‏ Psalms 105

1Iehova ba hanamoa, ia ladana ba hahanea;
ena kara ba gwauraidia hedinarai bese idau-idau vairadiai.
2Ane bavabi iena, ia ihanamolaina anedia bavabi,
ena hoa karadia iboudiai sivaraidia ba gwaurai.
3Ia ladana helaḡana ba heatolaia;
Iehova e tahuamu taudia lalodia do bae moale.
4Iehova ba tahua, bona ena goada danu;
ia vairana ba tahua loulou.
5Ena hesiai tauna Abraham garana e!
Iakob natuna, ena abi-hidi taudia, e!
Hoa karadia ia ese vada e kara ba lalodia tao,
ena siahu karadia bona ena hahemaoro herevadia danu.

7Ia na Iehova, eda Dirava;
ena hahemaoro na tanobada idoinai e miamu.
8Ia ese ena gwauhamata e laloa hanaihanaimu,
bona ena haheḡani herevadia danu ela bona uru daha.
9Abraham ida e hegwauhamata heheni,
Isaak e gwau henia hamata;
10Iakob enai e hamomokania, taravatu ai bainela,
Israel enai baine mia hanaihanai ḡauna.
11Eto “Kanaan tanona baina henimu,
oi ahumu korikori ai bainela”.

12Idia na dounu gagadoi,
asi haridia, e noho hedoava una tano ai,
13bese ta bese ta lalodia amo e loa eva-evava,
basileia ta lalona amo ela bona ma orea ta ai;
14una negana ai ta asine gwau maoro henia idia baine daḡedaḡe henidia;
hanua pavapavadia ia ese e gwau henidia, idia daidiai.
15Eto “Vada na horodia taudia basio daudia toho,
egu peroveta taudia na basio hadikadia”.
16Doe e gwauraia tano latanai,
aniani ḡaudia iboudiai e utudia oho;
17una negana ai ia ese idia edia amo tau ta e siaia guna;
ladana na Iosef, e hoia, hesiai tauna ai ela.
18Ia aena na auri gadeadia ese e haberodia,
ia aiona na auri amo e ḡuia;
19Iehova ena hereva ese e dibaia toho,
ela bona e gwaurai guna ḡaudia vada e hekara.
20Hanua Pavapavana ese haida e siaidia, bae ruhaia nege,
bese lohiana ese e kahua nege;
21ena ruma inarina tauna ai e halaoa,
bona ena kohu iboudiai ireḡudia ai ela,
22ena hanua lohiadia baine hadibadia ena ura heḡereḡerena
bona ena tau badadia baine ha-aonegadia totona.

23Bena Israel na Aigupto ema,
Iakob na Ham ena tano ai e nohova.
24Bona Iehova ese ena orea taudia e hahutumadia,
e hagoadadia, ela bona idia vada e goada, inaidia vada e manoka.
25Bena ia ese inaidia lalodia e ha-idaudia,
ena orea taudia bae inai henidia,
bona ena hesiai taudia bae koidia.

26Ia ese Mose e siaia,
bona Aaron danu, ena abi-hidi tauna;
27raruosi ese iena toa e karava, taunimanima bogaragidiai,
hoa karadia danu, Ham ena tano ai.
28Dibura e siaia, tano e hadiburaia,
to idia ese iena hereva e gwaua ede ede.
29Edia ranu na rara ai e halaoa,
edia gwarume e hamasedia.
30Parapara e hahegiḡia bou edia tano ai,
edia pavapava edia ruma ai danu.

31Ia e gwau isi, bena lao momo ema,
bona namo momo danu, edia tano idoinai.
32Medu-hetari na latadiai e hadihoa,
bona kevaru danu edia tano idoinai e hakevarua isi.
33Edia vine bona edia suke audia e hakwaidudia,
bona edia tano audia iboudiai e hagaridia.
34Ma e gwau isi, bena kwadi ema,
bona kwadi natudia asi iduahidia;
35edia tano reina idoinai bona edia uma anidia danu
e ani ore.
36Natudia roboadia iboudiai edia tano ai na e aladia mase,
edia goada anidia roboadia iboudiai.

37Bena Israel taudia na ia ese e hakaudia lasi,
mai ediasilver bonagold ida;
ena iduhu iboudiai lalodiai
tau ta se hetutuhi.
38E raka lasi negana ai Aigupto e moaleva,
badina be idia garidia e gariva.
39Ori e hapapaia, idia iḡovadia,
bona lahi, hanuaboi ai edia diari ai bainela.
40Idia e noinoi, bena ia ese kibi e siaidia,
bona aniani momo na guba amo e henidia dobi.
41Nadi hagahaga e hapararaia, bena ranu e aru lasi,
tano ḡaḡaena ai e aruva, sinavai na heto.
42Badina be ena gwauhamata helaḡana e laloa tao,
bona ena hesiai tauna Abraham danu.

43Ena orea taudia na unu e hakaudia lasi toma mai moaledia ida,
ena abi-hidi taudia mai anedia ida.
44Bese idau-idau edia tano ia ese e henidia;
bena idia ese unu bese taudia edia biru anidia e abi,
45ena hahedua karadia bae kara
bona ena taravatu bae badinadia helaoreana.

Iehova ba imodaia!