Col 2 | MEU | STEP | Badina be na uramu ba diba, lau na hekwarahi hereamu umui daimui ai, bona Laodikea taudia daidiai, bona vairagu do asie itaia taudia iboudiai daidiai.

‏ Colossians 2

1 Badina be na uramu ba diba, lau na hekwarahi hereamu umui daimui ai, bona Laodikea taudia daidiai, bona vairagu do asie itaia taudia iboudiai daidiai. 2 Na uramu lalodia bae hagoadadia, bona lalokau ai bae hedaro boubou; na uramu danu lalo-parara idoinai ese baine hataḡadia, ela bona Dirava ena hereva hehunina, Keriso bunai, bae diba. 3 Ia lalonai aonega bona lalo-parara kohudia iboudiai na vada e hehunimu.

Sisiba herevadia

4 Ini na gwau tomamu, tau ta ese lalo-ani herevadia baine koilaimui na garina. 5 Ena be tau-anigu na dia dekemui ai, to laumagu na dekemui ai; bena na moalemu, badina be emui hereḡu namona na itaiamu, bona Keriso o abidadama henia tarika-tarikamu danu na itaiamu. 6 Taunabunai, Keriso Iesu vada o abia lava dae heḡereḡerena, ienai ba raka. 7 Ia lalonai ba haheholo kau; ia latanai ba hahedai kau; ia iabiabiraina ai ba hahegoada, vada e hadibamui heḡereḡerena; ia ihanamona ai ba herea dae.

8 Nahuamui ba toho, tau ta ese ena dadidadi damuna ai baine halaomui na garina, taunimanima edia aonega kavakavadia eiava edia lalo-hadai koikoidia eiava sene taudia edia toma-diho karadia ai baine koimui na garina; Keriso ena dala na dia unu-heto. 9 Badina be Dirava ena mauri ḡoeva-daena na Keriso tau-anina ai vada e noho. 10 Ia lalonai umui vada o namo ḡuḡuru. Ia na lohia hereadia bona siahu taudia iboudiai kwaradia. 11 Ia lalonai peritome vada o abia, dia taunimanima imadia amo, a tau dikana idokiohona ḡauna, Keriso ena amo. 12 Emui bapatiso ai ia ida e gurimui hebou bona ia ida o tore isi hebou, Dirava o abidadama heniamu, ia siahuna ese Keriso e hatorea isi lou, dainai. 13 Umui na asie peritomemui taumui, emui kara dika ai o maseva; to Dirava ese ia ida vada e hamaurimui, bona iseda kara dika iboudiai vada e gwau tao. 14 E laoda ahu herevadia taravatu ai e hetore na ia ese vada e roho, vada e abi oho, ena satauro ai vada e koko kau. 15 Lohia hereadia bona siahu taudia ia ese vada e haketodia, taunimanima vairadiai vada e hahemaraidia, ia murina amo vada e hakaudia.

16 Taunabunai, tau ta ese basine hahemaoro henimui aniani dainai, eiava inuinu dainai, eiava aria daidiai, eiava hua matamatadia daidiai, eiava dina helaḡadia daidiai. 17 Unu na gabeai bae vara ḡaudia laulaudia mo, a anina korikori be Keriso ena. 18 Ena mata-hanai e heaḡilaiamu bona lalonai e hahemanau koikoimu bona aneru e toma henidia dihomu tauna ese basine hahemaoro henimui. Ia na tau-anina ena lalo-hadai kavakavadia e heagilaimu, a una na asi anina. 19 Ia danu Keriso, ia na Kwara, enai se kahua taomu. Keriso ena amo tau-anina idoinai ese goada e abiamu, bena garugaru bona varovaro ese e hatamonaiamu, bena e bada oho bada ohomu, Dirava ena heubu dainai.

20 Benaini, Keriso ida tanobada laumadia edia lohia badadia edia amo vada o roho mauri, a dahaka dainai ene taravatu o badinamu, emui mauri na tanobada ai na heto, a? 21 O tomu “Basio dogoa tao” bona “Basio mamia toho” bona “Basio daua toho”; 22 a ene ḡau iboudiai na iabidia ai bae ore; idia na taunimanima edia hahedua bona edia hahediba herevadia mo. 23 Tomadiho momo ai, bona hahemanau ai, bona tau-ani ihadikadia ai, oromadia na aonega herevadia, to idia na asi anidia, badina be taunimanima ena ura dikadia asie hadareremu.