1Sa 12 | MEU | STEP | Bena Samuel ese Israel taudia iboudiai e haroro henidia, eto, A kamonai: lau be vada na hakala henimui, emui hereva iboudiai vada na abi dae, pavapava ta vada na henimui, baine halohiamui.

‏ 1 Samuel 12

Samuel ese Israel taudia e haroro henidia

1 Bena Samuel ese Israel taudia iboudiai e haroro henidia, eto, A kamonai: lau be vada na hakala henimui, emui hereva iboudiai vada na abi dae, pavapava ta vada na henimui, baine halohiamui. 2 Benaini, hari pavapava na harihari vairamui ai e rakamu; a lau be vada na buruka, huigu vada eme kurokuro; natugu danu o itadiamu, dekemui ai e nohomu. Lau na umui vairamui ai vada na raka, tauhaugu negana amo ema bona hari dina. 3 Lau o ina; Iehova vairanai bona ia ese e horoa tauna vairanai ba habadegu. Daika ena boromakau maruanena vada na dadia? Daika ena doniki vada na henaoa? Daika vada na koia? Daika vada na hahisia? Daika imana amo hahemaoro ihagagevana monina vada na abia, matagu ihakepululaina? Ba hahedinaraia, bena baina henimui lou. 4 Idia eto, Oi na so koimai bona so hahisihisimai; ḡau ta danu tau ta imana amo so abia. 5 Ia ese ma e hereva henidia, eto, Iehova ese umui vairamui ai e hamomokaniamu, bona e horoa tauna ese hari dina ai e hamomokaniamu, umui ese ḡau ta lau imagu ai asio davaria. Idia eto, Ia ese e hamomokaniamu.

6 Bena Samuel ese Israel taudia e hamaorodia, eto, Iehova ese Mose bona Aaron e duanaidia, bona senemui na Aigupto amo e hakaudia lasi. 7 Taunabunai, harihari a gini, asio marere; lau ese Iehova vairanai Iehova ena hahemauri karadia emui ai bona senemui ediai vada e kara na aina hamaorolaimui. 8 Iakob na Aigupto ela murinai, senemui ese Iehova e tai heniava negana ai, Iehova ese Mose bona Aaron e siaidia; bena idia raruosi ese senemui na Aigupto amo e hakaudia lasi, ina gabu ai e hanohodia. 9 A idia ese Iehova, edia Dirava, e laloa boio; bena ia ese Sisera, Hasoro pavapavana Iabin ena tuari oreana biaguna, imana ai, bona Filistia taudia imadia ai, bona Moab pavapavana imana ai, e atodia; idia ese e tuari henidia. 10 Bena idia ese Iehova e tai henia, eto, Ai na vada a kara dika; badina be Iehova vada a rakatania, Baal bona Astaroto isiaidia vada a lao heni; a harihari inaimai imadia amo ame hamaurimai, bena oi isiaimu baia lao heni. 11 Bena Iehova ese Ierubu-baal bona Barak bona Iefeta bona Samuele siaidiava, inaimui imadia amo e hamaurimuiva, kaha iboudiai; bena o noho namonamova. 12 Bena o itaia, Nahasa, Amono pavapavana, vada e raka lasi, baine tuari henimui eto; una negana ai o hereva henigu, oto, Lasi, pavapava ta ese baine halohiamai. A Iehova, emui Dirava, na emui pavapava. 13 Harihari emui pavapava ba itaia, o abia hidi bona o noilaia tauna. A itaia, Iehova ese pavapava ta vada e haginia; ia ese baine halohiamui. 14 Iehova garina boma gari, bona isiaina boma lao heni, bona erena boma kamonai, bona Iehova ena haheḡani basioma tataia utu, bona hari pavapava, e halohiamuimu tauna, ida Iehova, emui Dirava, murina amo boma raka, una na baine namo. 15 To, Iehova erena basioma kamonai, a Iehova ena haheḡani boma tataia utu, Iehova ese umui bona emui pavapava baine inai henimui. 16 Taunabunai, a gini, asio marere, ina kara badana Iehova ese vairamui ai baine kara na do ba itaia. 17 Hari dina na uit iutuna dinana ani? Lau ese Iehova baina hahanea, baina noia, ia ese guba-rahu bonamedu baine siaidia; bena ba diba, emui kara dika, Iehova vairanai vada o kara, na bada. Emui kara dika binai: emui pavapava vada o noinoilaia amo.

18 Taunabunai Samuel ese Iehova e hahanea; bena Iehova ese guba-rahu bona medu vada e siaidia una dina ai. Bena taunimanima iboudiai ese Iehova bona Samuel garidia e gariva.

19 Bena taunimanima iboudiai ese Samuel e noia, eto, Iehova, emu Dirava, ba ḡuria, ai bini emu hesiai taumai daimai ai, baia mase na garina; badina be emai kara dika iboudiai latadiai ina kara dikana ta ma vada a atoa kau: emai pavapava ia vada a noinoilaia.

20 Bena Samuel ese e hamaorodia, eto, Asio gari; ini kara dika iboudiai vada o kara ḡau tamona Iehova iḡavana dalana amo basio raka siri. Iehova isiaina ba lao heni, mai lalomui idoidiai; 21 basio raka siri, dirava koikoidia basio ḡavadia: idia na asi anidia bona asi edia hahemauri, idia na koikoi ḡaudia. 22 Badina be Iehova ese ena orea taudia basine negedia daure, ia ladana herea-daena bagunai; Iehova ena ura be iena bese ai baine halaomui. 23 Ina danu, lau ese ḡuriḡuri umui daimui ai basina hadokoa; unu bama kara toma lau na Iehova bama kara dika henia. A lau na dala namona bona maorona baina hadibalaimui. 24 Ḡau tamona, Iehova garina ba gari, bona isiaina ba lao heni namonamo, mai lalomui idoidiai; ba haeroa, ia ese kara badadia amo vada e hanamomui. 25 A do ba kara dika havara, umui na do bae bibimui oho, mai emui pavapava ida.