Isa 42 | MEU | STEP | Egu hesiai tauna a itaia; lau ese na imudaiamu. Ia na egu abi-hidi tauna; lau laumagu ese e moalelaiamu. Lauma ese e roheamu; ia ese hahemaoro ḡoevaḡoeva na bese idau-idau baine halasi henidia.

‏ Isaiah 42

Iehova ena hesiai tauna

1 Egu hesiai tauna a itaia; lau ese na imudaiamu.
Ia na egu abi-hidi tauna; lau laumagu ese e moalelaiamu.
Lauma ese e roheamu;
ia ese hahemaoro ḡoevaḡoeva na bese idau-idau baine halasi henidia.
2 Ia na basine lolo, gadona basine habadaia,
eiava ariara ai ia erena basie kamonai;
3 siriho pou basine hakwaidua,
bona gida basine habodoa;
na hahemaoro ḡoevaḡoeva baine halasia
mai momokanina ida.
4 Ena diari basine bodo; ia na basine helou kwaidu,
ela bona hahemaoro ḡoevaḡoeva na tanobada ai baine haginia,
bona kone tanodia ese iena taravatu bae laroa.

5 Dirava Iehova, guba e karaia bona e idia roro Diravana,
tanobada e lahaia bona anina e havaramu Diravana,
tanobada ai e nohomu taudia na laḡa e henidiamu
bona lalonai e loamu taudia na lauma e henidiamu Diravana,
ini e gwau tomamu:
6 Lau na Iehova; kara maoromaoro ai vada na boirimu,
oi imamu vada na abia, vada na reḡumu;
gwahamata toana ai vada na halaomu bese idau-idau ediai,
bona diari ai vada na halaomu basileia idau-idau ediai,
7 mata-kepulu taudia matadia ihapapadia totona,
bona iḡui taudia na hekou kunuka-kunuka rumana amo
bona dibura ai e helaimu taudia na dibura rumana amo
ba hakaudia lasi totona.
8 Lau na Iehova, ladagu bunai;
hairaigu na ta asina heniamu,
i'imodaigu na e koro kaivakukudia asina henidiamu.
9 A itaia, ḡau gunadia vada e vara,
harihari ḡau matamatadia na gwaurai hedinaraimu;
idia na do asie hedinarai negana ai
na hamaorolaimuimu.

Iehova i'imodaina

10 Ane matamatana avabia, Iehova ena;
tanobada dokona amo ia ba imodaia.
Davara baine guru, mai anina idoinai ida;
kone tanodia danu, mai inoholaidia taudia ida.
11 Tano ḡaḡaena mai hanuana hidaosi ida, gadodia bae habada,
Kedara ese e noholaidiamu hanuadia danu.
Sela inoholaina taudia ese moale anedia bae abi,
ororo doridia amo bae lolo.
12 Idia ese Iehova bae imodaia,
ia iheatolaina herevadia na kone tanodia ai bae gwaurai henidia.
13 Iehova na e raka lasimu, goada-herea tauna na heto,
tuari tauna na heto ena badu e hasiahuamu;
e boi lolomu, e lolo badabadamu,
ia inaina ihadikadia ai ena goada e hahedinaraiamu.

14 Nega daudau asi reḡereḡegu vada na noho;
asina marere, na haheauka.
Harihari baina tai lolo, e hekamonaimu hahinena na heto,
baina laḡa dae laḡa dae, baina ḡanaḡana.
15 Ororo badadia bona maraḡidia baina havahudia,
latadiai e varamu ḡaudia iboudiai baina hakakorodia;
sinavai na motumotu ai baina halaodia,
gohu na baina hakororodia.
16 Mata-kepulu taudia na baina hakaudia,
asi dibadia dalana ai;
do asie dibadia daladia lalodiai
lau ese baina hakaudia.
Dibura na diari ai baina halaoa idia vairadiai;
gabu gudu-isidia na tano hedaga-maorodia ai baina halaodia.
Baina kara ḡaudia bini,
basina rakatanidia.
17 E koro kaivakukudia e abidadama henidiamu,
bona e hahetaridia kaivakukudia e hamaorodiamu, e tomu
“Umui na emai dirava”,
taudia na baina haloudia,
bona baina hahemaraidia vaitani.

Israel ena taia-kudima

18 Taia-kudima taumui, a kamonai!
Mata-kepulu taumui, a gaga isi, ḡau ba ita totona!
19 Daika matana e kepulumu? Lauegu hesiai tauna mo.
Daika taiana e kudimamu, egu gwaukau ilaohaina na siaiamutauna heḡereḡerena?
Daika matana e kepulumu, egu helaḡa tauna heḡereḡerena?
Daika mata e kepulumu, Iehova ena hesiai tauna heḡereḡerena?
20 Ḡau momo e itamu, to se matadia davarimu;
taiana e kiraramu, to se kamonaimu.
21 Iehova na e moaleva, ena kara maoromaoro dainai,
ena taravatu ihanamona bona i'imodaina helaoreana.
22 A ina na vada e henaodia bona e dadidia besena;
iboudiai na rikiriki guridia ai e heabi,
bona dibura rumadia ai vada e hehuni.
Idia na damu ai vada ela, asi iharoho-mauridia;
idia na dina ai vada ela, ta basineto “A kahudia nege”.
23 Umui bogaragimui ai daika ese ina hereva baine hakala henia?
Daika baine hakala? Daika baine kamonai, baine gini dae negana dainai?
24 Daika ese Iakob na dadidadi taudia e henidia?
Daika ese Israel na henao taudia e henidia?
Iehova, vada ta kara dika henia Diravana, ese ani?
Idia na ena dala irakalaidia asie ura,
bona ena taravatu ikamonaina asie uralaia.
25 Taunabunai ia ese ena badu ḡaraḡarana na ia latanai e bubua,
bona tuari siahuna danu;
a e doua heḡeḡe, to lalona se parara;
vada e araia, to se haeroa namonamo.