Act 25 | MEU | STEP | Festo na baine lohiaia tanona ai e diho, dina toi e nohova, bena Kaisarea amo Ierusalem eha dara dae.

‏ Acts 25

Paulo Festo vairanai

1 Festo na baine lohiaia tanona ai e diho, dina toi e nohova, bena Kaisarea amo Ierusalem eha dara dae. 2 Bena hahelaḡa taudia bona Iuda ikwaradia taudia ese Paulo herevana e hadibalaia; 3 bena e noia, ia ihadikana ai baine durudia, hesiai taudia baine siaidia lao, Ierusalem bae hakaua mai. Badina be idia ese dala ai bae bani henia, bae alaia mase eto. 4 A Festo e haere, eto, Paulo bae gimaia Kaisarea ai, asi vanahana lau danu unu bainala. 5 Ma eto, Umui bogaragimui amo mai siahudia taudia na lau ida baiala, bena hari tau bema mai ena kerere, idia ese bae habadelaia.

6 Ia na idia dekediai e nohova dina taurahani eiava gwauta dahaka, bena Kaisarea ela. Kerukeru, ia na hahemaoro gabuna ai e helai; bena e gwau isi, Paulo bae hakaua vareai. 7 Ia e gini dae, bena Ierusalem amo e diho taudia ese e ginia heḡeḡe, hereva metaudia momo e habadelaia, to asie hamomokani diba. 8 Bena Paulo e haere, eto, Iuda taudia edia taravatu asina tataia utu, Dubu Helaḡa asina hadikaia, bona Kaisara enai asina kerere. 9 To Festo e urava Iuda taudia lalodia baine hamoaledia dainai, ia ese Paulo e hamaoroa, eto, O uramu Ierusalem ba ha dara dae, unuseni ai baina hahemaoro henimu ini hereva daidiai a? 10 Paulo eto, Lau na Kaisara ena hahemaoro gabuna vairanai na ginimu; ia ese baine hahemaoro henigu. Lau be Iuda taudia asina hadikadia; oi danu dibamu. 11 Bama kerere, eiava mase karana ta bama karaia, vada bama mase, basinama gwau edeede. A edia hahebade bema asi anina, tau ta ese idia imadia ai basinema atogu kau diba. Kaisara ladana name hatoa; ia vairanai baina hahemaoro. 12 Unu amo Festo kaunsil taudia ida vada e hereva-hereva; bena ia ese Paulo e haere henia, eto, Kaisara ladana ome hatoa; Kaisara dekena do baola.

Agripa e gini dae

13 Dina haida vada ela, bena King Agripa mai Berenike ida Festo ihanamona totona Kaisarea ela. 14 Idia na dina hoho unuseni ai e nohova, bena Festo ese Paulo herevana na gaubada e hamaorolaia, eto, Tau ta be iniseni ai, Feliki ese dibura rumana ai e rakatania. 15 Lau Ierusalem nala negana ai hahelaḡa taudia bona hanua tau-badadia ese ia herevana e hamaorolaigu, bona e noigu danu baina hahemaoro henia. 16 Bena na haere henidia, nato, Roma taumai na unu asia kara tomamu; e habadeamu tauna na ihabadelaina taudia ida do asie hegaga heheni bona do se haere henidia negima ai asia hahemaoro heniamu. 17 Taunabunai, idia na iniseni ai e hebou negana ai, lau na asina halahe, a kerukeru hahemaoro gabuna ai na helai, na gwau isi, hari tau bae hakaua mai. 18 A ihabadelaina taudia e gini tore negana ai, lau banava kara dikadia bae habadelaia nato, to asie gwaurai; 19 edia toma-diho karadia mo e herevalai. Bona tau ta, ladana Iesu, herevana danu, ia na vada e mase, a Paulo ese e herevalaia goadagoadava, eto vada eme mauri. 20 Bena ini hereva itahudia dalana na daradaralaia dainai, na nanadaia, Ierusalem bainela, unuseni ai baine hahemaoro, eiava. 21 A Paulo ese e noigu, eto ihahemaoro-henina baine mia ela bona Augusto ese baine karaia; taunabunai na hahedua, bae gimaia ela bona Kaisara dekena baina siaia lao.

22 Bena Agripa ese Festo e hamaoroa, eto, Lau danu na uramu hari tau ena hereva baina kamonai. Festo eto, Kerukeru do ba kamonai.

Paulo Agripa vairanai

23 Kerukeru Agripa bona Berenike na mai hairaidia ida ela, hahemaoro rumana ai e raka vareai, tuari biagudia bona hanua tau-badadia ida. Bena Festo e gwau isi, Paulo bae hakaua vareai. 24 Bena Festo eto, King Agripa e, bona dekemai ai vada ome hebou taumui iboumui ai, ina tau o itaiamu, Iuda taudia iboudiai Ierusalem ai bona iniseni ai danu e noigu, e lolo, baine mauri na dia namo eto. 25 To mase karana ta ienai asina davaria. Bena ia ese Augusto ladana vada e hatoa, ia vairanai baine hahemaoro e tomu; taunabunai na tomamu baina siaia lao. 26 A ia herevana biagugu baina tore henia na asina diba ḡoeva; taunabunai vada name hakaua mai umui vairamui ai, bona oi vairamu ai danu, King Agripa e; baita nanadaia ḡoeva-ḡoeva, bena ia herevana ta baina davaria, baina torea. 27 Badina be lau na tomamu dia maoro mai iḡuina tauna baina siaia lao, a ihabadelaina herevadia na basina tore hedinarai.