‏ Psalms 119

1Asi edia kerere e rakamu taudia,
Iehova ena taravatu ai e rakamu taudia,
idia na nanamo.
2Ena hahediba herevadia e badinadiamu
bona ia e tahuamu mai lalodia idoidiai taudia,
idia na nanamo.
3Idia na kara dika asie karamu,
a iena dala ai e rakamu.
4Oi ese vada o haḡanimai,
emu hahedua herevadia na baia badinadia tarika-tarika.
5Bama raka balaheni emu taravatu ibadinadia ai bema namo,
6bena tau ta basine hahemaraigu;
badina be emu haheḡani iboudiai baina raraidia tao.
7Emu hahemaoro herevadia maoromaorodia baina diba negadia ai na baina imodaimu,
mai lalogu maoromaorona ida.
8Emu taravatu baina badinadia;
basio negegu daure.

9Eregabe tauna na ede baine raka ḡoevaḡoeva toma?
Ena raka baine gimaia, emu hereva heḡereḡerena.
10Mai lalogu idoinai na tahumumu,
ba durugu, emu haheḡani basina rakatanidia.
11Emu hereva na lalogu ai na balaia henimu,
emu ai basina kara dika totona.
12Iehova e, oi na namo;
emu taravatu ba hadibagu.
13Lau udugu bibinadia amo,
oi udumu ena hahemaoro herevadia na gwauraimumu.
14Emu hahediba herevadia dalana na moalelaia badamu,
taḡa idoinai na moalelaia maraḡimu.
15Emu hahedua herevadia baina haerodia,
emu dala baina raraidia tao.
16Emu taravatu baina moalelaidia,
emu hereva na basina laloa boio.

17Emu hesiai tauna ba hanamoa,
bena baina mauri, bona emu hereva baina badinaia.
18Matagu ba hapapa, bena emu taravatu lalona amo
hoa ḡaudia baina itadia.
19Lau na noho-kau taugu tanobada ai;
emu haheḡani na egu amo basio hunidia.
20Laumagu na eme daure,
nega idoinai emu hahemaoro herevadia na ura henidia lalo-dikamu dainai.
21Hekokoroku taudia, vada e baia taudia, oi ese vada o gwau henidia;
idia ese oiemu haheḡani vada e rakatanidia.
22Edia ihi-ihirai bona edia hedadarai na egu amo bavabi oho,
badina be oiemu hahediba herevadia vada na badinadia.
23Ena be hanua lohiadia na lau ihadikagu totona e henega boumu,
to emu hesiai tauna ese emu taravatu baine haerodia.
24Oiemu hahediba herevadia na egu moale ḡaudia,
idia ese e hakaugumu.

25Laumagu na ḡahu ai e goru dihomu;
ba hamaurigu, emu hereva heḡereḡerena.
26Egu dala na gwauraidia negana ai, oi ese o haere henigu;
emu taravatu ba hadibalaigu.
27Emu hahedua herevadia dalana ba hadibalaigu,
bena emu hoa karadia baina haerodia.
28Lalo-hisihisi dainai laumagu na e veve ohomu,
emu hereva heḡereḡerena ai ba hagoadagu.
29Dala koikoidia na egu amo bavato daudau;
emu harihari-bada ai emu taravatu ba hadibalaigu.
30Heabidadama dalana vada na abia hidi;
emu hahemaoro herevadia na vairagu ai vada na atodia.
31Iehova e, emu hahediba herevadia na badinadiamu;
ba durugu, tau ta basine hahemaraigu.
32Egu lalo-parara ba habadaia negana ai na
emu haheḡani dalana ai baina heau.

33Iehova e, emu taravatu dalana ba hadibagu,
lau ese baina badinaia ela bona dokona.
34Lalo-parara ba henigu, emu taravatu baina badinaia,
bona baina abia dae mai lalogu idoinai.
35Emu haheḡani dalana ai ba hakaugu,
badina be una dala na moalelaiamu.
36Lalogu na ba hamanadaia, emu hahediba herevadia ai,
bena basina mata ḡaniḡani.
37Matagu na ba naridia, ḡau asi anidia basie haḡeredia;
emu dala ai ba hamaurigu.
38Emu hesiai tauna enai emu gwauhamata ba hamomokania;
una gwauhamata na e gari henimumu taudia edia.
39Gwau-gwau, na gari heniamu ḡauna, na egu amo bavabia oho,
badina be emu hahemaoro herevadia na nanamo.
40A itaia, emu hahedua herevadia na ura henidia lalo-dikamu;
emu kara maoromaoro ai ba hamaurigu.

