Deu 13 | MEU | STEP | Bogaragimui ai peroveta tauna eiava nihi tauna ta bema tore isi, toa ta eiava hoa karana ta bema gwauraia guna,

‏ Deuteronomy 13

1 Bogaragimui ai peroveta tauna eiava nihi tauna ta bema tore isi, toa ta eiava hoa karana ta bema gwauraia guna, 2 gabeamo ia ese e gwauraia guna toana eiava hoa karana bema vara, bena ia bema toma “Dirava idaudia, umui do asi dibamui diravadia, baita tahudia bona isiaidia baita lao heni”, 3 una peroveta tauna eiava nihi tauna ena hereva basio abia dae. Badina be Iehova, emui Dirava, ese e tohomuimu, baine diba, Iehova emui Dirava o lalokau heniamu mai lalomui idoidiai bona mai laumamui idoidiai ida eiava lasi. 4 Iehova, emui Dirava, murina amo ba raka, ia garina ba gari, iena haheḡani ba badinadia, ia gadona ba kamonai, ia isiaina ba lao heni, bona ienai ba tao. 5 A una peroveta tauna eiava una nihi tauna na bavalaia mase; badina be gwau-edeede karadia e hahedibalai, e tomu Iehova,emui Dirava, Aigupto tanona amo e hakaumui lasi bona iḡui rumana amo e ruhamui nege Diravana, ba gwau edeede henia, ma e tomu, Iehova, emui Dirava, vada e haḡanilaimui dalana amo ba raka siri. Kara havara na bogaragimui amo unu ba negea daure toma.

6 Readia tadikakamu korikorina eiava natumu maruanena eiava natumu hahinena eiava adavamu lalokauna eiava turamu lalokauna ese lalomu baine ania hehuni, baineto “Dirava idaudia isiaidia baita lao heni”. Unu dirava na readia oi asi dibamu bona senemu asi dibadia diravadia, 7 a bogaragidiai o nohomu besedia edia dirava, gabu kahikahidia ai eiava gabu daudaudia ai, eiava tanobada dokona kahana amo ela bona tanobada dokona kahana. 8 Unu bema kara toma, ena lalo-ani basio abia dae, bona basio kamonaihenia, bona basio bogaia hisi, bona basio hamauria, bona basio hunia. 9 Bavalaia mase; oi imamu baine guna ia ialana ai, murinai taunimanima iboudiai imadia ienai bae kau. 10 Nadi amo ba hodoa mase, badina be ia ese Iehova, emu Dirava, Aigupto tanona amo bona iḡui rumana amo e hakaumui lasi Diravana, ena amo baine hakaumui siri eto dainai. 11 Bena Israel taudia iboudiai bae kamonai bona bae gari, gabeai kara havara unuhetomana nega ta basie karaia lou, ela bona hanaihanai.

12 Readia Iehova, emui Dirava, baine henimui hanuana ta ai harina ba kamonai, 13 kara havara taudia haida bogaragimui amo vada e raka lasi, hanua taudia lalodia vada e ani, eto, “Dirava idaudia, umui do asi dibamui diravadia, isiaidia baita lao heni”. 14 Unu bema heto, umui na ba tahua bona ba henanadai malaka-malaka. Bema momokani kara dika-hereana unuhetomana vada e karaia bogaragimui ai, 15 una hanua taudia na dare amo bavaladia mase; hanua na ba habuaia tari, bona taunimanima iboudiai bona boromakau iboudiai na dare amo bavaladia ore. 16 Kohuna idoinai na ariara ai ba habou, unuseni ai ba doudia; kohu na bae ara, hanua danu baine ara, e kara ḡole-oho boubouna na heto, Iehova, emui Dirava, ena. Gabu na baine vahu hanaihanai, hanua na basie haginia lou. 17 = helaḡana ta imamu ai basio abia. Bena Iehova na ena badu siahuna ma baine keruma; ia na baine bogamui hisi bona baine hahutumamui, senemui e gwau henidia hamata heḡereḡerena. 18 Iehova, emui Dirava, erena boma kamonai, bona ena, haheḡani iboudiai hari dina ai na haḡanilaimuimu na boma badinadia, bona Iehova, emui Dirava, vairanai boma kara maoromaoro, bena unu baine karamui toma.