‏ 1 Corinthians 7

Headava herevadia

1Vada o tore henigu herevadia davadia bini. Tatau basiema headava bema namo; 2to lebulebu garina tatau ese adavadia ta ta bae abidia, hahine ese danu adavadia korikori mo bae abidia. 3Tau ese adavana ena headava karana baine henia; hahine danu adavana ena headava karana baine henia. 4Hahine ese sibona tau-anina se biaguamu, a tau ese e biaguamu; tau danu sibona tau-anina se biaguamu, a hahine ese e biaguamu. 5Boma hedadarai heheni, ḡuriḡuri igoadalaina totona, negana basinema daudau; bena boma eno bou lou, emui haheauka basinema heḡereḡere bena Satana ese bema dibaḡanimui na garina. 6Ina na egu hahealo; dia haheḡani. 7Lau na uramu taunimanima iboudiai ese lau bae haḡoigu; to ta ta mai edia harihari ḡaudia Dirava ena amo, ta be iniheto, ma ta be unuheto.

8Asie headava taudia bona vabu na hamaorodiamu, na tomu bae noho lau heḡereḡeregu, una baine namo. 9To basiema haheauka, bema headava; badina be bae headava na namo, mata-dika ena lahi ai bae ara na dika. 10A headava hahinedia na haganidiamu, hahine ese tau basine dihotania. Ina na dia lauegu haheḡani, to Lohiabada ena. 11A bema dihotania, ia na vadona ai bema noho, eiava adavana enai ma bema daro dae lou. Tau ese danu adavana basine hadihoa.

12A taunimanima oredia ediai lauegu hereva (dia Lohiabada ena) binai: varavarada ta bema mai adavana, dia ekalesia hahinena, bona una hahine bema ura ia ida do bemaa noho; basinema hadihoa. 13Bona hahine ta danu bema mai adavana, dia ekalesia tauna, bona una tau bema ura ia ida do bema noho; basinema dihotania. 14Badina be ekalesia hahinena ese adavana murimuri tauna na e hahelaḡaiamu; bona ekalesia tauna ese adavana murimuri hahinena na e hahelaḡaiamu. Bema lasi, natumui basiema helaḡa; ḡau tamona, idia na harihari hehelaḡa. 15A murimuri tauna eiava hahinena baine raka oho, basio rua; bena una headava ese tadikakada eiava taihuda basine ḡuia. Dirava ese vada e boirimui, maino ai ba noho. 16Hahine e, ede o diba tomamu adavamu ba hamauria eiava? Tau e, ede o diba tomamu adavamu ba hamauria eiava?

17Lohiabada ese taunimanima ta Ia vada e harihari henidia heḡereḡerena, bona Dirava ese taunimanima ta ta vada e boiridia heḡereḡerena, unu bae raka toma. Ekalesia oreadia iboudiai lalodiai unu na haḡanidia tomamu. 18E peritomea tauna vada e boiria a? Ena peritome basine ḡorea. Asie peritomea tauna vada e boiria a? Basie peritomea. 19E peritomea bona asie peritomea be asi anina; Dirava ena haheḡani ibadinadia mo mai anina. 20Ta ta e boiridia negadia ai e nohova heḡereḡerena ai do bae noho.

21E boirimu negana ai oi na hesiai taumu a? Lalomu basine hekwarahi. A iruha-negemu dalana ba davaria, vada bavabia dae; una be namo herea. 22Badina be hesiai tauna Lohiabada lalonai vada e boiria, Lohiabada ese vada e ruhaia nege; a e heruha nege tauna vada e boiria, ia na Lohiabada ena hesiai tauna. 23Vada e hoimui, mai davamui: taunimanima edia hesiai taudia ai basiola. 24Taunimanima ta ta e boiridia negadia ai e nohova heḡereḡerena do bae noho, Dirava ida.

25Uhau bona ulato ediai lau na asi egu haheḡani Lohiabada ena amo; to lau sibogu, Lohiabada ese vada e bogagu hisi dainai bavabidadama henigu diba taugu, egu lalohadai aina henimui. 26Lau na tomamu hari ini nega dikadia daidiai, taunimanima na harihari e nohomu heḡereḡeredia ai mo do bae noho, una be namo. 27Mai adavamu a? Basio hadihoa. Asi adavamu a? Ta basio tahua. 28Boma headava, ena na dia kara dikana; bona haneulato bema headava, una danu dia kara dika. Ḡau tamona, unu bae kara toma taudia na hisi do bae ani. A na uramu basinia hametaumui. 29A varavaragu e, ini na gwau tomamu: nega na kwadogi. Harihari ela, mai adavadia tataudia na bae noho asi adavadia na heto baine namo; 30bona taitai taudia na bae noho asie taimu na heto; bona moale taudia na bae noho asie moalemu na heto; bona hoihoi taudia na bae noho asi edia kohu na heto; 31bona tanobada ena ḡau namodia e abimu taudia na basie abi badabada, badina be tanobada oromana vada e lao bubunimu.

32Lau na uramu lalomui na basie hekwarahi. Se headava tauna ese Lohiabada ena ḡau e lalo haguhilaimu, Lohiabada ede baine hamoalea toma. 33A headava tauna ese tanobada ḡaudia e lalo haguhilaimu, adavana ede baine hamoalea toma; 34taunabunai lalona be rua. Se headava hahinena eiava hane-ulato na Lohiabada ena ḡau e lalo haguhilaimu; bena tau-anina ai bona laumana ai baine helaḡa. A headava hahinena ese tanobada ḡaudia e lalo haguhilaimu, adavana ede baine hamoalea toma. 35Unu na gwau tomamu na emui namo ihavarana, dia idoa vairamui ai asina atoamu; a na uramu hemataurai karadia ba kara, bona Lohiabada isiaina ba lao heni, asi daradaramui.

36Tau ta na lalona ai bema diba ia ese maohenina asine kara maoromaoro henia, a hegahusi dainai ena ura ienai vada e abia, bena ena ura heḡereḡerena ai baine karaia, vada bae headava; una na asi kererena. 37A ta ese sibona lalona bema hadaia basine headava e tomamu, bona lalona bema ha-aukaia bona bema hadaia momokani ede baine kara toma, bena basine headava be namo. 38Taunabunai, maohenina baine adavaia tauna baine kara namo, a basine adavaia tauna baine kara namo herea.

39Hahine ese adavana baine badinaia ela bona ena mauri dokona. A tau na baine mase, hahine na baine heruha nege, baine ura henia tauna na baine adavaia; to Lohiabada lalonai mo baine adavaia. 40A lau na tomamu vadona ai baine noho, ena lalo-namo baine herea; lau na tomamu danu Dirava Laumana na lalogu ai.