Gen 16 | MEU | STEP | Sarai, Abram adavana, vada e gabani, natuna ta se havaraia iena. Ia na mai ena hesiai hahinena ta, hane Aigupto, ladana be Hagara.

‏ Genesis 16

Ismael e vara

1 Sarai, Abram adavana, vada e gabani, natuna ta se havaraia iena. Ia na mai ena hesiai hahinena ta, hane Aigupto, ladana be Hagara. 2 Bena Sarai ese Abram e hamaoroa eto, Dibamu Iehova ese natumu ta se henigu; na noimumu, egu hesiai hahinena avabia; readia natugu ta iena amo baina abia. Bena Abram ese Sarai ena hereva e abia dae. 3 Taunabunai, Abram na laḡani gwauta Kanaan tanona ai vada e noho negana ai, Sarai ese ena hesiai hahinena Hagara, hane Aigupto, e abia, adavana Abram e henia, baine adavaia. 4 Bena ia na Hagara ida e eno bou. Bena hahine na e rogorogo; bena dibana vada e rogorogo dainai ia ese biaguna hahinena se matauraia. 5 Bena Sarai ese Abram e gwau henia, eto, Oiemu kerere ese vada e hadikagu; egu hesiai hahinena na henimu, bavadavaia, a dibana vada e rogorogo dainai ia na se matauraigumu: Iehova ese ita raruosi baine hahemaoro henida. 6 A Abram ese Sarai e haere henia, eto, Hahine na oi imamu ai; emu ura heḡereḡerena ba kara henia. Bena Sarai ese e daḡedaḡe henia, ela bona hahine na e heau.

7 Bena Iehova ena aneru ta ese tano ḡaḡaena ai e davaria, ranu gurina ta badibadinai. Una ranu gurina na Suru dalana ai. 8 Ia eto, Hagara, Sarai ena hesiai hahinemu, ede amo oma bona ede bo laomu? Hahine na e haere, eto, Biagugu hahinena Sarai vairana amo vada na heau. 9 Aneru ma eto, A lou lao, ia erena ba kamonai. 10 Iehova ena aneru ma eto, Oi garamu lau ese baina hahutumadia, basie duahidia diba. 11 Iehova ena aneru ma e hamaoroa lou, eto, Benaini, vada o rogorogomu; mero ta bavabia, ladana ba hatoa Ismael, ^{▼▼“Ismael” anina be “Dirava e kamonaimu”.} badina be Iehova ese emu tai vada e kamonai. 12 Ia na raka edea tauna ai bainela; ia ese taunimanima iboudiai baine inai henidia, bona taunimanima iboudiai ese ia bae inai henia. Ia na tadikakana edia noho gabudia mairiveina kahana ai baine noho. 13 Bena hahine ese Iehova, e hereva henia Diravana, ladana e hahanea, eto, Vada o ha=eregumu Diravamu! Badina be ia eto, Tano ḡaḡaena ai vada na mata hanai, e hahedinarai henigu Diravana vada na itaia. 14 Taunabunai una ranu gurina ladana e hatoa Mauri bona Mata-hanai Gurina: ia na Kade bona Bered padadiai.

15 Bena Hagara na e mara, mero ta e abia, Abram ena; bena Abram ese natuna, Hagara ese e havaraia merona, ladana e hatoa Ismael. 16 Hagara ese Ismael e havaraia negana ai, Abram ena mauri laḡanidia na taurahaniahui tauratoi.