41Iehova e, emu hebogahisi ba henigu,
bona emu hahemauri, emu gwauhamata heḡereḡerena.
42Bena e ḡonaḡonalaigumu taudia na baina haere henidia diba,
badina be emu hereva na abidadama heniamu.
43Hereva momokanina na udugu amo basio abia oho vaitani,
badina be emu hahemaoro herevadia na egu helaro.
44Emu taravatu ibadinana basina hadokoa
ela bona hanaihanai;
45ura-kwalimu ai baina raka,
badina be emu hahedua herevadia vada na tahudia.
46Emu hahediba herevadia danu hanua pavapavadia vairadiai baina herevalai,
bona tau ta basine hahemaraigu;
47badina be emu haheḡani na ura henidiamu,
idia lalodiai egu moale na davariamu.
48Emu haheḡani, na ura henidiamu gaudia, na na matauraidiamu;
emu taravatu baina haerodia.

49Emu hesiai tauna o henia herevana na ba laloa tao,
iena amo helaro o henigu.
50Egu hisihisi ai egu tauhalo binai:
emu gwauhamata ese e hamaurigumu.
51Dirava garina asie garimu taudia ese e dadaraigu vaitanimu,
a emu taravatu amo asina raka muri.
52Emu hahemaoro herevadia gunadia na lalodiamu negana ai,
Iehova e, taugu na e lomu.
53Badu ḡaraḡara ese e abigumu, kara dika taudia daidiai,
idia ese emu taravatu e rakataniamu dainai.
54Emu taravatu na egu ane,
egu dae-kau rumana ai.
55Iehova e, hanuaboi ai oi ladamu na laloa taomu,
emu taravatu na badinaiamu.
56Ina hahenamo na egu ai vada e kau,
emu hahedua herevadia vada na badinadia.

57Iehova na lauegu;
lau na gwau hamatamu, emu hereva baina badinadia.
58Mai lalogu idoinai na noimumu, ba hanamogu,
ba bogagu hisi, emu gwauhamata heḡereḡerena.
59Emu dala na haerodia negadia ai,
aegu na emu hahediba herevadia daladia ai e rakamu.
60Lau na raka haraḡa-haraḡamu, asina halahemu,
emu haheḡani ibadinadia ai,
61Ena be kara dika taudia edia idoa ese e idoagumu,
to emu taravatu asina reaiamu.
62Malokihi ai na tore isimu, oi ihanamomu totona,
emu hahemaoro herevadia maoromaorodia daidiai.
63Lau na e gari henimumu taudia iboudiai
bona emu hahedua herevadia e badinadia taudia bamodia.
64Iehova e, tanobada na emu hebogahisi ai eme honu honu dae,
emu taravatu ba hadibagu.

65Iehova e, emu hesiai tauna vada o kara namo henia,
emu hereva heḡereḡerena.
66Lalo-parara bona aonega ba hadibagu,
badina be emu haheḡani na abi daemu.
67Hisihisi do se abigu negana ai na raka muri,
a harihari emu hereva na badinaiamu.
68Oi na namo, bona o kara namomu;
emu taravatu ba hadibagu.
69Dirava garina asie garimu taudia ese hereva koikoidia amo e hadikagumu,
a lau ese mai lalogu idoinai emu hahedua herevadia na badinadiamu.
70Lalodia na digara uduna masemasedia na heheto;
a lau na emu taravatu na moalelaiamu.
71Hisi na ani be namo,
unu amo emu taravatu na lalo davari.
72Udumu taravatuna na namo herea egu ai,
gold bonasilver monidia daha daha e hereadiamu.

