2Cor 12 | MEU | STEP | Heaḡi na dia namo, to ma baina heaḡi: mata-hanai bona Lohiabada ihahedinaraina herevadia baina gwaurai.

‏ 2 Corinthians 12

1 Heaḡi na dia namo, to ma baina heaḡi: mata-hanai bona Lohiabada ihahedinaraina herevadia baina gwaurai. 2 Keriso lalonai tau Ia dibagu, laḡani gwauta-hani muridai e heabi isi guba ihatoina ai; a tau-anina lalonai eiava tau-anina murimurinai e heabi isi na asi dibagu, Dirava hari dibana. 3 Una tau be dibagu, a tau-anina lalonai eiava tau-anina murimurinai e heabi isi na asi dibagu, Dirava dibana; to dibagu ia na Paradiso ai e heabi isi, 4 hehuni herevadia e kamonai, taunimanima basie gwaurai diba herevadia. 5 Una tau hari baina heaḡilaia, a sibogu basina heaḡi. Eiava, sibogu egu manoka-manoka mo baina heaḡilaia. 6 Heaḡi bama ura, to basinama heaḡi kava; hereva momokani bama gwaurai hari. A asina heaḡimu, tau ta ese baine lalogu, lau na herea, dia egu ai e itamu bona e kamonaimu heḡereḡerena, na garina.

7 E hahedinarai henigu ḡaudia babada heherea daidiai, ḡiniḡini ta, amo e gwadagu, baina hekokoroku garina; una na Satana ena hesiai tauna na heto, itutulaigu ḡauna ai ela, baina hekokoroku herea na garina. 8 Una ḡau dainai nega hatoi Lohiabada na noia, baine abia oho. 9 To ia ese e hamaorogu eto “Egu harihari-bada na oiemu ai baine davana, badina be manoka-manoka ai lauegu siahu na herea”. Taunabunai egu manoka baina heaḡilaia mai moalegu ida, bena Keriso ena siahu egu ai baine kau. 10 Una dainai, manoka-manoka bona badu herevadia bona ogoḡami bona daḡedaḡe karadia bona hahehisi ḡaudia be Keriso dainai na moalelaimu; badina be na manokamu negadia ai na goadamu.

11 Vada na heaḡi kava, to umui emui kerere; umui ese boma hanamogu bema namo. Badina be ene aposetolo hereadia ese lau asie hereagumu; ḡau tamona, lau na dia ḡau ta. 12 Momokani, aposetolo toadia na umui bogaragimui ai na karava mai haheaukagu ida: toa bona hoa karadia bona siahu karadia. 13 Edena ḡau ekalesia oreadia idaudia ese e abia a umuiasio abia a? Ina tamona mo: asina hahekwarahimui. Mani ina egu dika tamona ba laloa nege.

Egu heigo-ita ihatoina

14 Nega ihatoina binai vada name heḡaeḡae, baina vasi na tomu; bona basina hahekwarahimui. Lau na dia emui kohu asina tahuamu, a umui hari na tahumuimu; badina be memero ese kohu basie habou tamadia sinadia edia, a tamadia sinadia ese kohu bae habou natudia edia. 15 Lau na mai moalegu ida egu kohu baina ha-ore bona tau-anigu danu baina ha-orea, umui laumamui daidiai. Lau ese na ura henimui badamu dainai umui ese o ura henigu maraḡimu a! 16 Benaini, asina hahekwarahimui. A readia dibaka karana ta amo na koimui o tomu, bena na abimui. 17 Be; dekemui na siaidia vasi taudia edia amo na koimui a? 18 Tito na noia; bena varavarada ta ia ida na siaidia vasi. Be; Tito ese e koimui a? Ai raruosi na lauma tamona ena kara asia karamu a? Dala tamona ai asia rakamu a?

19 Reana umui na nega daudau vada o laloa ai na emai kara a hekoramu. Ai na Dirava vairanai a herevamu, Keriso lalonai. Egu lalokau e, ḡau iboudiai a karamu umui ihagoadamui. 20 Lau na na garimu, baina vasi negana ai baina davarimui, umui na dia lauegu ura heḡereḡerena; umui danu lau ba davarigu, dia umui emui ura heḡereḡerena; bena heai, vaḡeḡe, badu, ani-gunita, hahebade, maumau, hekokoroku, heloḡo-heloḡo, bae vara. 21 Na garimu danu, baina vasi negana ai egu Dirava ese baine hahemaraigu umui bogaragimui ai; bona kara dika taudia hutuma taidia baina tai, badina be edia mata-bodaga, edia heuda-hanai, edia lebulebu karadia amo, asie helalo kerehaimu daidiai.