Pro 20 | MEU | STEP | Vine ranuna na ḡonaḡona ḡauna, kekero muramurana na heai ḡauna: ediai e kereremu tauna na asi aonegana.

‏ Proverbs 20

1 Vine ranuna na ḡonaḡona ḡauna, kekero muramurana na heai ḡauna:
ediai e kereremu tauna na asi aonegana.
2 Pavapava ena badu mai garina na leona e ḡoumu na heto;
e habaduamu tauna ese ena mauri e negeamu.
3 Heatu amo e raka sirimu tauna na bae imodaia,
a kavakava taudia iboudiai bae heai.
4 Lahedo tauna ese hadohado negana ai tano se ruaiamu;
taboro negana ai baine hetahu, a ḡau ta basine davaria.
5 Taunimanima ta ena lalo-hadai na ranu dobuna na heto;
a lalo-parara tauna ese baine veria lasi.
6 Taunimanima hutuma ese sibodia edia heabidadama egwauraimu,
a kara momokani tauna na daika ese baine davaria diba?
7 Kara maorormaoro tauna na ena lalo-maoromaoro ai e rakamu;
ia murinai natuna danu bae namo.
8 Hanua pavapavana na hahemaoro gabuna ai helaina ai
ia matana ese dika baine tapoa hidi.
9 Daika baine hereva diba, baineto:
Lalogu vada na haḡoevaia,
egu dika amo vada name ḡoeva.
10 Metau auridia mai koikoidia bona hahetoho ḡaudia mai koikoidia,
ruaosi Iehova ese e inai henidia badamu.
11 Mero maraḡina ena kara amo sibona e hahedinaraimu,
ena kara na ḡoḡoeva-ḡoḡoeva bona mamaoro-mamaoro eiava?
12 E hakalamu taiana bona e roharohamu matana na
Iehova ese ruaosi vada e karadia.
13 Mahuta basio ura henia, ba ogoḡami na garina;
matamu a hapapadia, bena aniani momo bavabia.
14 Hoihoi tauna na e tomu “Ina na dika, ina na dika”,
bena e raka ohomu mai heaḡina ida.
15 Gold bona dava-bada nadidia na mimia;
a aonega bibinadia na herahera nadina namo-hereana.
16 Tau ta ese idau tauna dainai bema gwau hamata, ena hahedoki na bavabia;
bona idau bese taudia daidiai bema gwau hamata, iena amo gwauhamata toana bavabia.
17 Koikoi amo e abiamu anianina na mai gaihona, iabina tauna uduna ai;
a gabeamo ia uduna na miri ai baine honu.
18 Hahealo amo lalo-hata e ginimu;
hahekau mai aonegana amo ba tuari.
19 E hesivarai loaloamu tauna ese hereva hehunidia e hahedinaraimu;
taunabunai hereva kavakavadia e gwauraimu tauna ida basio hetura.
20 Ta ese tamana eiava sinana bema uduguiraia,
ena lamepa baine bodo, baine dibura masemase.
21 Matamana ai e abia haraḡamu ahuna na
dokona ai anina namona basine vara.
22 Basioto “Dika baina davalaia”;
Iehova ba naria, ia ese baine durumu.
23 Metau auridia mai koikoidia na Iehova ese e inai henidia badamu:
bona hahetoho ḡaudia mai koikoidia na dia nanamo.
24 Taunimanima ena raka na Iehova ese e reḡuamu;
benaini, ena dala ede baine dibaia toma?
25 Tau ta baine hereva haraḡa, baineto “Ina na helaḡa”,
bena baine gwau hamata murinai baine haeroa,
una na idoa ienai.
26 Pavapava mai aonegana ese dika taudia na e tapodia hidimu,
bona edia dika davadia e henidiamu.
27 Taunimanima laumana na Iehova ena lamepa,
ia lalona idoinai itahuna.
28 Heabidadama bona kara maoromaoro ese hanua pavapavana na e hamauriamu;
ena terono na hahemaoro ḡoevaḡoeva ese e ha-aukaiamu.
29 Eregabe taudia hairaidia na edia goada,
a iahu hairaidia na huidia burukadia.
30 Hekwadi berodia ese dika e abi ohomu;
bona hedadaba ese taunimanima lalodia e haḡoevadiamu.