Exo 31 | MEU | STEP | Iehova ese Mose ma e hamaoroa, eto,

‏ Exodus 31

Karakara Taudia

1 Iehova ese Mose ma e hamaoroa, eto, 2 Vada na abia hidi tauna ladana na Besalele, Uri natuna, Huru tubuna, Iuda iduhuna tauna. 3 Dirava ena Lauma vada na henia, baine aonega bona lalona baine parara bona ima karakara ḡaukaradia baine diba helaoreana. 4 Ia nagold bonasilver bona auri labora-labora ḡaudia namodia baine kara, 5 bona herahera nadidia baine utu, bona au baine koro, ḡaukara idau-idau ikaralaidia. 6 Oholiab danu vada na abia hidi: ia na Ahisamaka natuna, Dan iduhuna tauna. Kara-kara taudia iboudiai danu lalodia vada na hapararadia, vada na haḡanilaimu ḡaudia iboudiai bae kara diba: 7 hebou kalagana, bona taravatu mauana mai ikaruhina ida, bona kalaga kohudia iboudiai, 8 bona pata helaḡana mai kohuna idoinai, bona lamepa patana mai kohuna idoinai, bona muramura patana, 9 bona ihaboulaina patana mai kohuna idoinai, bona ranu dihuna mai ihahelai-kauna ḡauna ida, 10 bona dabua helaḡadia, Aaron mai natuna ida edia, hahelaḡa karadia bae kara negadia ai bae doki, 11 bona ihorodia dehorona, bona muramura mai bonadia, gabu helaḡana ena. Na haḡanilaimu ḡaudia iboudiai na idia ese bae kara.

Dina Helaḡa Imatauraina

12 Iehova ese Mose ma e hamaoroa, eto, 13 Israel taudia ba haḡanidia, egu Dina Helaḡa bae matauraidia hanaihanai. Badina be ia na toa ta, lau bona umui padadai, emui uru idoidiai lalodiai: iena amo ba diba lau na Iehova, umui ihahelaḡamui Diravana. 14 Taunabunai, Dina Helaḡa na ba matauraia, badina be ia na helaḡa emui ai: basine matauraia tauna na bae alaia mase; bona una dina ai baine ḡaukara tauna na ena iduhu amo bae negea daure. 15 Dina tauratoi lalodiai ba ḡaukara, a dina ihahituna na Dina Helaḡa, laḡa-ani dinana; vada e helaḡa vaitani, Iehova ena. Dina Helaḡa, laḡa-ani dinana; vada e helaḡa vaitani, Iehova ena. Dina Helaḡa ai baine ḡaukara tauna na bae alaia mase. 16 Israel taudia ese Dina Helaḡa bae matauraia uru idoidaia; ia na baine mia hanaihanai herohemainona toana. 17 Ia na mia hanaihanai toana, lau bona umui Israel taumai padadai. Badina be Iehova ese guba bona tanobada e karadia, dina tauratoi lalodiai, a dina ihahituna ai e laḡa ani, bona e kara ḡaudia e moalelai.

Taravatu Nadidia

18 Ena hereva, Mose ida e hereva-herevalai Sinai ororona ai, e ore ai, Iehova ese taravatu nadidia ruaosi Mose e henia: umu nadi palakadia ruaosi be Dirava ese imana kwakikwakina amo taravatu e torelai nadidia.