Num 34 | MEU | STEP | Iehova ese Mose e hereva henia, eto,

‏ Numbers 34

Kanaan tanona iharina

1 Iehova ese Mose e hereva henia, eto, 2 Israel taudia ba haḡanidia, baoto: Kanaan tanona na emui tano, ela bona ena hetoa iboudiai. Kanaan tanona ai ba kau negana ai, 3 emui tano hetoana diho kahana ai na Sin tano-ḡaḡaena amo Edom hetoana ai bainela, ela bona Tadi (Gohuna mairiveina kahana. 4 Unu amo Akrabim ororona diho kahana amo bainela, ela bona Sin. Unu amo ia na Kade-baranea diho kahana amo bainela, ela bona Hasara-adara, ela bona Asamon; 5 Asamon amo bainela, ela bona Aigupto Dokana, ma unu amo kone ai baine lasi.

6 Lahara kahana ai, emui hetoa na Davara Badana konena; emui tano hetoana bunai, lahara kahana ai.

7 Mirigini kahana ai, emui hetoa na Davara Badana amo bainela, ela bona Horo ororona. 8 Horo ororona amo bainela, Hamat kahana ai, ela bona Sedad. 9 Unu amo ma bainela, Sifron kahana ai, ela bona Hasara-enan. Mirigini kahana ai emui hetoa bunai.

10 Mairiveina kahana ai, emui hetoa na Hasara-enan amo bainela, elabona Sefam; 11 bona Sefam amo bainela, ela bona Ribla, Ain mairiveina kahana ai; unu amo ma bainela, ela bona Kinerete Gohuna ^{▼▼Kinerete Gohuna: ina na Galilea gohuna ladana ta.} mairiveina kahana. 12 Unu amo emui hetoa na Ioridane sinavaina, ela bona Tadi Gohuna. Ini hetoa lalodiai e miamu tanodia iboudiai na umui emui.

13 Bena Mose ese Israel taudia e haḡanidia, eto, Ina tano na emui tano; mari ai ba haria. Iehova vada e hereva, iduhu taurahani-ta bona iduhu ta kahana ese bae abia. 14 Badina be Ruben iduhuna taudia bona Gad iduhuna taudia bona Manase iduhuna kahana taudia na edia tano vada e abia: iduhu lohiadia ta ta ese ahudia vada e abi. 15 Hari iduhu ruaosi mai kahana ese ahudia vada e abi, Ieriko ai, Ioridane sinavaina mairiveina kahana ai, daba e reremu kahana ai.

16 Iehova ese Mose ma e hamaoroa, eto, 17 Tano iharina bae biagua taudia ladadia bini: Eleasara, hahelaḡa tauna; bona Iosua Nunu; 18 bona iduhu ta ta amo iduhu lohiadia ta ta bavabidia hidi, tano iharina bae biagua. 19 Ladadia bini: Iuda iduhuna amo, Kaleb lefune; 20 Simeon iduhuna amo, Semuel Amihud; 21 Beniamina iduhuna amo, Elidad Kislon; 22 Dan iduhuna amo, Buki Iogli, edia lohia ta; 23 Iosef garana amo, Haniel Efod, Manase iduhuna lohiana, 24 bona Kemuel Siftan, Efraim iduhuna lohiana; 25 Sebulun iduhuna amo, Elisafan Paranaka, edia lohia ta; 26 Isakara iduhuna amo, Paltiel Asan, edia lohia ta; 27 Asere iduhuna amo, Ahihud Selomi, edia lohia ta; 28 Napatali iduhuna amo Pedahele Amihud, edia lohia ta. 29 Tataudia bunu, Iehova ese e haḡanidia, tano bae haria, Israel taudia ahudia bae henidia, Kanaan tanona ai.