Lev 24 | MEU | STEP | Iehova ese Mose e hamaoroa, eto,

‏ Leviticus 24

Flaoa Helaḡana

1 Iehova ese Mose e hamaoroa, eto, 2 Israel taudia ba haduadia, olive dehorona ḡoevaḡoevana, lamepa ḡauna, bae henimu, lamepa baine ara hanaihanai helaoreana. 3 Hebou kalagana Ialonai, maua helaḡana seseahuna murimurinai, baine ara; Aaron ese baine reḡua, hanuaboi iboudiai baine ara rani Iehova vairanai. Haheḡanina binai baine mia hanaihanai emui uru iboudiai lalodiai. 4 Aaron ese lamepa baine reḡudia, lamepa patana ai,gold namo-hereana amo e karaia ḡauna, Iatanai bae ara hanaihanai, Iehova vairanai.

5 Flaoa namo-hereana bavabia, ba gabua, igabu gwauta-rua. Flaoa efa ta ba karoa, karoa gwauta, bena karoa rua rua bavabi, igabu ta ta ikaralaidia. 6 Bena Iehova vairanai ba dabara,gold namo-hereana amo e karaia patana latanai; ere rua ai bavatodia, ere ta igabu tauratoi, ma ere ta igabu tauratoi. 7 Ere ruaosi latadiai muramura mai bonana ḡoeva-daena bavatoa kau, iana flaoa ida helalo-tao toana ai baela, bona lahi boubouna ai baela, Iehova ena. 8 Dina Helaḡa ta ta ai, hahelaḡa tauna ese flaoa helaḡana unu baine dabaraia toma Iehova vairanai; Israel taudia daidiai baine dabaraia, herohemaino toana, baine hesiriu hanaihanai. 9 Una flaoa na Aaron mai natuna ida adia; gabu helaḡana ai bae ania, Iehova ena Iahi bouboudia iboudiai ia mo sibona helaḡa herea. Mia-hanaihanai taravatuna bunai.

Dirava iuduguiraina, davana

10 Tau ta, sinana na hane Israel, tamana na Aigupto tauna, e raka lasi. Israel taudia bogaragidiai: bena ia na Israel tauna korikorina ta ida e heai. taruha lalonai. 11 Bena hari hane Israel natuna ese Lada Helaḡana e uduguiraia, hereva metaudia e gwaurai. Bena haida ese e hakaua lao, Mose vairanai. Sinana ladana na Selomiti Dibri, Dan iduhuna hahinena. 12 Bena e ḡuia, ela bona Iehova ena hahemaoro herevana bae diba.

13 Bena Iehova ese Mose e hamaoroa, eto, 14 Heuduguirai tauna na taruha murimurinai ba hakaua lasi; bena ena heuduguirai herevadia e kamonai taudia iboudiai ese imadia na ia tubuana ai bae ato kau, murinai hebou taudia iboudiai ese nadi amo bae hodoa mase. 15 Israel taudia ba hadibadia danu, ena Dirava baine uduguiraia tauna ese sibona ena dika madunana baine huaia. 16 Iehova ladana baine uduguiraia tauna na baine mase; hebou taudia iboudiai ese bae hodoa mase. Ena be noho-hedoa tauna eiava Israel tauna korikori, to Lada Helaḡana bema uduguiraia, vada bae hodoa mase.

17 Tau ta baine alaia mase tauna danu bae alaia mase. 18 Mauri ḡauna ta baine alaia mase tauna ese davana baine heni; mauri ḡauna davana be mauri ḡauna. 19 Tau ta ese dekena tauna baine haberoa, e haberoa heḡereḡerena ai ia danu bae haberoa. 20 Bero davana bero, mara davana mara, ise davana ise; e karaia heḡereḡerena ma ba kara henia. 21 Mauri ḡauna idauna baine alaia mase tauna ese davana baine heni; a taunimanima baine alaia mase tauna na bae alaia mase. 22 Noho-hedoa tauna bona Israel tauna korikori taravatudia na tamona: lau Iehova emui Dirava na gwaumu.

23 Mose ese Israel taudia unu e haḡanidia toma; bena idia ese heuduguirai tauna e hakaua lasi, taruha murimurinai, nadi amo e hodoa mase. Iehova ese Mose e haduaia heḡereḡerena, Israel taudia na unu e kara toma.