Psa 86 | MEU | STEP | Iehova e, taiamu a hakala, a haere henigu, badina be na ogoḡamimu, na dabumu.

‏ Psalms 86

1 Iehova e, taiamu a hakala, a haere henigu,
badina be na ogoḡamimu, na dabumu.
2 A hamaurigu, badina be oiemu ai na taomu;
emu hesiai tauna oi e abidadama henimumu ba hamauria.
3 Oi na egu Dirava. Ḡaubada e, ba bogagu hisi;
badina be oi na tai henimumu dina idoinai.
4 Emu hesiai tauna laumana ba hamoalea.
Ḡaubada e, lau laumagu ese e tahumumu.
5 Ḡaubada e, oi na namo, oi na dika o gwaua taomu;
emu hebogahisi na bada, oi e tai henimumu taudia iboudiai ediai.
6 Iehova e, egu ḡuriḡuri a hakala henia,
egu noinoi a kamonaia.
7 Egu hekwarahi dinana ai na tai henimumu,
badina be oi ese o haere henigumu.

8 Ḡaubada e, dirava idau-idau bogaragidiai oi na asi idaimu;
ta ena ḡaukara danu dia oiemu heḡereḡeredia.
9 Ḡaubada e, o karadia besedia iboudiai na baema,
oi vairamu ai bae igo diho,
bona oi ladamu bae heatolaia.
10 Badina be oi na bada, bona hoa karadia o karamu,
oi mo sibomu Dirava.
11 Iehova e, emu dala ba hadibagu,
emu momokani ai baina raka helaoreana;
lau lalogu ba haheboua tamona,
oi ladamu imatauraina ai.
12 Ḡaubada Dirava e, lau oi na hanamomumu mai lalogu idoinai ida,
oi ladamu baina imodaia hanaihanai.
13 Badina be emu hebogahisi na bada egu ai,
lau laumagu na mase ena dobu gabudia amo vada o hamauria.

14 Dirava e, hekokoroku taudia vada e tuari henigu;
daḡedaḡe taudia ese lauegu mauri iabi-ohona dalana e tahuamu,
oi asie atomu lasi idia vairadiai.
15 A Ḡaubada e, oi na hebogahisi bona harihari-bada Diravana,
emu badu e halahemu emu hebogahisi bona emu heabidadama na bada herea.
16 A haḡeregu, a bogagu hisi;
emu goada na emu hesiai tauna na henia,
emu hesiai hahinena natuna ba hamauria.
17 Emu lalo-namo toana ta ba hahedinarai henigu,
bena e inai henigumu taudia na bae itaia, bona bae hemarai;
badina be, Iehova e, oi ese vada o durugu,
bona taugu vada o haloa.