Gen 26 | MEU | STEP | Doe bada e vara una tano ai, Abraham ena nega ai heḡereḡerena. Bena Isaak e tore isi, Gerara ela, Abimelek, Filistia pavapavana, dekena.

‏ Genesis 26

Isaak Filistia ai

1 Doe bada e vara una tano ai, Abraham ena nega ai heḡereḡerena. Bena Isaak e tore isi, Gerara ela, Abimelek, Filistia pavapavana, dekena. 2 Bena Iehova ese ienai e hedinarai, eto, Aigupto basiola; baina hadibalaimu tanona ai ba noho. 3 Ina tano ai ba noho, bena lau baina bamomu bona baina hanamomu; badina be ini tano idoidiai oi baina henimu bona oi garamu baina henidia, oi tamamu Abraham na gwau henia hamata heḡereḡerena. 4 Oi garamu danu baina hahutumadia, guba hisiudia na heheto bae hutuma; oi garamu daidiai tanobada besedia iboudiai bae namo; 5 badina be Abraham ese lau eregu e kamonai, egu hahedua, egu haheḡani, egu taravatu, iboudiai e badinadiava.

6 Taunabunai Isaak be Gerara ai e nohova. 7 A una gabu taudia ese ia adavana e nanadailaia, bena ia eto, Ia na taihugu. “Ia na adavagu” baineto na e gari, badina be ia eto, Ina gabu taudia na bae alagu mase readia, Rebeka dainai, badina ia na hahine namo-hereana. 8 Nega daudau unu e noho tomava, bena dina ta Abimelek, Filistia pavapavana, gabamauru amo e igo lasi, Isaak adavana Rebeka ida e itadia, e sihari. 9 Bena ia ese Isaak e gwau henia, eto, Lalogu vada eme parara, hahine na oi adavamu. Dahaka dainai oi oto “Ia na taihugu”. Isaak e haere henia, eto, Badina be na gari, haida ese ia dainai bae alagu mase na garina. 10 Bena Abimelek eto, Oi na ede vada o karamai toma? Tau ta oi adavamu ida bema eno bou, iboumai ai baiama kerere oi daimu ai. 11 Bena Abimelek ese ena hanua taudia taravadia e atu, eto, Isaak enai baine dau kau eiava adavana enai baine dau kau tauna na baine mase.

12 Isaak ese aniani e hado matama una tano ai, bena una laḡani tamona lalonai anidia sinahu sinahu e abi; badina be Iehova ese e hanamoa. 13 Ia na taḡa tauna ai ela, ena taḡa danu e bada e laova; 14 ena mamoe bona ena boromakau na hutuma herea, ena hesiai taudia danu hoho. Bena Filistia taudia ese e vaḡeḡe henia. 15 Bena ranu guridia iboudiai Abraham ena nega ai ena hesiai taudia ese e ḡei na Filistia taudia ese e tahuni. 16 Bena Abimelek ese Isaak e hamaoroa, eto, Ai emai amo a raka oho, badina be vada o hereamai.

17 Bena Isaak na e raka oho, Gerara kourana ai e taruha, unuseni ai e nohova. 18 Bena ranu guridia, tamana Abraham ena nega ai e ḡei bena Filistia taudia ese e tahuni, ia ese ma e gei lou; bona ladadia, tamana ese e hato heḡereḡeredia, ia ese ma e hato lou. 19 Isaak ena hesiai taudia danu koura ai guri e ḡei, bona ranu e lohilohiva gabuna ta e davana. 20 Bena Gerara seridia ireḡudia taudia na Isaak ena seri ireḡudia taudia ida e heatu, eto, Ina na ai emai ranu. Taunabunai, ia ese una ranu gabuna ladana e hatoa Esek, ^{▼▼“Esek” anina be “Heai”.} badina be e heatulaia, 21 Bena guri ta ma e ḡeia, to una danu e heatulaia, taunabunai ladana e hatoa Sitina. ^{▼▼“Sitina” anina be “Inai”.} 22 Unu amo ma e raka oho bena guri ta ma e ḡeia. Una na asie heatulaia; taunabunai ladana e hatoa Rehoboto; ^{▼▼“Rehoboto” anina be “Gabu”.} badina be ia eto, Iehova ese gabu ta vada e lailaia eda, iniseni ai baita noho namonamo.

Isaak Beresieba ai

23 Unu amo ia na Bere-sieba ela. 24 Bena una hanuaboi Iehova na ienai e hedinarai, eto, Lau na tamamu Abraham ena Dirava: basio gari, badina be lau ese na bamomumu; baina hanamomu bona garamu baina hahutumadia, egu hesiai tauna Abraham dainai. 25 Bena boubou patana ta unuseni ai e larebaia, bona Iehova ladana e hahanea. Unuseni ai danu e taruha, bona ena hesiai taudia ese ranu gurina e ḡeia.

26 Abimelek na Gerara amo ema, ia bona turana ta Ahusata bona ena tuari oreana biaguna Fikol, tatoiosi Isaak dekena ema. 27 Bena Isaak ese e hereva henidia, eto, O inai henigu bona o lulugu: harihari lau dekegu vada oma badina be dahaka? 28 Idia eto, Lalomai vada e parara Iehova ese vada e bamomu, taunabunai ai na a tomu: baita herohemaino bona baita gwau hamata heheni, 29 oi ese basio hadikamai, ai he ḡereḡeremai, emu ai asia dau kau, kara namodia mo a kara henimu, bona mai mainomu ida a siaimu, harihari Iehova ese e hanamomumu. 30 Bena Isaak ese aria e karaia: iboudiai e aniani hebou bona e inuinu hebou. 31 Daba ai e gwau hamata heheni. Bena Isaak ese e siaidia lao, mai mainodia ida ela. 32 Una dina ai Isaak ena hesiai taudia ia dekena ela, guri e geia herevana e hamaorolaia, eto, Ranu vada a davaria. 33 Bena una ranu gabuna ladana e hatoa Siba, ^{▼▼“Siba” anina na “Gwau-hamata”.} taunabunai una hanua ladana na Bere-sieba ema bona harihari.

Esau e headava

34 Esau ena mauri laḡanidia na hari-ahui, bena e headava, hahine rarua e abidia: Iuditi, Be-eri tau Hiti natuna, bona Basemata, Elon tau Hiti natuna. 35 A Isaak bona Rebeka lalodia na e hekwarahi unu hahine daidiai.