1Ti 4 | MEU | STEP | Lauma ese vada e gwauraia hedinarai, nega gabedia ai haida ese Iesu ibadinana bae rakatania, dibaka laumadia bae kamonai henidia, bona lauma dikadia edia hahediba herevadia bae abi dae.

‏ 1 Timothy 4

Aniani herevana

1 Lauma ese vada e gwauraia hedinarai, nega gabedia ai haida ese Iesu ibadinana bae rakatania, dibaka laumadia bae kamonai henidia, bona lauma dikadia edia hahediba herevadia bae abi dae. 2 Hari hahediba koikoidia na dibaka taudia haida edia amo. Idia be e kara lalodia na auri siahuna amo e gabu na heto. 3 Idia ese taunimanima e gwaudia taomu, basie headava e tomu, bona aniani haida basie ani. A unu aniani na Dirava ese e kara ḡaudia; kamonai taudia bona hereva momokani dibadia taudia ese Dirava bae hanamoa guna ḡuriḡuri ai, bena bae ani. 4 Badina be Dirava ese e kara ḡaudia iboudiai nanamo, bona asi taravatudia danu; taunimanima ese Dirava bae hanamoa, bena bae abi. 5 Badina be Dirava ena hereva bona taunimanima edia ḡuriḡuri ese eme hahelaḡadia.

6 Ini hereva oi ese varavarada ba hadibalaidia; bena Keriso Iesu ena hesiai tauna namona ai baola, Iesu ibadinana bona hahediba herevadia namodia, vada o badina guna ḡaudia, ese do bae ubumu. 7 A taunimanima mo edia gori kavakavadia ba dadarai; Dirava ibadinana mo ba goadalaia. 8 Badina be tau-anina ihagoadana na taina namo, a Dirava ibadinana ese ḡau iboudiai e hanamodiamu; ia hari mai gwauhamatana, ina mauri ena bona mauri gabena ena. 9 Ina na hereva momokani; baita abia dae hari namo. 10 Badina bunai ta hekwarahimu bona ta hisihisimu, badina be Mauri Diravana ta abidadama heniamu. Ia na taunimanima iboudiai ihamauridia, to kamonai taudia ediai anina na bada.

Ekalesia oreana ireḡuna

11 Ini hereva ba hahedualai, ba hahedibalai. 12 Ta basine dadaraimu oi na eregabe mo dainai. A hereva ai, kara ai, lalokau ai, abidadama ai, lalo-ḡoevaḡoeva ai, kamonai taudia edia ihaḡoina tauna ai baola. 13 Buka Helaḡa iduahina, haroro, hahediba, ba goadalai ela bona lau baina vasi. 14 E henimu herahiana iḡaukaralaina ai basio manoka; peroveta edia hereva heḡereḡeredia ai e henimu, heitatao taudia ese imadia na oi tubuamu ai e ato kau negana ai. 15 Ini ḡau ba manadalai, lalomu idoinai ba henidia, bena emu goada na taunimanima iboudiai vairadiai baine hedinarai. 16 Sibomu nahuamu ba tohoa, bona emu hahediba herevadia nahuadia ba toho; ba badina tarika-tarika. Unu ba kara toma, bena sibomu ba hahemauri, bona bae kamonai henimu taudia danu ba hamauridia.