Gen 25 | MEU | STEP | Abraham ese hahine ta ma e adavaia, ladana na Ketura.

‏ Genesis 25

Abraham e headava lou

1 Abraham ese hahine ta ma e adavaia, ladana na Ketura. 2 Natudia ia bogana amo e vara ladadia bini: Simuran bona Iokosan bona Medan bona Midian bona Isabak bona Sua. 3 Iokosan ese Seba bona Dedan e havaradia. Dedan ese Asuri bona Letusi bona Leumi besedia e havaradia. 4 Midian ese Efa bona Efere bona Hanok bona Abida bona Eldaha e havaradia. Ini iboudiai na Ketura garana. 5 Abraham ese Isaak na ia dihina ai e halaoa. 6 A adavana oredia natudia na maurina ai e harihari henidia, bena e siaidia karoho, mairiveina kahana ai bae hanoho.

Abraham e mase

7 Abraham ena mauri laḡanidia iboudiai na sinahu-ta hituahui ima. 8 Bena Abraham e mase: ia na buruka herea, ena mauri laḡanidia na diaḡau; bena varavarana ediai eha hebou. 9 Bena ia natuna raruosi, Isaak bona Ismael, ese e abia, Makapela kohuana ai e guria: una kohua na Mamare kahana ai, Efron Sohara, Hiti tauna, ena tano ai. 10 Tanona bunai Abraham ese Hiti taudia edia amo e abia. Unuseni ai Abraham e guria, adavana Sara ida. 11 Abraham ena mase murinai, Dirava ese natuna Isaak e hanamoa. Isaak na Bere-lahai-roi ranu gurina badibadinai e nohova.

Ismael garana

12 Ismael garana bini: ia na Abraham natuna, Sara ena hesiai hahinena Hagara, Aigupto hahinena, bogana amo. 13 Ismael garana ladadia bini: natuna roboana na Nebaioto; ia murinai e vara taudia be Kedara bona Adabeel bona Mibisam 14 bona Misima bona Duma bona Masa 15 bona Hadad bona Tema bona Ieturu bona Nafisi bona Kedema. 16 Ismael natudia bunu: ladadia bunu edia hanua bona edia taruha ladadia e hato; idia gwautararuosi na hanua ta ta e halohiadia. 17 Ismael ena mauri laḡanidia na sinahuta toi-ahui hitu. E mase, varavarana ediai eha hebou. 18 Edia tano na Havila ela bona Suru, Aigupto mairiveina kahana ai; tadikakadia iboudiai idia mo mairiveina kahana korikori ai e nohova.

Esau bona Iakob e vara

19 Abraham natuna Isaak garana bini: 20 Isaak ena vara laḡanidia na hari-ahui negana ai, ia ese Rebeka, Betuel tau Suria natuna, Laban tau Suria taihuna, e adavaia. Betuel na Padan-aram tauna. 21 Isaak ese Iehova e noia, adavana dainai, badina ia na gabani. Iehova ese ena noinoi e kamonaia; bena Rebeka e rogorogo. 22 Hekapa na ia bogana ai e hedavelai; bena ia eto, Ini e karagu tomamu be ede baina heto? Bena Iehova enai e henanadai. 23 Bena Iehova ese e haere henia, eto,

Iduhu rua na bogamu ai,
Bese rua na oiemu amo bae vara;
Ta ese ma ta baine hadarerea,
Tau guna ese tau muritai isiaina baine lao heni.
24 Ena mara negana e gini dae, bena memero rarua e vara hekapa. 25 E vara guna merona na mia kakakaka, derana danu momo, dabua huika-huika na heto; ia ladana e hatoa Esau. ^{▼▼“Esau” anina be “Huika-huika”.} 26 Gabeai tadina e vara, bena ia imana ese Esau aena geduna e dogoa tao; bena ladana e hatoa Iakob. ^{▼▼“Iakob” anina be “Ibolona”.} Isaak ena mauri laḡanidia na tauratoi-ahui, idia raruosi e vara negana ai.

Esau bona Iakob e bada oho bada oho

27 Memero raruosi na e bada oho bada oho. Esau na labana tauna mai aonegana, bona loaloa tauna; a Iakob na manada tauna bona konenoho tauna. 28 Isaak ese Esau e lalokau heniava, badina be ena labana damudia e aniva; a Rebeka ese Iakob e lalokau heniava.

29 Dina ta Iakob ese aniani e nadua; bena Esau na gunika amo e lasi mai manorina ida. 30 Esau ese Iakob e hereva henia, eto, Ena aniani kakakakana o naduamu na taina a henigu, aina ania, badina be e hitologu mase. Una dainai ia ladana ta e hatoa Edom. ^{▼▼“Edom” anina be “Kakakaka”.} 31 Iakob eto, Emu roboa ahuna na a henigu, aniani davana. 32 Esau eto, Be, mokona ba masemu, roboa ahuna ese ede baine hanamogu toma? 33 Iakob eto, A gwau hamata guna. Bena Esau e gwau hamata, roboa ahuna Iakob e henia, aniani davana. 34 Bena Iakob ese flaoa bona vasiahu e henia; bena ia na e aniani, e inuinu danu. Bena e tore isi, e raka lasi. Esau ese ena roboa ahuna unu e dadaraia toma.