Eze 24 | MEU | STEP | Laḡani ihataurahani-tana huana ihagwautana dinana ihagwautana lalonai, Iehova ena hereva na egu ai e kau, eto,

‏ Ezekiel 24

Hereva heḡereḡerena: Uro mai deḡideḡina

1 Laḡani ihataurahani-tana huana ihagwautana dinana ihagwautana lalonai, Iehova ena hereva na egu ai e kau, eto, 2 Taunimanima natuna e, Ina dina, hari ina dina, ladana ba torea; Babulono pavapavana ese Ierusalem vada e koua heḡeḡe, hari ina dina ai. 3 Hereva heḡereḡerena na ina gwau-edeede besena ba gwaurai henia, baoto, Ḡaubada Iehova na ini e gwau tomamu:

Uro ba laia kau, ba laia kau;
ranu na ia lalonai ba seia danu.
4 Hidio taidia ba uda dobi,
namodia, koekoe bona paḡa;
turia namo-hereadia amo ba hahonua.
5 Mamoe ḡoeva-daena ta bavabia,
lahi audia ba rakudia,
hidio taidia ba nadudia,
mai turiana ida ba nadua.
6 Taunabunai, Ḡaubada Iehova na ini e gwau tomamu: Hanua mai rarana madi ihabaina! Uro mai deḡideḡina, deḡideḡina do asie negea ḡauna, madi ihabaina! Hidio taidia taidia na ia lalona amo ba vai dae, namodia bona dikadia basio hididia. 7 Badina be rarana, vada e hebubu ḡauna, na dounu ia bogaraginai; nadi latanai e atoa, tano ai se bubua bena ḡahu ese se tahunia. 8 Egu badu ihavarana bona dava iabina totona, ia ese e hahebubua rarana na lau ese nadi latanai vada na atoa, basine hetahuni helaoreana. 9 Taunabunai, Ḡaubada Iehova na ini e gwau tomamu: Hanua mai rarana madi ihabaina! Lau ese danu senu baina habadaia. 10 Lahi audia momo ba raku, Iahi ba ha-araia, hidio ba nadua namonamo, vasiahu ba seia oho, turia ba haḡoledia oho. 11 Bena asi anina ai gida latadiai bavatoa kau, baine siahu totona, bena aurina labora-laborana na baine kiama-kiama; bena mirona na baine veve ia lalonai, bona deḡideḡina na baine ara ore. 12 Vada na hekwarahi kava; ia deḡideḡina udunanana lahi ai se oremu. 13 Deḡideḡina na oiemu lebulebu miro-hereana. Badina be bama haḡoevamu, to emu miro badana amo asio goeva; basio ḡoevaḡoeva lou ela bona egu badu na baina hagugurua latamu ai. 14 Lau Iehova vada na hereva; ina na baine vara, lau ese baina karaia; lau na basina helalo lou, basina hebogahisi, basina helalo kerehai. Emu dala bona emu kara heḡereḡeredia ai baina hahemaoro henimu. Ḡaubada Iehova na e herevamu.

Esekiel adavana e mase

15 Iehova ena hereva na egu ai ma e kau, eto, 16 Taunimanima natuna e, mata-kunumai tamona ai oi matamu ihamoalena baina abia oho, ḡau tamona lalomu basine hisihisi bona basio tai, bona iruru-matamu basie diho. 17 Ba hahodi, to basio ḡanaḡana; mase taina basio tai. Dabua na kwaramu ba kumilaia, bona tamaka na aemu ai ba kara; udumu basio ḡovaia, bona basio ani helaḡa. 18 Taunabunai, daba ai lau ese taunimanima na hereva henidia, bena adorahi ai adavagu na e mase. Bena daba rerena ai, e haḡanigu heḡereḡerena ai na kara.

19 Bena taunimanima ese e nanadaigu, eto, Ini ḡau anidia emai ai, bona ini o kara karadia anidia, basio hamaoromai a? 20 Bena na haere henidia, nato, Iehova ena hereva na egu ai e kau, eto, 21 Israel besena ba hamaoroa, baoto, Ḡaubada Iehova na ini e gwau tomamu: A itaia, egu gabu helaḡana baina hamiroa, emui siahu iheaḡilaina toana, matamui ese e moalelaiamu ḡauna, laumamui ese e uralaiamu ḡauna; bena natumui mamaruanedia bona hahinedia unuseni ai o rakatanidia na dare amo bae mase. 22 Bena-lauegu kara heḡereḡerena ai do ba kara; udumui basio ḡovadia bona basio ani helaḡa. 23 Kwaramui dabuadia na kwaramui ai bae mia, bona emui tamaka na aemui ai bae mia; lalomui basie hisihisi bona basio taitai, a emui kara havara ai ba varoda-varoda, bona ba heḡanaḡana heheni. 24 Unuhetomana, Esekiel na toa ta ai bainela emui ai, ia ese e kara karadia iboudiai heḡereḡeredia, umui ese ba kara. Ina na baine kau negana ai, ba diba lau na Ḡaubada Iehova.

25 iBona oi, taunimanima natuna e, edia gabu aukana, edia moale bona edia hairai, matadia ese e moalelaiamu bona lalodia ese e uralaiamu ḡauna, bona natudia mamaruanedia bona hahinedia danu, na edia amo baina abidia oho dinana ai, 26 una dina ai heau tauna ta na dekemu bainema, hari baine hamaorolaimu. 27 Una dina ai, udumu baine hekeho una heau tauna enai; vada ba hereva, basio mu lou. Unu amo oi na toa ta ai baola, idia ediai; bena bae diba lau na Iehova.