik ti ndi, Pero kundpa, nimba mel,

“Na nga ronduⱡ ei, nim kᵾn mot nangga, wote na nga mbi ei, muⱡ uⱡ mbila, pilik kapⱡa indeing nᵾmp kᵾn, nim tᵾp wu nuim mundᵾr,” nitim.
18 Ei kᵾn, akup tᵾn uⱡ ti pilimin ei, Got ndi, wamp nam ti, kont kuⱡimp nimba pᵾtᵾm ei, elim pᵾtᵾm ei mel ku etᵾm. Wote, wamp nam ti kᵾn, etᵾp numan ku rundimp nimba pᵾtᵾm ei, elim pᵾtᵾm ei mel ku etᵾm.

19 Ei kᵾn, akup enim ti ndi, na kundᵾk, nᵾng ndam, “Wote nambuⱡ emel, Got ndi, wamp nga uⱡ ⱡawa etmin mbᵾ nga nᵾtᵾm? Wote, wamp nam ti ndi, Got nga numan ei, tᵾpa roi ndumba?” nitim. 20 Ei kᵾn, wu ana ye! Nim wamp nam nᵾkᵾn pilkᵾn, Got kᵾn ik int ndukᵾn nin? “Mᵾi ming ei ndi, mim itim wamp ei kundpa, na nambuⱡ emel, ei mel mim itin nimba ei?” nitim. 21 Ei kᵾn, mᵾi ming mim etᵾm wu ei ndi, mᵾi kᵾning ila, namba uⱡ ti itimp nimba pᵾtᵾm ei mel etᵾm. Mᵾi kᵾning tenda ila, mᵾi ming raⱡ mim etpa, ming tila rᵾng kaⱡᵾp, ming tila wamp rᵾng etᵾp, nguimp nimba mim etᵾm.

22 Got ndi, itim uⱡ ei, mᵾi ming ei mel uⱡ to tenda ei. I itim uⱡ ei ndi, elim nga popᵾⱡ ei kᵾn, elim ronduⱡ ei kᵾn, wamp mbᵾ ent kᵾneing nimba, etpa mot ndurum. Wote, ming ropa kit mondᵾmba mbᵾ, kit muⱡing ei nga tᵾk kun etᵾk mormin. Ei wote, puⱡ wu ei ndi, ming mbᵾ ropa gau ndumba ei nga ui ei, ui nawᵾⱡnga nokundᵾk mormin. 23 Ei nambuⱡ emel, elim nga uⱡ rᵾⱡang pi mbᵾ, elim nga wamp mbᵾ kᵾn, oi ndurum uⱡ ei, tᵾp mot ndamba. Tᵾn elim nga uⱡ mon pi mbᵾ, kandᵾp tᵾmin nimba kont kuⱡpa, tᵾpa kun itim wamp mbᵾ timin. 24 Ei kᵾn, tᵾn ya wamp kᵾⱡ mendpᵾⱡ wi ropa titim. Ei nga, Jura wamp kᵾⱡ mendpᵾⱡ mon! Wote, wamp rᵾⱡaip elpa mbᵾ, kᵾmp kᵾm ku. 25 Got ndi, painui wu Oseiya kundpa, nimba mel,

“Na nga wamp puⱡ mon mbᵾ kundᵾp, na ndi, ‘Na nga wamp puⱡ mbᵾ,’ nimp. Wote, wamp rᵾⱡaip na numan ngui nganggᵾr mbᵾ, na ndi, ‘Na nga wamp numan ngur mbᵾ,’ nimp. 26 Wote kona nant tila kundᵾk nimba mel, ‘Enim na nga wamp mat mon, nᵾtmin nimbila, wote wamp mbᵾ kundᵾk, Got kont morum ei nga kangᵾmᵾl mbᵾ,’” ning.

27 Ei wote, Aisaiya ndi, Isrel wamp mbᵾ nga nimba mel,

“Isrel wamp rᵾⱡaip ei, num kuta ila ku ok, na ei mel kapⱡa. Ei wote, wamp onunga kᵾralt mint, Got ndi, etpa peng kont tᵾmba. 28 Ei nambuⱡ emel, Nuim ei ndi, wamp etpa romba uⱡ ei tᵾkrᵾpa etpa pora ndumba,” nitim.
29 Uⱡ ei, unt Aiseiya ndi, nimba mel,

“Unt Nuim ronduⱡ ei ndi, tᵾn nga wu anda kouwᵾmᵾn mat etpa kont mundi namᵾndᵾⱡnga ndam, tᵾn Sorum kᵾn Gomora kona raⱡ itim ei mel elimina,” nᵾtᵾm.

Isrel Wamp Kᵾⱡ Mondᵾk Pili Napᵾtᵾng

30 Ei kᵾn, akup tᵾn ndi, namba nimin? Tᵾn ei mel namin, wamp rᵾⱡaip elpa mbᵾ ndi, uⱡ kun kai mbᵾ kandᵾp timin nᵾk, kongun mindil nok iti natᵾk, wote mondpa pili uⱡ ila mendpᵾⱡ, kun kai mul uⱡ ei kandᵾk tᵾtᵾng. 31 Wote, Isrel wamp mbᵾ, Got ndi, kᵾmp ropa titim mbᵾ, mi ik ei, ronduⱡ mundᵾp pep ramina, Got ndi, en enim wamp kandpa, kun kai nimba, nᵾk pᵾtᵾng. Ei wote, Got kᵾn, kun kai mul uⱡ ei kandᵾk, ti natᵾtᵾng mon. 32 Ei nambuⱡ emel, kandᵾk ti natᵾtᵾng? Ei kᵾn, en enim Kraist kᵾn mondpa pili napilik nga ik ei, ronduⱡ mundpᵾn pep ropᵾn, Got kᵾn, kun kai mul uⱡ ei kandᵾp, timin nᵾk pᵾtᵾng. Ei kᵾn, enim ndi, “Kᵾmp nduma rorum ku,” ni ndi, kᵾmp nduma roⱡnga puk petᵾng.

33 Uⱡ itim ei, Buk Wingti ei ndi, nimba mel,

“Saiyon ila ku ti, tent ei ndi, wamp mbᵾ nga kᵾmp mbᵾ tᵾnga romba. Ku ei ndi, wamp mbᵾ kᵾmp mbᵾ tᵾnga rangga mana puk ping. Wote, wamp nam ti, wu ei mondpa pilim ndam, elim pipil kuⱡi naⱡᵾmba,” nᵾtᵾm.