Eze 32 | MEU | STEP | Laḡani ihagwauta-ruana huana ihagvauta-ruana dinana gini-gunana ai Iehova ena hereva na egu ai e kau, eto,

‏ Ezekiel 32

Herohe-ahu Farao latanai

1 Laḡani ihagwauta-ruana huana ihagvauta-ruana dinana gini-gunana ai Iehova ena hereva na egu ai e kau, eto, 2 Taunimanima natuna e, Farao, Aigupto pavapavana, latanai ba rohe ahu, ba hereva henia, baoto:

Oi na o laloamu oi na leona ta, bese idau-idau bogaragidiai,
a oi na davara hualana na heto;
emu sinavai lalodiai o sese dae roha,
aemu amo ranu o halamiriamu,
bona edia sinavai ranudia o haduhudiamu.
3 Ḡaubada Iehova na ini e gwau tomamu:
Egu ole na latamui ai baina tahoa kau,
bese idau-idau hutuma bada edia amo,
bena egu ole ai bae verimu vareai kone ai.
4 Tano ai baina tahomu dobi,
tano paka ai baina negemu;
atai manudia iboudiai baina siaidia,
latamu ai bae roho roho kau;
tanobada idoinai ena uda boromadia bogadia na
oiemu amo baina hakunudia.
5 Oi hidiomu na ororo ai baina hapetapetalaia,
oi tau-animu amo koura baina hahonudia.
6 Oi raramu baina ha-arua,
tano idoinai baine utua dae ela bona ororo,
koupa na ba hahonudia.
7 Baina habuamu tari negana ai guba baina ḡovaia ahu,
bona hisiuna baina hadiburadia;
dina na ori amo baina ḡovaia ahu,
bona hua na basine diari.
8 Guba diaridia iboudiai na oi daemu ai baina hadiburadia,
bona emu tano baina havaburaia.
Ḡaubada Iehova na e herevamu.
9 Bese idau-idau bogaragidiai, asi dibamu tanodia lalodiai, mai iguimu ida baina laohaimu negana ai, bese momo taudia kudoudia baina hahetahadia. 10 Bese momo baina hagaridia taku oi bagumu ai, bona edia pavapava bae heude-heude oi daimu ai, egu dare baina hahelado henidia negana ai; bae heude-heude loulou, ta ta ena mauri ena mauri bagudiai, emu moru dinana ai. 11 Badina be Ḡaubada Iehova na ini e gwau tomamu: Babulono pavapavana ena dare na oi latamu ai baine kau. 12 Emu orea taudia hutuma na goada taudia edia dare amo baina hamasedia, bese idau-idau bogaragidiai e gari henidia badamu taudia iboudiai bunu.

Aigupto ena heaḡi bae ha-orea,
ena orea taudia hutuma bae mase.
13 Ena ubu-ubu ḡaudia iboudiai baina habuadia tari,
ranu gabudia momo badibadidiai;
taunimanima aedia ese unu gabu basie moimoilaidia lou,
ubu-ubu ḡaudia-aedia ese danu basie moidia tao.
14 Bena edia ranu gabudia baina hanegaridia,
bona edia sinavai baina ha-arudia dehoro na heto,
Ḡaubada Iehova na e helevamu.
15 Aigupto tanona baina havahua,
bona tano anina idoinai baina abia oho,
bona e noholaiamu taudia iboudiai baina rahudia mamase negana ai,
idia bae diba lau na Iehova.
16 Unu bae rohe ahu toma; bese idau-idau hahinedia ese bae rohe ahu; Aigupto latanai bona ena taunimanima hutuma latadiai bae rohe ahu. Ḡaubada Iehova na e herevamu.

17 Laḡani ihagwauta-ruana huana gini-gunana dinana ihagwauta-imana ai, Iehova ena hereva na egu ai e kau, eto: 18 Taunimanima natuna e, Aigupto ena orea taudia hutuma taidia ba tai, bona ba siaidia diho, idia bona bese herea-daedia hahinedia danu, mase gabuna ai bae diho, guri ai vada e diho taudia dekediai.

