Eze 21 | MEU | STEP | Iehova ena hereva na egu ai e kau, eto,

‏ Ezekiel 21

Iehova ena dare

1 Iehova ena hereva na egu ai e kau, eto, 2 Taunimanima natuna e, talaimu na Ierusalem ba henia, bona gabu helaḡadia latadiai ba haroro. Israel tanona latanai ba peroveta; 3 Israel tanona ba hereva henia, baoto, Iehova ini e gwau tomamu: Lau ese oi na inai henimumu; egu dare na iudalaina pauana amo baina veria lasi, bena kara maoromaoro taudia bona kara dika taudia na oiemu amo baina utudia oho. 4 Badina be kara maoromaoro taudia bona kara dika taudia na oiemu amo baina utudia oho dainai, egu dare na iudalaina pauana amo baine lasi, taunimanima iboudiai, diho kahana amo ela bona mirigini kahana, ihadikadia totona. 5 Bena taunimanima iboudiai bae diba, lau Iehova ese egu dare na iudalaina pauana amo vada na veria lasi; ḡauna na basine hetoi vareai lou. 6 Taunabunai, taunimanima natuna e, ba ganaḡana, mai dara-dokomu bona mai lalo-hisihisimu iditana ida ba ḡanaḡana, idia vairadiai. 7 Bena idia ese bae hereva henimu, baeto “Dahaka dainai o ḡanaḡanamu?” negana ai, baoto “Ini hari daidiai. Baine kau negana ai, dara iboudiai bae doko, bona ima iboudiai bae manoka, lauma iboudiai bae daure, bona tui iboudiai bae manoka-manoka ranu na heto. A ilaia, ia na e maimu, bona karana na baine ḡuḡuru”. Ḡaubada Iehova na e herevamu.

8 Bena Iehova ena hereva na egu ai e kau, eto, 9 Taunimanima natuna e, a peroveta, baoto, Iehova ini e gwau tomamu: Baoto

Dare ta, dare ta vada e segea,
vada e hakimore-kimorea danu;
10 vada e segea, ala-ala totona,
vada e hakimore-kimorea, kevaru na heto baine kevaru-kevaru totona.
Eiava baita moale hebou a? Natugu e, hekwadi auna vada o dadaraia, bona au amo e kara ḡaudia iboudiai danu. 11 Taunabunai, dare na vada e heni lao, bae hakimore-kimorea, bona imadia ai bae abia kau totona; vada e segea bona vada e hakimore-kimorea, ala-ala tauna iunana ai bae atoa totona. 12 Taunimanima natuna e, a tai, a tai lolololo. Badina be ia na egu bese ihadikana bona Israel lohiadia iboudiai ihadikadia ḡauna; idia na egu bese taudia ida vada e heni, dare ena. Taunabunai, mamumu ba pata. 13 Badina be ia na dia hahetoho. Hekwadi auna boma dadaraia, ia ese dahaka bema havaraia diba? Ḡaubada Iehova na e herevamu.

14 Taunabunai, taunimanima natuna e, ba peroveta; imamu ba pata dagu, bena dare na baine dapadapa nega harua, oibe nega hatoi, taunimanima iala-masedia darena, ia na heala-ala badana darena, e ḡeḡedia ahumu ḡauna. 15 Bena daradia na bae doko bona hutuma na edia ikoukou iboudiai lalodiai bae hekida diho totona, lau ese dare kimore-kimorena vada na heni; ia na kevaru na heto e kevaru-kevarumu; vada e hakimore-kimorea, ala-ala totona. 16 Idibamu ai bona launmu ai ba lapalapa, emu dare isena e lapa henimu gabudia. 17 Lau ese danu imagu baina pata dagu, egu badu ḡaraḡarana baina ha- orea. Lau Iehova vada na hereva.

18 Bena Iehova ena hereva na egu ai ma e kau, eto, 19 Taunimanuna natuna e, Babulono pavapavana ena dare daladia rua toadia ba kara; ruaosi na tano tamona amo baema. Bona toa auna ba haginia, hanua dalana badi-tanona ai. 20 Dare ena mai dalana toana ba karaia; Raba, Amono taudia edia hanua, bona Iuda, bona Ierusalem, hanua mai maguna, baine mai henidia. 21 Badina be Babulono pavapavana na dala katakata ai e ginimu, dala ruaosi badi-tanodia baine bagu haoro totona; diba e rubediamu, ena dirava laulaudia e nanadaidiamu, ase ai toa e tahudiamu. 22 Ia imana idibana ai Ierusalem hanua e hedinaraimu, lolo-dagu ihavarana, hanua iduaradia igwadadia vaḡomadia iato-hatadia, tano ilarebana, bona hanua iḡegelaina kohorodia ihaginidia. 23 A idia ese mamina bae abia, bagu-haoro koikoina na heto; idia ese gwauhamata helaḡadia vada e gwaurai; a ia ese edia kerere e hahelalolaidia une, bae heabi mauri totona.

24 Taunabunai, Ḡaubada Iehova na ini e gwau tomamu: Badina be emui kerere ihelalolaidia na taunimanima lalodiai vada o havaraia, bona emui kara kerere vada o hulalalaidia, bena emui kara iboudiai lalodiai emui dika e hedinaraimu, bona badina be umui na sibomui o helalo unemu, una dainai emui kara dika lalodiai bae abimui. 25 Oi danu, Israel pavapavana, tau dikana, o hahemiro taumu, emu dina vada e kau, davamu bavabia vaitani negana vada e kau. 26 Ḡaubada Iehova na ini e gwau tomamu: Kwara dabuana ba ruhaia oho, kwara ivavalaina ḡauna ba kokia oho; harihari e miamu ḡaudia na basie mia; henu ai e miamu ḡauna na ba hadaea, atai ai e miamu ḡauna na ba hadihoa. 27 Baina havahua, baina havahua, baina havahua; sisina taina basine mia, ela bona ia biaguna korikorina bainema; bena ia baina henia.

Hahemaoro Amono taudia latadiai

28 Taunimanima natuna e, ba peroveta, baoto, Ḡaubada Iehova ese Amono taudia mai edia heḡonaḡonalai herevadia ida ini e herevalaidia tomamu. Baoto: Dare ta, dare ta vada e veria lasi, ala-ala totona. Vada e hakimorekimorea, baine hururu-hururu bona baine kevaru-kevaru. 29 Idia ese oi daimu ai e mata hanai koikoimu bona e bagu haoro koikoimu lalonai, una dare na kara dika taudia, e hahemiro taudia, aiodia ai baine heato; edia dina vada e kau, davadia bae abi vaitani. 30 Iudalaina pauana lalonai ba udaia lou. E havaramu gabuna ai, emu vara tanona korikorina ai, lau ese baina hahemaoro henimu. 31 Egu badu na latamu ai baina bubua dobi; egu badu-ḡaraḡara lahina amo baina pururumu; daḡedaḡe taudia, hahebua-tari mai dibadia taudia, imadia ai baina atomu. 32 Oi na lahi auna ai baina halaomu; oi raramu na tano bogaraginai baine mia; badina be lau Iehova vada na hereva.