‏ Numbers 10

Silver kibidia

1Iehova ese Mose e haḡania, eto, 2Kibi rua ba kara,silver amo ba korodia. Reḡedia na taunimanima ihaboudia bona taruha ikokina toadia ai baela. 3Kibi ruaosi bae hiriri negadia ai, taunimanima iboudiai na dekemu ai bae hebou, hebou kalagana iduarana ai. 4A tamona bae hiriria negadia ai, bese lohiadia, Israel iduhudia ikwaradia, na dekemu ai bae hebou. 5Kibi bae hiriri lalo-dika negana ai, mairiveina kahana taruhana bae kokia, bae huaia lao. 6Nega iharuana ma bae hiriri lalo-dika negana ai, diho kahana taruhana bae kokia, bae huaia lao. Hari kibi reḡedia be edia tore-isitoana. 7A taunimanima ihaboudia ba ura negadia ai, kibi na bae hiriri, to basie hiriri lalo-dika. 8Hahelaḡa taudia, Aaron garana, ese kibi bae hiriri: emui kibi taravatuna bunai, ela bona uru iboudiai. 9Inaimui ese bema hadikamui emui tano ai, bena boma tuari henidia, una negana ai kibi boma hiriri lalo-dika; bena Iehova emui Dirava ese baine lalomui, bona inaimui imadia amo baine hamaurimui. 10Emui moale dinadia ai danu, bona emui aria dinadia ai, eiava hua matamata negadia ai, emui ḡole-oho bouboudia bona emui herohemaino bouboudia ba hahelaḡadiamai kibi ihiriridia ida; unu amo emui Dirava ese baine lalomui tao. Lau binai Iehova, emui Dirava.

Israel taudia Sinai e rakatania

11Laḡani iharuana ai, hua iharuana dinana iharuahuina ai, ori ese taravatu mauana dubuna e daetania. 12Israel taudia ese Sinai tano ḡaḡaena e rakatania, eha laolao, ela bona ori na Paran tano ḡaḡaena ai e diho. 13Edia laolao gini-gunana binai, Iehova ese Mose e haḡanilaia dalana amo e laolaova. 14Guna Iuda taruhana taudia edia orea ta ta amo edia pepe murina amo e raka; edia orea e gunalaidia tauna na Nason Aminadab. 15Isakara taudia edia orea igunalaidia tauna na Netanele Suara. 16Sebulun taudia edia orea igunalaidia tauna na Eliab Helon.

17Bena dubu e kokia, Gereson natuna bona Merari natuna ese e huaia lao. 18Idia muridiai Ruben taruhana taudia edia orea ta ta amo edia pepe murina amo e raka; edia orea e gunalaidia tauna na Elisuru Sedeuru. 19Simeon taudia edia orea igunalaidia tauna na Selumiele Surisadai. 20Gad taudia edia orea igunalaidia tauna na Eliasaf Reuele.

21Bena Kohat taudia ese kohu helaḡadia e hua; idia do asie kau ai dubu be vada e haginia guna. 22Idia muridiai Efraim taruhana taudia edia orea ta ta amo edia pepe murina amo e raka; edia orea e gunalaidia tauna na Elisama Amihud. 23Manase taudia edia orea igunalaidia tauna na Gamaliel Pedasuru. 24Beniamina taudia edia orea igunalaidia tauna na Abidan Gideoni.

25Bena gabe oreadia e tore isi. Dan taruhana taudia edia orea ta ta amo edia pepe murina amo e raka; edia orea e gunalaidia tauna na Ahiesere Amisadai. 26Asere taruhana taudia edia orea igunalaidia tauna na Pagiele Okran. 27Napatali taruhana taudia edia orea igunalaidia tauna na Ahira Enan. 28Israel taudia e tore isi negana ai edia laolao dalana be unuheto, orea ta ta amo e raka.

29Mose ese ihana Hobab Reuele, tau Midian, e hereva henia, eto, Ai na baia laolaomu, Iehova ese vada e hamaoromai baine henimai e tomu tanona baia lao henia. Taunabunai ba bamomai, bena namo ba davaria; badina be Iehova ese ḡau namodia vada e abi heḡeḡae, Israel taumai emai. 30A ia e haere, eto, Lau na basina bamomui, egu tano korikori baina lou henia, varavaragu dekedia bainala. 31Mose ma eto, Basio rakatanimai; badina be oi dibamu ai na tano ḡaḡaena ai baia taruha, bena oi na ai matamai ai baola. 32Ba bamomai, bena Iehova ena herahia ḡaudia amo oi ahumu do baia henimu.

33Taunabunai, idia na Iehova ena ororo amo e laolao matama, dina toi eha laolao, Iehova ena taravatu mauana danu dina toiosi ai idia vairadiai e huaia lao, edia laḡa-ani gabuna e tahua. 34Dina ai, Iehova ena ori esee hahekerukerudia, edia taruha e toretania negadia iboudiai. 35Maua helaḡana e huaia lao negadia ai, Mose eto, Iehova e, a tore isi, inaimu ba hakarohodia; e inai henimumu taudia na oi vairamu ai bae heau. 36Bona e atoa diho negadia ai ma eto, Iehova e, Israel taudia gerebu gerebu ba lou henidia.