73Oi imamu ese vada e karagu, oromagu vada e henigu;
lalo-parara danu ba henigu, emu haheḡani baina lalo davari helaoreana.
74Oi garimu e garimu taudia bae itagu, bena bae moale,
badina be emu hereva vada na laroa.
75Iehova e, lau dibagu emu hahemaoro herevadia na mamaoro,
bona heabidadama ai vada o hahisigu.
76Emu lalokau ese taugu ihalona baine lailaia,
emu hesiai tauna o gwau henia hamata heḡereḡerena.
77Emu hebogahisi na egu ai baine kau, baina mauri totona;
badina be emu taravatu na egu moale ḡauna.
78Dirava garina e garimu taudia na bae hahemaraidia,
badina be edia koikoi amo vada e dibaḡanigu;
a lau ese emu hahedua herevadia baina haerodia.
79Oi garimu e garimu taudia ese lau bae haḡeregu,
bena emu hahediba herevadia bae dibadia.
80Lalogu na asi kererena baine noho emu taravatu ai,
bena basie hahemaraigu diba.

81Laumagu ese emu hahemauri e ura henia lalo dikamu;
emu hereva na laroamu.
82Matagu e vaburamu emu gwauhamata inarina ai;
na henanadaimu, na toma “Edena nega ai taugu ba haloa?”
83Lau na vine ranuna ivedailaina kopina kwalahu ai e hetau daemu na heto,
to emu taravatu asina lalodia boio.
84Emu hesiai tauna baine haheauka ela bona edena nega ai?
Edena nega ai e daḡedaḡe henigumu taudia ba hahemaoro henidia?
85Dirava garina se garimu taudia ese rikiriki vada e karaia, lau iabigu totona,
idia na emu taravatu asie badinaiamu.
86Emu haheḡani iboudiai na momomo kakani;
kara koikoi amo e hadikagumu; a kahagu.
87Mokona vada e hamasegu tanobada ai,
a lau ese emu hahedua herevadia asina rakatanidia.
88Emu hebogahisi ai ba hamaurigu,
bena udumu ena hahediba herevadia baina badinadia.

89Iehova e, emu hereva na
guba ai e mia hanaihanaimu.
90Emu heabidadama na e hesiriumu ela bona uru. iboudiai;
tanobada vada o hadaia, e gini tutuka-tutukamu.
91Oi o gwau maoro dainai hari dina ai idia na gigini,
badina be ḡau iboudiai ese oi isiaimu e lao henimu.
92Emu taravatu basinama moalelaia,
egu hisihisi ai bama mase.
93Emu hahedua herevadia basina lalodia boio, lasi vaitani;
badina be idia edia amo mauri vada o henigu.
94Lau na oiemu, ba hamaurigu;
badina be emu hahedua herevadia vada na tahudia.
95Kara dika taudia na e bani taomu, bae alagu mase totona,
a lau ese emu hahediba herevadia na haerodiamu.
96Vada na itaia, asi ḡauna ta tanobada ai vada e namo guḡuru,
a emu haheḡani na ḡamoḡa bada.

97Emu taravatu na ura henia lalo dikamu;
ia na egu haero-haero ḡauna dina idoinai.
98Egu aonega ese inaigu edia aonega e hereaiamu,
emu haheḡani ese lalogu vada e hapararaia dainai;
badina be ia na egu ai hanaihanai.
99Egu lalo-parara ese e hadibagu taudia iboudiai edia lalo-parara e hereadiamu,
badina be emu hahediba herevadia na egu haero-haero ḡaudia.
100Egu diba ese tatau burukadia edia diba na e hereaiamu,
badina be emu hahedua herevadia na badinadiamu.
101Aegu na dala dikadia iboudiai amo na rudiamu,
emu hereva ibadinana totona.
102Emu hahemaoro herevadia amo asina raka siri,
badina be oi ese vada o hadibagu.
103Emu hereva mamidia egu ai na daka gaiho!
Edia gaiho mamina ese bada-ranuna gaihona e hereaiamu udugu ai.
104Emu hahedua herevadia ese lalogu vada eme hapararaia,
una dainai lau ese dala koikoidia iboudiai na inai henidiamu.