19 Daika na hairai ai o hereaiamu?
A diho lao, asie peritomedia taudia ida bae hahekuremu.
20 Idia na dare ese e aladia mase taudia bogaragidiai bae hekida diho, bona ena orea taudia hutuma iboudiai na ia ida bae hekure. 21 Lohia herea-daedia ese idia bona idurudia taudia na mase gabuna bogaragina amo bae herevalaidia, baeto “Asie peritomedia taudia na vada e diho, e hekuremu, asie marere-mareremu; dare ese vada e aladia mase”.

22 Asuria na unuseni ai, ena orea idoinai danu; edia gara ese e geḡea daemu, iboudiai na dare ai e mase taudia mo. 23 Edia gara na guri dobu-masemasena ai e miamu, bona ena orea ese ena gara e ḡeḡea daemu; iboudiai, gunaguna mauri taudia edia tano ai hahegari karadia e karava taudia, na dare ai vada e mase.

24 Elam na unuseni ai, bona ena orea taudia hutuma iboudiai ese iena gara e ḡeḡea daemu. Iboudiai na dare ai e mase; do se heperitome ai idia na mase gabuna ela. Gunaguna idia ese mauri taudia edia tano ai hahegari karadia e karava; harihari guri ai e dihomu taudia ida e hemarai heboumu. 25 Idia ese ena hekure gabuna vada e lailaia, e aladia mase taudia bogaragidiai, ia mai ena orea taudia hutuma iboudiai ida; edia gara ese e ḡeḡea daemu, iboudiai na do se heperitome taudia, dare ai e mase taudia mo. Badina be idia igari-henidia vada e hepiu rohoroho, mauri taudia edia tano ai; idia na guri ai e dihomu taudia ida e hemarai heboumu, e aladia mase taudia ida e atodiamu.

26 Mesek bona Tubal na unuseni ai, mai edia orea taudia hutuma ida; edia gara ese e ḡeḡedia daemu. Iboudiai na do se heperitome taudia, dare ai e mase taudia mo. Badina be idia ese mauri taudia edia tano ai hahegari e havaraia rohoroho. 27 Idia na sene edia goada-herea taudia ida asie hekure heboumu. Unu na mai edia tuari ḡaudia ida mase gabuna ai e diho, edia dare ai e haheKwinadia bona edia kesi na turiadia latadiai heheato; badina be goada-herea taudia edia hahegari na mauri taudia edia tano ai e miava. 28 Taunabunai ba makohi, dare ese e aladia mase taudia ida ba hekida diho, do se haheperitome taudia bogaragidiai.

29 Edom na unuseni ai, ena pavapava bona ena lohia iboudiai. Idia na goada dikadika, to dare ai e mase taudia ida vada e hahekuredia. Idia na se haheperitome taudia, guri ai e dihomu taudia, ida e hekuremu.

30 Mirigini kahana lohiadia iboudiai na unuseni ai, bona Sidono taudia iboudiai danu. Idia na e aladia mase taudia ida nda e hemarai heboumu, edia goada ese e havaraia hahegarina idoinai dainai. Idia na do se haheperitome ai e hekuremu, dare ai e mase taudia ida; idia na guri ai e dihomu taudia ida e hemarai heboumu.

31 Ḡaubada Iehova na e tomu: Farao ese baine itadia negana ai, ia na sibona tauhalo baine davaria, ena orea taudia hutuma daidiai; oibe, Farao mai ena tuari oreana idoinai, dare ai e mase taudia, daidiai. 32 Badina be ia ese hahegari e piua rohoroho, mauri taudia edia tano ai; una dainai ia na do se haheperitome taudia bogaragidiai bae hahekurea, dare ai e mase taudia, Farao mai ena orea taudia hutuma iboudiai, ida. Ḡaubada Iehova na e herevamu.