Act 3 | MEU | STEP | Nega ta, dina ḡelona ḡuriḡurina negana, Petro Ioane ida Dubu Helaḡa ai e dae kau.

‏ Acts 3

Petro Ioane ida ae-hedairike tauna e hamauria

1 Nega ta, dina ḡelona ḡuriḡurina negana, Petro Ioane ida Dubu Helaḡa ai e dae kau. 2 Unuseni ai tau ta, ae hedairikena ai e vara, dina iboudiai e huaia laova, Dubu Helaḡa iduarana ladana “Herea-dae” badinai e hahelaiava, bena Dubu Helaḡa ai e daeva taudia ediai e noi hegameva. 3 Ia ese Petro bona Ioane e itadia, Dubu Helaḡa ai e dae kau negana ai, bena ediai ma e noinoi. 4 A Petro Ioane ida ese e raraia tao, eto, Ba raraimai.l 5 Ia ese una hereva e kamonai, Ia banava eto idia ese ḡau ta bae henia. 6 A Petro eto, Silver bona gold na asi-egu, a dekegu ai e miamu ḡauna hari na henimumu: Iesu Keriso, tau Nasaret, ladana ai a raka. 7 Imana idibana amo e veria tore, bena aena bona aena komukomuna vada e hedai kunu. 8 Bena e roho isi, e gini tore, e raka matama. Bena idia ida Dubu Helaḡa lalonai e raka vareai, e raka roho isi roho isi, Dirava e heatolaia. 9 Hutuma ese e itaia, e raka bona Dirava e heatolaia; 10 bona dibadia ia na vaia Dubu Helaḡa iduarana ladana “Herea-dae” badibadinai e helaiva bona e noi hegameva tauna; bena e hoa dikadika bona e daradara bada, ienai e vara ḡauna dainai.

Petro ma e haroro

11 Aena vada e namo tauna ese Petro bona Ioane e dogodia taova ai, taunimanima hutuma ese e heau henidia hebou, dehe ta ai, ladana na “Solomon ena dehe”. Laumadia na e daure.

12 Petro ese e itadia, bena hutuma e hereva henidia, eto, Israel taumui e, dahaka dainai ina ḡau o hoalaiamu? Bona badina be dahaka o raraimai taomu? O laloamu ai na sibomai emai siahu eiava emai namo daidiai ina tau a hamauria a? 13 Abraham bona Isaak bona Iakob edia Dirava, bona tamada edia Dirava, ese ia Natuna Iesu e heatolaia, to umui ese Pilato o henia, bona Pilato urana e urava baine kahua nege negana ai na umui ese o dadaraia. 14 Helaḡa bona Kara Maoromaoro Tauna umui ese o dadaraia, a ala-ala tauna be o noia baine hamauria oto. 15 Mauri Biaguna be umui ese o alaia mase, to Dirava ese mase amo ma e hatorea isi; ini ai be dibamai taumai. 16 Bena ina ia ladana e abidadama henia tauna, o itaiamu bona umui dibamui tauna, ia ladana ese vada e hagoadaia; oibe, ia iabidadamahenina ese ina tau vada e hamauria umui iboumui ai vairamui ai.

17 Varavaragu e, dibagu umui na mai emui lohia ida unu o kara toma na lalomui asie parara dainai. 18 A Dirava ese peroveta taudia iboudiai ududia amo Keriso na hisi baine ani herevadia e gwaurai; unu hereva vada e hamomokani vaitani. 19 Taunabunai ba helalo lou, ba helalo kerehai; bena emui dika bae hcabi oho, bona hahemauri negadia na Lohiabada ena amo baema. 20 Bona ia ese Keriso ma baine siaia, gunaguna vada e gwauraia hidi emui; Iesu bunai. 21 A guba ai baine heabi dae guna, ela bona ḡau iboudiai ihamataunatadia negadia, Dirava ese nega gunadia amo enaperoveta taudia helaḡadia ududia ai vada e gwauraia heḡereḡerena.

22 Mose ese seneda e hamaorodia, eto, Lohiabada emui Dirava ese peroveta tauna ta do baine haginia umui emui, varavaramui edia amo, lau bamogu. Ia ese baine gwaurai henimui herevadia iboudiai na ba kamonai. 23 Bona una peroveta tauna basie kamonai henia taudia iboudiai na taununanima padadia amo bae mase ore. 24 Oibe; bona peroveta taudia iboudiai danu, Samuel ena amo ema bona hari, ini dina vada e gwauraiva. 25 Umui na peroveta taudia natudia; bona Dirava ese umui senemui e gwau henidia hamata, Abraham e hamaorolaia, eto, Oi garamu edia amo tanobada besedia iboudiai do bae namo. 26 Dirava ese Natuna vada e haginia, bena e siaia guna emui ai, ihanamomui bona emui dika amo ihaloumui totona.