‏ Deuteronomy 4

1Israel e, vada na hadibalaimui taravatudia bona haheḡanidia ba kamonaidia bona ba badinadia; bena vada ba mauri, bona Iehova, senemui edia Dirava, baine henimui tanona ai ba raka vareai bona bavabia, emui. 2Vada na henimui haheḡanidia latadiai hereva ta basio atoa kau, bona edia amo hereva ta basio abia oho, a Iehova emui Dirava ena haheḡani ba badinadia, lau ese vada na henimui heḡereḡerena. 3Matamui amo vada o itaia, Iehova na ede e kara toma Baal-peoro ai; badina be Iehova emui Dirava ese Peoro taudia edia Baal e toma henia diho taudia umui bogaragimui ai e aladia mase, 4a umui Iehova, emui Dirava, o abidadama henia taumui iboumui ai vada ome mauri ema bona hari. 5A laloa, Iehova egu Dirava ese vada e henigu taravatudia bona haheḡanidia lau ese vada na henimui, ba raka vareai bona bavabia tanona ai ba badinadia totona. 6Ba badinadia, bona karadia ba kara; badina be emui aonega bona emui lalo-parara na unu amobae hedinarai, bese idau-idau vairadiai. Bena ini taravatu iboudiai baekamonai negana ai na baeto “Momokani ina bese badana na aonega bona lalo-parara besena”. 7Badina be edena bese badana edia dirava ese e raka henida kahimu, Iehova ita eda Dirava ta boi heniamu negadia ai e raka henida kahimu heḡereḡerena 8Bona edena bese badana edia taravatu bona edia haheḡani na mamaoro-mamaoro, lau ese hari dina ai na henimuimu taravatudia iboudiai heḡereḡeredia

9Nahuamu ba tohoa, laumamu ba gimaia, matamu amo vada o ita ḡaudia ba readia na garina, bena emu mauri dinadia iboudiai lalomu amo bae boio na garina. Natumu bona tubumu ba hadibadia, 10Horeb ai Iehova emu Dirava vairanai o gini dinana ai, Iehova ese lau e hereva henigu, eto “Taunimanima ba haboudia vairagu ai, egu hereva bae kamonai, bena lau garigu bae gari, tanobada ai bae noho dinadia iboudiai, bona natudia bae hadibadia, idia danu unu bae kara toma”. 11Bena umui na o raka kahira, ororo badi-tanona ai o gini. Una negana ai Iahi hururu-hururudia na ororoamo e daeva guba ai, bona ori dubuna ese gabu idoinai e havaburaia. 12Bena Iehova ese lahi bogaragina amo e hereva henimui; ena hereva vada o kamonai, to oromana asio itaia, gadona mo o kamonai. 13Bena ena taravatu e henimui, taravatu gwauta ba badinadia eto, bona huro-nadidia palakadia ruaosi ai etoredia. 14Una negana ai Iehova ese e haḡanigu, ena taravatu bona ena haheḡani baina hadibalaimui, bena ba lao henia bona bavabia tanona ai ba badinadia. 15Taunabunai, nahuamui ba toho; badina be Iehova ese Horeb ai lahi bogaragina amo e hereva henimui dinana ai ia oromana asio itaia, 16boma kerere, laulau ta boma koroa na garina: tau laulauna eiava hahine laulauna, 17eiava tanobada ena mauri ḡauna ta laulauna, eiava atai ai e rohomu manuna ta laulauna, 18eiava tano ai e raumu ḡauna ta laulauna, eiava davara ai e nohomu gwarumena ta laulauna. 19Nahuamui ba toho danu, guba ai ba gaga dae, dina bona hua bona hisiu ba itadia, negadia ai na lalomui bae hekwakwanai bena ba toma henidia diho na garina. Idia be Iehova, emui Dirava, ese vada e kara, guba henunai e nohomu besedia iboudiai ihanamodia. 20A Iehova ese Aigupto amo vada e hakaumui lasi, e kara auri amuna amo bema verimui lasi na heto, ena bese korikori ai baine halaomui totona. Hari dina ai umui na iena bese.

21Iehova ese lau e badu henigu umui daimui ai, bena e gwau hamata, lau ese Ioridane sinavaina basina hanaia, bona Iehova emui Dirava ese baine henimui tanona namona basina raka vareai eto. 22Lau na ina tano ai baina mase, basina hanaia Ioridane sinavaina unukahana ai; a umui vada ba hanaia, una tano namona bavabia emui. 23Nahuamui ba toho, Iehova emui Dirava ese vada e henimui taravatuna na basio laloa boio; bona laulau ta basio koroa, badina be Iehova, emui Dirava, ese una kara taravana vada e atua. 24Badina be Iehova, emui Dirava, na lahi ḡaraka-ḡaraka; ia na vaḡeḡe Diravana.

