Pro 3 | MEU | STEP | Natugu e, egu hahediba herevadia basio lalodia boio, lalomu ese egu haheḡani baine badinadia;

‏ Proverbs 3

1 Natugu e, egu hahediba herevadia basio lalodia boio,
lalomu ese egu haheḡani baine badinadia;
2 badina be idia ese emu mauri dinadia bae hadaudaudia,
bona idia ese emu mauri laḡanidia bae hahohodia,
bona ḡau namodia momo bae henimu.
3 Hebogahisi bona heabidadama basio negedia,
a aiomu ba ḡeḡelaia
bona lalomu ai ba toredia.
4 Unu amo lalo-namo bona lalo-parara ba davaridia,
Dirava bona taunimanima vairadiai.

5 Iehova bavabidadama henia mai lalomu idoinai;
sibomu emu lalo-parara basio abidadama henia.
6 Emu dala iboudiai lalodiai ia bavabia dae,
bena ia ese emu dala baine hamaoromaorodia.
7 Sibomu emu aonega basio heaḡilaia;
Iehova garina ba gari,
bona dika amo ba raka oho.
8 Una na hidiomu ihamaurina,
bona turiamu ihagoadadia.

9 Emu kohu amo Iehova ba hanamoa,
bona emu uma ḡaudia iboudiai anidia roboadia amo danu;
10 bena emu roge na bae honu honu dae,
bona vine ranuna na emu vine ibulolaina urodia amo baine hepurai dobi.

11 Natugu e, Iehova ena mata-hakani basio dadaraia,
bona ena sisiba basio hesikulaia;
12 badina be Iehova ese e lalokau heniamu tauna na e sisiba heniamu,
tama ta ese natuna, e lalo namo heniamu merona, na e sisiba heniamu heḡereḡerena.

13 Aonega e davariamu tauna na namo,
bona lalo-parara e abiamu tauna danu;
14 badina be aonega ena amo e heabimu ahuna ese
silver ena amo e heabimu ahuna na e hereaiamu,
bona davana esegold e hereaiamu.
15 Ia davana ese herahera nadidia davadia e hereadiamu,
bona o ura henimu ḡaudia ta na ia ida basie heḡereḡere.
16 Mauri daudauna na ia imana idibana ai;
taḡa bona heimodai na ia imana laurina ai.
17 Ena dala na moale daladia;
ena dala iboudiai na maino daladia.
18 Ia na mauri auna, e dabaia taomu taudia ediai;
e dogoa taomu taudia na moale taudia e gwauraidiamu.

19 Iehova ese aonega amo tanobada e hadaia,
lalo-parara amo guba e karaia;
20 iena diba-bada dainai gadobada na e aru dae,
bona ori ese hunu e hadihoamu.

21 Natugu e, aonega namona bona kara balaheni ba badinadia;
oi matamu ese basie readia;
22 bena idia ese laumamu bae hamauria,
bona aiomu bae heralaia,
23 bena emu dala ai ba raka mai namomu ida,
bona aemu na basine hetutuhi.
24 Boma helai diho, basioma gari;
boma hekure diho, emu mahuta bema gaiho.
25 Hahetaku ḡauna garina basio gari,
eiava kara dika taudia ihabua-taridia baine kau negana ai danu basio gari;
26 badina be Iehova na emu abidadama,
ia ese oi aemu baine naria, basine heidoa.
27 Ihanamona na mai badina bae abia taudia edia amo basio rua,
ba henidia diba negana ai.

28 Dekemu tauna basio hamaoroa, basioto
“Aola, ma ba lou mai, kerukeru baina henimu”,
a ḡau be dekemu ai e miamu.
29 Dekemu tauna ihadikana dalana basio laloa hata,
ia na badibadimu ai e nohomu,
bona e abidadama henimumu.
30 Tau ta basio lodu henia kava,
ia ese se hadikamu negana ai.
31 Taiḡa dika tauna basio vaḡeḡe henia,
ena dala ta basio abia hidi;
32 badina be kara heḡui-heḡui tauna na Iehova ese e inai henia badamu,
a kara maoromaoro taudia na ia ese e abidadama henidiamu.
33 Iehova ese kara dika tauna ena ruma e uduguiraiamu;
a kara maoromaoro tauna ena ruma ia ese e hanamoamu.
34 Heihi-ihirai taudia na ia ese e ihi-ihiraidiamu;
a manau taudia na ia ese e lalo namo henidiamu.
35 Aonega taudia davadia na heimodai,
a kavakava taudia na bae hahemaraidia.