105Emu hereva na lau aegu lamepana,
bona egu dala diarina.
106Vada na gwau hamata, bona egu gwauhamata vada na hamomokania,
emu hahemaoro herevadia maoromaorodia baina badinadia.
107Egu hisihisi na bada;
Iehova e, ba hamaurigu, emu hereva heḡereḡerena.
108Iehova e, egu heimodai herevadia bavabi dae;
emu hahemaoro herevadia ba hadibagu.
109Nega idoinai egu mauri na imagu ai,
a emu taravatu asina reaiamu.
110Kara dika taudia ese idoa vada e karaia, bae idoagu eto;
a emu hahedua herevadia amo asina raka siri.
111Emu hahediba herevadia na lau ahugu, ela bona hanaihanai;
oibe, idia na lalogu ena moale badina.
112Lalogu vada eme heḡaeḡae, emu taravatu karadia baina kara,
nega iboudiai, ela bona dokona.

113Lalo-rua taudia na inai henidiamu,
a emu taravatu na ura heniamu.
114Oi na egu komu gabuna bona egu kesi;
emu hereva na laroamu.
115Kara dika taumui e, egu amo ba raka oho,
bena egu Dirava ena haheḡani baina badinadia diba.
116Ba imudagu, emu gwauhamata heḡereḡerena,
bena baina mauri,
bona egu helaro ai tau ta ese basine hahemaraigu.
117Egu imuda ai baola, bena baina mauri,
bona emu taravatu baina lalodia loulou.
118Emu taravatu amo e raka siri taudia iboudiai na o dadaraidiamu;
oibe, edia aonega na asi anina.
119Tanobada ena kara dika taudia iboudiai na negenege ḡaudia ai o halaodiamu;
taunabunai emu hahediba herevadia na ura henidiamu.
120Hidiogu e heude-heudemu, oi garimu na garimu dainai;
emu hahemaoro herevadia danu na gari henidiamu.

121Vada na kara ḡoevaḡoeva, vada na kara maoromaoro;
e daḡedaḡe henigumu taudia imadia ai basio rakatanigu.
122Turagu ai baola;
Dirava garina asie garimu taudia ba laodia ahu, basie daḡedaḡe henigu.
123Matagu vada eme hesiku, emu hahemauri irohana ai,
bona emu gwauhamata maoromaoro ihaḡuḡuruna irohana ai danu.
124Emu hebogahisi heḡereḡerena ai emu hesiai tauna ba kara henia,
emu taravatu ba hadibagu.
125Lau na emu hesiai tauna; lalo-parara ba henigu,
bena emu hahediba herevadia baina diba.
126Iehova ena kara baine hedinarai negana vada eme kau,
badina be haida ese emu taravatu vada e tataia utu.
127Taunabunai emu haheḡani na ura henidia badamu,
gold daenai, oibe,gold namo-hereana daenai.
128Una dainai emu hahedua herevadia iboudiai heḡereḡeredia ai aegu na davemu,
dala koikoidia iboudiai na inai henidiamu.

129Emu hahediba herevadia na nanamo heherea;
una dainai laumagu ese e badinadiamu.
130Emu hereva ikehodia ese diari e havaraiamu,
asi aonegadia taudia lalodia e hadiaridiamu.
131Udugu na haḡaiamu, na hodi dae hodi daemu,
badina be emu haheḡani na ura henidia lalo-dikamu.
132Ba haḡeregu, ba bogagu hisi,
vaia oi ladamu e ura heniamu taudia o kara henidiamu heḡereḡerena.
133Egu raka ba ha-aukaia, emu gwauhamata heḡereḡerena,
kara dika ta basine biagugu.
134Taunimanima edia daḡedaḡe amo ba hamaurigu,
emu hahedua herevadia baina badinadia totona.
135Oi vairamu diarina amo emu hesiai tauna ba hadiaria,
emu taravatu ba hadibagu.
136Iruru-matagu e aru badabadamu,
badina be taunimanima ese emu taravatu asie badinaiamu.

137Iehova e, emu kara na mamaoro-mamaoro;
emu hahemaoro herevadia na mamaoro-mamaoro.
138Emu hahediba herevadia na kara maoromaorodia ai vada o duanai,
bona heabidadama idoinai Ialonai danu.
139Lalogu siahuna ese e aragumu,
badina be inaigu ese emu hereva e lalodia boiomu.
140Emu gwauhamata vada e hekara toho ḡoeva;
emu hesiai tauna ese e ura heniamu.
141Lau na maraḡi, bona vada e dadaraigu,
ḡau tamona, emu hahedua herevadia asina lalodia boiomu.
142Emu kara maoromaorodia na maoromaoro hanaihanai,
bona emu taravatu na momokani.
143Hekwarahi bona hisihisi badadia na latagu ai eme kau,
to emu haheḡani na moalelaidiamu.
144Emu hahediba herevadia na maoromaoro hanaihanai,
lalo-parara ba henigu, bena baina mauri.

