Psa 27 | MEU | STEP | Iehova na egu diari, lau ihamaurigu; daika garina baina gari? Iehova na egu mauri maḡuna; daika baina gari henia?

‏ Psalms 27

1 Iehova na egu diari, lau ihamaurigu;
daika garina baina gari?
Iehova na egu mauri maḡuna;
daika baina gari henia?

2 Kara dika taudia ese bae ala-ala henigu,
lau taugu ianina totona,
una negana ai lau inaigu bona e daḡedage henigumu taudia na
bae hetutuhi bona bae keto.

3 Ena be tuari taudia hutuma bae taruha, lau bae ala-ala henigu,
to kudougu basine hetaha;
ena be tuari na egu ai baine kau,
to lalogu do baine goada.
4 Ḡau tamona mo Iehova enai na noiamu,
una mo baina tahua;
Iehova ena ruma ai baina noho,
egu mauri dinadia iboudiai;
Iehova hairaina baina itaia,
bona ena dubu ai lalo-parara baina tahua.
5 Badina be hahedika baine kau dinana ai,
ia ese ena kalaga ai baine hunigu;
ena ḡuriḡuri kalagana ai ia ese baine hunigu,
baine abigu isi, nadi latanai baine atogu.
6 Lau kwaragu baine heabi isi,
inaigu, e daigu ahu taudia, daediai;
bena ena ḡuriḡuri kalagana ai
boubou ḡaudia baina hahelaḡadia mai moalegu ida;
bona ane baina abi, Iehova ihanamolaina anedia.

7 Iehova e, na boi lolomu negana ai na ba kamonai,
ba bogagu hisi, ba haere henigu.
8 Vada oto “Lau vairagu ba tahua;”
bena lau lalogu e haere henimumu, e tomu
“Iehova e, oi vairamu na tahuamu.”
9 Oi vairamu na egu amo basio hunia.

Oiemu hesiai tauna basio lulua mai badumu ida;
ikahagu na oi.
Lau ihamaurigu Diravana e,
basio negegu, bona basio rakatanigu.
10 Badina be tamagu bona sinagu vada e rakatanigu,
a Iehova ese baine abigu dae.

11 Iehova e, emu dala ba hadibalaigu;
dala maoromaorona ai ba hakaugu, lau inaigu daidiai.
12 E daḡedaḡe henigumu taudia edia ura ai basio negegu;
badina be hahebade koikoi taudia vada e gini tore, bae hadikagu totona,
idia na mai daḡedaḡedia ida e ḡosimu.
13 Lau lalogu na e abia daemu Iehova ena kara namo baina itaia,
mauri taudia edia tano ai.
14 Iehova ba naria;
ba goada balaheni, ba boga auka;
oibe, Iehova ba naria.