25Natumui bona tubumui bae vara, bona una tano ai ba buruka, murinai boma kerere, ḡau ta laulauana boma koroa, Iehova, emui Dirava, vairanai boma kara havara bona ena badu boma havaraia, 26lau ese hari dina ai guba ladana ai bona tanobada ladana ai na hamaoromuimu umui na asi vanahana ba mase ore, una tano, iabina totona Ioridane sinavaina ba hanaia tanona, lalona amo ba boio. Basio noho daudau unuseni ai: do ba mase ore. 27Iehova ese baine hakarohomui rohoroho tanobada besedia bogaragidiai; vada ba gadoi, idau bese idau bese bogaragidiai, Iehova ese baine hakarohomui gabudia ai. 28Unuseni ai au diravadia bona nadi diravadia, taunimanima imadia amo e kara ḡaudia, asie roharohamu, asie kamonaimu, asie anianimu, asie bonabonamu, ḡaudia ba toma henidia diho. 29To unu amo Iehova, emui Dirava, do ba tahua; bena ba tahua mai lalomui idoidiai bona mai laumamui idoidiai negana ai vada ba davaria. 30Dina gabedia ai, hisi bavani dinadia ai, ini kara iboudiai na emui ai bae vara; una negana ai Iehova, emui Dirava, do ba lou henia bona ba kamonai henia. 31Badina be Iehova, emui Dirava, na hebogahisi Diravana; ia na basine kahumui nege bona basine habuamui tari, bona ena gwau-hamata, senemui e gwau henidia hamata, na basine laloa boio.

32Nega gunadia sivaraidia ai ba tahua, Dirava ese taunimanima e karadia matama tanobada ai ema bona hari umui emui nega ai, bona guba dokona ela , bona guba dokona ai, ba henanadai, kara badana ta inihetomana na nega gunana ta ai, e vara bena sivaraina e gwauraia eiava. 33Nega ta bese ta taudia , ese Dirava gadona lahi bogaragina amo e hereva vada e kamonai, umui o kamonaiva heḡereḡerena, bena dounu e mauri, eiava? 34Eiava nega ta Dirava ese bese ta vada e lao henia, idau bese bogaragina amo vada e abia, iena a?, hahehisi amo, toa amo, hoa karadia amo, tuari amo, imana goadana amo, imana itoi-rorona amo, hahegari badadia amo, vada e abia,Iehova, emui Dirava, ese umui daimui ai bona umui vairarnui ai Aigupto ai, e karaia heḡereḡerena, a? 35Umui emui ai vada e hedinarai: ba diba Iehova na Dirava; ia na asi idaina. 36Guba amo e hereva henimui, baine hadibamui totona. Tanobada ai ena lahi badana e haheitalaimui; bena ena hereva na lahi bogaragina amo o kamonai. 37Senemui e ura henidia bena garadia e abidia hidi, bona umui na ia vairanai Aigupto amo e hakaumui lasi mai siahu-badana ida, 38bese badadia bona bese goadadia umui vairamuiai e luludia lasi, umui baine hakaumui vareai bona edia tano baine henimui totona, hari dina ai vada e karaiamu heḡereḡerena: 39una dainai hari dina ai vada ba diba bona lalomui ai bavabia dae, Iehova na Dirava, guba ai bona tanobada ai; ia na asi idaina. 40Taunabunai, ena taravatu bona ena haheḡani, hari dina ai na henimuimu ḡaudia, na ba badinadia; bena ba namo, bona natumui danu bae namo umui murimui ai, bona emui dina bae hoho, Iehova, emui Dirava, ese e henimui hanaihanaimu tanona ai.

Roho-mauri Hanuadia

41Mose ese hanua toi e abidia hidi, Ioridane sinavaina mairiveina kahana ai, 42ala-ala tauna, bamona e alaia mase, dia e inai henia guna dainai, toe hapadidia dainai, ia ese unu hanua ta baine heau henia, baine; roho mauri helaoreana. 43Hanuadia bini: Besere, tano ḡaḡaena ororodia ai, na Ruben iduhuna taudia edia; Ramoto, Gilead ai, na Gad iduhuna taudia edia; bona Golan, Basan ai, na Manase taudia edia.

Haroro ihadokona

44Taravatu binai, Mose ese Israel taudia vairadiai e gwauraia. 45Haheḡani bona taravatu bona hahemaoro herevadia bini, Mose ese Israel taudia e gwaurai henidia, Aigupto amo e raka Iasi murinai. 46Gabuna be Ioridane sinavaina unukahana ai, Bete-peoro e vaira henia kourana ai, Sihon, Amoro pavapavana, Hesebon ai e nohova tauna, ena tano ai. Hari Sihon na Mose bona Israel taudia ese e hadarerea, Aigupto amo e raka lasi murinai, 47bena ena tano e abia. Og, Basan pavapavana, ena tano danu e abia. Unu pavapava raruosi na Amoro taudia edia pavapava: edia noho gabuna na mairiveina kahana ai, Ioridane sinavaina unukahana ai; 48Aroere, Aranon kourana isena ai, e matamaia, e laomu ela bona Sirion ororona (una na Heremon ladana ta); 49bona Araba taorana idoinai, Ioridane sinavaina mairiveina kahana ai, ela bona Araba gohuna, Pisga ororona badi-tanona ai.