145Mai lalogu idoinai na taimu;
Iehova e, a haere henigu; emu taravatu baina badinadia.
146Na tai henimumu; a hamaurigu,
bena emu hahediba herevadia baina badinadia.
147Daba do se kiniamu na tore isimu,
hekaha totona na taimu, emu hereva na larodiamu.
148Hanuaboi gima negana ai matagu e nogamu,
emu gwauhamata baina haeroa totona.
149Emu hebogahisi ai gadogu a kamonai;
Iehova e, emu kara maoromaoro ai do ba hamaurigu.
150Edia lalo-hadai dikadia daidiai e daḡedaḡe henigumu taudia na e raka kahimu;
idia bona emu taravatu padadia na daudau.
151A oi, Iehova e, oi na kahira-kahira,
bona emu haheḡani iboudiai na momomo-kakani.
152Nega daudau emu hahediba herevadia vada na dibadia;
vada o haginidia, bae gini hanaihanai.

153Egu hisihisi ba itaia, ba hamaurigu,
badina be emu taravatu asina laloa boiomu.
154Idurugu herevana ba gwauraia, ba hamaurigu;
mauri ba henigu, emu gwauhamata heḡereḡeredia.
155Hahemauri bona kara dika taudia padadia na daudau,
badina be idia ese emu taravatu asie tahudiamu.
156Iehova e, emu hebogahisi na bada;
mauri ba henigu, emu kara maoromaoro heḡereḡeredia ai.
157E daḡedaḡe henigumu bona e inai henigumu taudia na hutuma,
a emu hahediba herevadia amo asina raka sirimu.
158Asi edia heabidadama taudia na itadiamu ai na lalogu e dikamu,
badina be emu haheḡani asie badinadiamu.
159Ba laloa, emu hahedua herevadia na ura henidia badamu;
ba hamaurigu, emu hebogahisi heḡereḡerena ai.
160Emu hereva iboudiai anidia na momokani,
bona emu hahemaoro herevadia maoromaorodia iboudiai na e hesiriu hanaihanaimu.

161Lohia ese e daḡedaḡe henigumu, asi badina;
a lalogu ese emu hereva e matauraidiamu.
162Emu hereva na moalelaiamu,
abi-dadi kohudia e davarimu tauna ena moale na heto.
163Koikoi na inai heniamu, na inai henia badamu;
a emu taravatu na lalokau heniamu.
164Dina ta ta ai, nega hahitu na imodaimumu,
emu hahemaoro herevadia maoromaorodia daidiai.
165Emu taravatu e wa heniamu taudia na maino badana e abiamu,
ḡau ta ese basine hahekwakwanaidia diba.
166Iehova e, emu hahemauri na laroamu,
bona emu haheḡani na badinadiamu.
167Laumagu na emu hahediba herevadia e badinadiamu;
na ura henidia lalo-dikamu.
168Emu hahedua herevadia bona emu hahediba herevadia na badinadiamu,
badina be egu dala iboudiai na oi vairamu ai.

169Iehova e, egu taitai aine vasi oi vairamu ai;
lalo-parara ba henigu, emu hereva heḡereḡerena ai.
170Egu noinoi aine dae vasi emu ai;
ba hamaurigu, emu hereva heḡereḡerena ai.
171Udugu bibinadia ese heimodai herevadia e gwaurai momomu,
emu taravatu o hadibalaigumu dainai.
172Malagu ese emu hereva baine anelaia,
badina be emu haheḡani iboudiai na mamaoro-mamaoro.
173Imamu na lau ikahagu baine heḡaeḡae,
badina be emu hahedua herevadia vada na abidia hidi.
174Iehova e, emu hahemauri na ura henia lalo-dikamu,
bona emu taravatu na moalelaiamu.
175Mauri ba henigu, baina imodaimu totona;
emu hahemaoro herevadia amo ba durugu.
176Lau vada na raka boioboio, dobi mamoena na heto;
emu hesiai tauna ba tahua,
badina be emu haheḡani herevadia asina lalodia boiomu.