2Ch 21 | MEU | STEP | Iehosafat na tubu tama dekediai e mahuta; senena garadia ai e guria, David ena hanua ai. Bena natuna Iehoram na ia gabuna ai e lohia.

‏ 2 Chronicles 21

Iehoram, Iuda pavapavana

1 Iehosafat na tubu tama dekediai e mahuta; senena garadia ai e guria, David ena hanua ai. Bena natuna Iehoram na ia gabuna ai e lohia. 2 Ia na mai tadina, Iehosafat natuna haida; ladadia na Asaria, Iehiele, Sekaria, Asaria, Mikael bona Sefatia. Ini iboudiai na Iehosafat, Iuda pavapavana, natuna. 3 Tamadia ese herahia badadia e henidia,silver bonagold bona dava-bada kohudia, bona hanua mai maḡudia Iuda ai danu; a basileia na Iehoram e henia, badina be ia na natuna roboana. 4 Iehoram na tamana ena terono ai e dae kau, bona ena siahu e ha-aukaia, bena ia ese tadina iboudiai bona Israel lohiadia haida na dare amo e aladia mase. 5 Iehoram e lohia matama negana ai ena mauri laḡanidia na toi-ahui rua; ia na laḡani taurahani Ierusalem ai e lohia. 6 Ia na Israel pavapavadia edia dala ai e rakava, Ahaba ena iduhu taudia vada e karava heḡereḡerena, badina be Ahaba natuna hahinena na ia adavana. Ia na Iehova vairanai e kara dikava. 7 Ḡau tamona, Iehova na se ura David ena iduhu baine habuaia tari, badina be ia na David ida e hegwauhamata heheni, bona e gwau henia hamata, lamepa ta ia bona ia garana baine henidia ela bona hanaihanai.

8 Iena nega ai Edom ese Iuda ena helohia e dadaraia, bona sibodia edia pavapava ta e haginia. 9 Bena Iehoram na ena tuari biagudia bona ena kariota iboudiai ida e hanai; bena hanuaboi ai e tore isi, hari Edom taudia, ia bona ena kariota biagudia vada e daidia heḡeḡe taudia, na e rahudia mamase. 10 Taunabunai, Edom ese Iuda ena helohia vada e dadaraia ema bona ina dina. Una negana ai, Libna ese danu iena helohia e dadaraia, badina be ia ese Iehova, senena edia Dirava, vada e rakatania dainai.

11 Ina danu, ia ese atai gabudia helaḡadia e kara, Iuda ororodia ai, bona Ierusalem taudia na gwau-edeede daladia ai e hakaudia, bona Iuda taudia e harakadia kerere. 12 Bena revareva ta na peroveta tauna Elia ena amo ema, eto, Iehova, senemu David ena Dirava, na ini e gwau tomamu: Badina be tamamu Iehosafat eiava Asa, Iuda pavapavana, edia dala ai so raka, 13 a Israel pavapavadia edia dala ai vada o raka, bona Iuda bona Ierusalem taudia na gwau-edeede daladia ai vada o hakaudia, Ahaba ena iduhu ese Israel taudia na gwau-edeede daladia ai e hakaudia na heto, bona tadimu danu, tamamu ena iduhu taudia, oi e hereamu taudia, vada o aladia mase; 14 una dainai Iehova ese dai-hanai gorerena badana ta na emu orea taudia latadiai baine havaraia, bona natumu bona adavamu bona emu ḡau iboudiai latadiai; 15 bona oi danu ba gorere bada, bogaraumu gorerena ba davaria, ela bona una gorere dainai bogamu anina baine heḡiḡi lasi, dina ta ta amo.

16 Bena Iehova ese Filistia taudia bona Arabia taudia Etiopia taudia badibadidiai e nohova na edia badu e havaraia, Iehoram enai; 17 bena idia na Iuda ituari-henina totona ema, e daea, bona e davaridia kohudia iboudiai e hua lao, pavapava ena ruma kohudia, bona pavapava natuna bona adavana hahidaosi danu, e laohaidia; taunabunai natuna ta se noho, tau-muritai Iehoahasa mo sibona.

18 Una murinai Iehova ese gorere metau-hereana amo ia bogarauna e hahisihisia. 19 Negana ela, bena laḡani rua e ore ai ia bogana anina na e heḡiḡi lasi, una gorere dainai; bena e mase, n-ai hisihisi bada-hereana ida. Ena orea taudia na lahi ta asie ha-araia ia dainai, senena edia lahi e ha-arava heḡereḡeredia. 20 Ia na e lohia matama negana ai ena mauri laḡanidia na toi-ahui rua, bona ia na laḡani taurahani Ierusalem ai e lohia. E mase negana ai ta ese lalo-hisihisina se karaia; idia ese David ena hanua ai e guria, a dia pavapava edia gara ai.